वर्चस्व कायम राखण्यासाठी भाजपची जोरदार तयारी
म. टा. प्रतिनिधी, पुणे
शहरातील सर्वाधिक सुशिक्षित ‘एरंडवणा-हॅपी कॉलनी’ (प्रभाग क्र. १३) या भागावर लोकसभा-विधानसभा निवडणुकीत मिळालेले वर्चस्व कायम राखण्यासाठी भारतीय जनता पक्षातर्फे जोरदार तयारी सुरू आहे. भाजपचा ‘शत-प्रतिशत’चा प्रयत्न सफल होऊ न देण्यासाठी इतर पक्षांकडून सक्षम उमेदवार रिंगणात उतरवले जाण्याची शक्यता आहे.
कोथरूडच्या भारतीय जनता पक्षाच्या आमदार आणि नगरसेविका मेधा कुलकर्णी व शिवसेनेचे प्रशांत बधे (प्रभाग क्र. ३५), भाजपच्या माधुरी सहस्रबुद्धे आणि महाराष्ट्र नवनिर्माण सेनेचे अनिल राणे (प्रभाग क्र. ३६) यांच्या जुन्या प्रभागांचा बहुसंख्य भाग नव्याने अस्तित्वात आलेल्या ‘एरंडवणा-हॅपी कॉलनी’ (क्र. १३) मध्ये समाविष्ट झाला आहे.
हॅपी कॉलनीपासून या प्रभागाची सुरुवात होते. गोसावी वस्ती, पिनाक सोसायटी, जितेंद्र अभिषेकी उद्यान, राहुलनगर, सिटीप्राइड-कोथरूड, पश्चिमानगरी, क्षिप्रा सोसायटी, गिरिजाशंकर सोसायटी, नवसह्याद्री, ताथवडे उद्यान, स्वप्नशिल्प, करिष्मा सोसायटी, संगम प्रेस, दशभुजा गणपती, देशपांडे पूरम, पटवर्धन बाग, दीनानाथ मंगेशकर हॉस्पिटल, हिमाली सोसायटी, एरंडवणा गावठाण, एसएनडीटी कॉलेज, अभिनव शाळा, फिल्म इन्स्टिट्यूट, शारदा सेंटर, आयुर्वेद रसशाळा, एस. एम. जोशी पूल आणि प्रभात रस्ता असा हा प्रभाग विस्तारला आहे.
महापालिकेच्या आगामी निवडणुकीसाठी बहुसंख्य सुशिक्षित भाग असलेल्या या प्रभागात सर्वाधिक संधी असल्याचा भाजपचा दावा आहे. सध्याच्या चारपैकी दोन विद्यमान नगरसेवक भाजपचे आहेत. लोकसभा-विधानसभेत या भागातून त्यांना लक्षणीय आघाडी मिळाली आहे. साहजिकच येथील उमेदवारी मिळविण्यासाठी इच्छुकांमध्ये जोरदार चुरस आहे. विद्यमान नगरसेविका माधुरी सहस्रबुद्धे, पक्षाचे सरचिटणीस उज्ज्वल केसकर, संदीप खर्डेकर, त्यांच्या पत्नी मंजुश्री खर्डेकर, जयंत भावे, सुनील पांडे, शिवाजी शेळके, प्रशांत हरसुले, गिरीश खत्री, गौरी करंजकर अशी इच्छुकांची मोठी यादी भाजपकडे तयार आहे.
भाजपप्रमाणेच शिवसेनेलाही या भागातून नेहमीच मतदारांचा पाठिंबा मिळाला आहे. त्यामुळे विद्यमान नगरसेवक प्रशांत बधे यांच्यासह माजी नगरसेवक राजा बलकवडे, त्यांच्या पत्नी सविता बलकवडे, गजानन थरकुडे, अनिल माझिरे, राजेंद्र पळसकर, छायाताई भोसले आणि उषा केळकर अशा प्रमुख नावांची चर्चा सुरू आहे.
मनसेचे विद्यमान नगरसेवक अनिल राणे याच भागातून पुन्हा निवडणुकीच्या रिंगणात उतरणार आहेत. त्यांच्यासह पक्षाचे पदाधिकारी राम बोरकर व त्यांच्या पत्नी प्रभावती बोरकर, मंदार बलकवडे, मनीष अंतुरकर, सुरेखा होले अशी नावे चर्चेच्या केंद्रस्थानी आहेत.
या परिसरातून काँग्रेसचे माजी नगरसेवक शिवा मंत्री महापालिकेवर निवडून गेले होते. त्यामुळे काँग्रेसला मानणारा ठराविक वर्ग या भागात आहे. काँग्रेसकडून मंत्री यांच्यासह राजा साठे, अॅड. सुरेश लांडे, मंगेश खराटे, संदीप मोकाटे, अॅड. अंजली कडू आणि सोनाली मगर अशी नावे चर्चेत आहेत. यामध्ये आणखी नावांची भर पडण्याची शक्यता आहे.
राष्ट्रवादी काँग्रेसकडून शिवाजी पाडळे, सनी मानकर यांच्यासह इतर काही नावांची चर्चा सुरू आहे. पुढील टप्प्यात आणखी काही नावे पुढे येतील, असे कळते.
................
प्रभाग क्र. १३ : एरंडवणा-हॅपी कॉलनी
लोकसंख्या : ७०,४०७
आरक्षण :
अ : ओबीसी
ब : महिला
क : महिला
ड : खुला
मोबाइल अॅप डाउनलोड करा आणि राहा अपडेट