पोलिसांकडून सडेतोड उत्तरामुळे गुन्हेगारांमध्ये भय
Prashant.Aher@timesgroup.com
पुणे : कोयते, तलवारीचे वार, तसेच गोळ्या घालून खून करण्याच्या रक्तरंजित प्रकारांचे पुणे जिल्ह्यातील गुन्हेगारीला प्रचंड आकर्षण असल्याचे वारंवार घडलेल्या घटनांमुळे दिसते आहे; मात्र आपल्या क्रौर्याचे किळसवाणे प्रदर्शन करणाऱ्या गुन्हेगारांच्या शरीरांची चाळण करण्यास पोलिसांनी सुरुवात केल्याने अनेक दादा, भाई घाबरले आहेत. कायद्याला भीक न घालणाऱ्या या गुन्हेगारांना ‘गोळी’चीच भाषा समजत असल्याचे नुकत्याच झालेल्या एन्काउंटरवरून दिसते आहे.
गेल्या दोन वर्षांत मावळ, हवेली या दोन तालुक्यांमध्ये राजकीय पदाधिकारी असलेल्या सात व्यक्तींचे खून झाले आहेत. हे सातही खून अत्यंत क्रूरपणे करण्यात आले असून, ते केवळ पैसे आणि राजकीय लालसेपोटी करण्यात आल्याचे उघडकीस आले आहे. गुन्हेगार गजाआड होत असले तरी हे खून थांबत नव्हते. तळेगाव दाभाडे येथील माजी नगराध्यक्ष सचिन शेळके यांचा १६ ऑक्टोबर रोजी खून झाला होता.
दाभाडे यांच्यावर कोयत्याने वार करण्यात आले. शेळके यांचाही खून करताना क्रौर्याचे किळसवाणे प्रदर्शन गुन्हेगारांनी दाखवले. राजकीय हत्या आणि गुन्हेगारांनी मावळात वर काढलेले डोके वेळीच ठेचणे गरजेचे बनले होते. पोलिस अधीक्षक डॉ. जय जाधव, वरिष्ठ पोलिस निरीक्षक राम जाधव यांनी केलेल्या प्रयत्नांमुळे काही गुन्हेगार गजाआड झाले. दोघांनी पोलिसांवरच हल्ला करण्याचा प्रयत्न केला, ते चकमकीत मारले केले. या घटनेमुळे तरी मावळ शांत होईल, अशी आशा उच्चपदस्थ सूत्रांनी व्यक्त केली.
चाकणनजीकच्या आंबू डोंगरावर पोलिसांबरोबरच गेल्या आठवड्यात झालेल्या चकमकीत कुख्यात गुंड श्याम दाभाडे आणि त्याचा साथीदार धनंजय शिंदे ऊर्फ तांबोली हे दोघे ठार झाले. पोलिसांनी त्यांच्याकडून पाच पिस्तुले आणि ४२ जिवंत काडतुसे जप्त केली होती. दिवसा झालेल्या या घटनेमुळे तळेगावात दहशतीचे वातारवण होते. माहिती अधिकार कार्यकर्ते सतीश शेट्टी यांचीही हत्या अशाच प्रकारे करण्यात आली होती. आरोपींनी हे दोन्ही खून करताना आपल्या क्रौर्याचे किळसवाणे प्रदर्शन घडवले होते. या प्रकारांना आवर घालण्यासाठी पोलिसांकडून ठोस कारवाईची अपेक्षा होती.
पुणे शहराच्या सीमेवर वसलेल्या मावळ, सासवडच्या पायथ्याला आणि उद्योगनगरी पिंपरी-चिंचवडमध्ये गेल्या काही महिन्यांत सहा राजकीय पदाधिकाऱ्यांचे खून झाले. जमिनी, त्यातून मिळणारा बक्कळ पैशांची या खुनांच्या घटनांना किनार होती. या सगळ्या घटनांमध्ये खून करण्यासाठी कोयते, पिस्तूल, तलवारीसारखे धारदार हत्यारे वापरण्यात आली होती. खुनाची घटना पाहिल्यानंतर पोटात धडकी भरावी, असे दृश्य घटनास्थळी पाहावयास मिळत असे. खून करणारे गुन्हेगार भले तुरुंगामध्ये गेले असले, तरी त्यांना कुणाचीही भीती वाटत नव्हती. दाभाडे, शिंदे यांच्या एन्काउंटरनंतर या गुन्हेगारांची तिथेही झोप उडाली असेल. मावळातील गुन्हेगारीचा कडेलोट झाला असून त्यांना चोख प्रत्युत्तराची गरज होती, अशी प्रतिक्रिया उच्चपदस्थ सूत्रांनी व्यक्त केली.
मावळ, हवेलीतील रेकॉर्डवरच्या गुन्हेगारांची दररोज झाडाझडती घेऊन त्यांना त्यांची ‘जागा’ दाखवण्याची वेळ आली आहे. पोलिस दारासमोर येऊन उभे राहतात, आपल्या पाठीमागे आपले कुटुंब रस्त्यावर येऊ शकते, अशी दहशत या गुन्हेगारांच्या डोक्यात बसणे गरजेचे आहे. पोलिसांनी आपली, आपल्या कुटुंबाची कुंडली मांडली असून, वेळ पडली तर आपल्याला सोडले जाणार नाही, अशी पोलिसांची दहशत प्रत्येक गुन्हेगाराच्या मनात बसणे गरजेचे आहे. वरिष्ठ पोलिस निरीक्षक जाधव यांनी देहू रोड येथे महाकालीचा एन्काउंटर केल्यानंतर अनेक गुन्हेगारांनी पुणे जिल्हा सोडून पळ काढला होता. दाभाडे, शिंदे यांच्या एन्काउंटरनंतर तशीच परिस्थिती निर्माण झाली आहे.
तळेगावमध्ये बड्या राजकीय व्यक्तींकडून आपल्या राजकीय डावपेचांसाठी या गुन्हेगारांचा वापर सुरू केला आहे. त्यातून दुसऱ्यासाठी खड्डा खोदण्याच्या प्रयत्नात काही बड्या व्यक्ती खड्ड्यात पडण्याच्या परिस्थितीत आहेत. मावळातील गुन्हेगारांनी राजकीय व्यक्तींच्या खुनाच्या सुपाऱ्या घेण्यास सुरुवात केली असून, ही परिस्थिती मावळासाठी चांगली नाही. लोणावळा, वडगाव मावळ, तळेगाव दाभाडे या ठिकाणी होत असलेल्या गुन्ह्यांची पाळेमुळे राजकारणाशी जोडली गेली असल्याचे वारंवार तपासात उघडकीस आले आहे.
खुनाच्या काही घटना
- महाराष्ट्र नवनिर्माण सेनेचे मावळ तालुक्याचे अध्यक्ष बंटी वाळुंज यांच्यावर गेल्या वर्षी कामशेत येथील महाराष्ट्र बँकेसमोर अज्ञात हल्लेखोरांनी गोळ्या झाडल्या होत्या. वाळुंज यांच्या खुनानंतर राजकीय हाणामारीच्या तीन घटना घडल्या.
- त्यानंतर बरोबर एक महिन्याने पिंपरी-चिंचवड महापालिकेतील राष्ट्रवादी काँग्रेसचे नगरसेवक अविनाश टेकवडे यांचा चाकूने भोसकून खून करण्यात याला.
- या घटनेनंतर तळेगाव दाभाडे पोलिस ठाण्याच्या हद्दीत सरपंच बाळासाहेब केदारी यांचा गळा चिरून खून करण्यात आला. सरपंचपदाच्या निवडणुकीवरून हा खून झाला.
- लोणावळा येथे सात सप्टेंबरला भर चौकात आतवण आपटी गेव्हंडे ग्रुप ग्रामपंचायतीचे विद्यमान सदस्य आनंद धोंडू शिंगाडे यांच्यावर चौघांनी धारदार शस्त्रांनी हल्ला चढवला होता.
- सासवड वडकी नाला येथे १० सप्टेंबरला युवा सेना पदाधिकारी हेमंत गायकवाड या गोळी झाडून खून करण्यात आला होता.
मोबाइल अॅप डाउनलोड करा आणि राहा अपडेट
