मुंबई, पुण्यात सर्वाधिक प्रकार; प्रेमप्रकरण, कर्जबाजारीपणा कारणीभूत
म. टा. प्रतिनिधी, पुणे
राज्यात पुरुषांच्या आत्महत्येच्या प्रमाणात मोठी वाढ झाली आहे. राज्यात विशेषतः मुंबई आणि पुण्यात सर्वाधिक आत्महत्या झाल्या आहेत. नैराश्य, आजारीपण, नापास होण्याची भीती, प्रेमप्रकरण, कर्जबाजारीपणा या विविध कारणांमुळे आत्महत्यांचे प्रमाण वाढले आहे. पुरुषांच्या आत्महत्या वाढण्याबरोबरच राज्यातील एकूण आत्महत्येच्या प्रकारातही चार टक्के वाढ झाली आहे.
राज्याच्या गुन्हेगारीचा लेखाजोखा मांडणारा ‘महाराष्ट्रातील गुन्हेगारी २०१५’ हा अहवाल नुकताच प्रसिद्ध झाला. त्यामध्ये आत्महत्यांसंदर्भात सविस्तर माहिती देण्यात आली आहे. राज्यात २०१५ मध्ये १६,९७० जणांनी आत्महत्या केल्या. पैकी १२, ३४५ पुरुष, तर, ४,३१४ महिला आहेत. २०१४ मध्ये १६,३०६ जणांनी आत्महत्या केल्या. एकूण आत्महत्येच्या घटनांमध्ये पुरुषांच्या आत्महत्या ६.८ टक्क्यांनी वाढल्या आहेत. तर, महिलांच्या आत्महत्या ३.६२ टक्क्यांनी कमी झाल्या आहेत. आजारपण आणि कौटुंबिक कारणामुळे निराश झालेल्यांनी मरणाला कवटाळण्याचे प्रमाण मोठे आहे. बेरोजगारी, परीक्षेत नापास झाल्यामुळे, कर्जबाजारीपणाला कंटाळून आत्महत्या केल्याचे आढळून आले आहे. प्रेमप्रकरणातून आत्महत्या करण्याच्या प्रमाणातही वाढ होत असल्याचे दिसून आले आहे.
राज्यातील सर्वाधिक आत्महत्यांची नोंद मुंबई शहरात झाली आहे. मुंबईत गेल्या वर्षी १,१२२ जणांनी आत्महत्या केल्या आहेत. त्यानंतर पुण्याचा क्रमांक लागत असून,शहरात ८७३ जणांनी आत्महत्या केल्या आहेत. तिसऱ्या क्रमांकावर जळगाव असून, तेथे ७६० जणांनी आत्महत्या केल्या आहेत. पुणे ग्रामीणमध्ये ६१० जणांनी आत्महत्या केल्या आहे. पुणे शहर आणि ग्रामीण एकत्रित केल्यास राज्यात पुणे जिल्ह्यात सर्वाधिक आत्महत्या झाल्याचे दिसून आले आहे.
बेवारस मृतदेह वाढले
राज्यात बेवारस मृतदेह आढळण्याच्या प्रमाणात २०१५मध्ये वाढ झाली आहे. या वर्षी राज्यात सहा हजार १८५ बेवारस मृतदेह आढळून आले. २०१४ मध्ये राज्यात चार हजार ८६० बेवारस मृतदेह आढळले होते. राज्यात सर्वांत जास्त बेवारस मृतदेह मुंबई शहर (१०८३), मुंबई रेल्वे (१०१०), ठाणे (४४०), पुणे शहर (३५५), पुणे रेल्वे (३६३), आणि नागपूर रेल्वे (४१०) येथे आढळले आहेत.
राज्यातील आत्महत्या
वर्ष आत्महत्या पुरुष महिला
२०१४ १,६०६ ११,८२८ ४,४७६
२०१५ १६,९७० १२,३५४ ४,३१४
शहरानुसार आत्मत्या
शहर आत्महत्या पुरुष महिला
मुंबई शहर १,१२२ ७२८ ३९३
पुणे शहर ८७३ ६३७ २३६
जळगाव ७६० ६२२ १३८
पुणे ग्रामीण ६१० ४७६ १३४
मोबाइल अॅप डाउनलोड करा आणि राहा अपडेट
