म. टा. वृत्तसेवा, भोर
डॉ. बाबासाहेब आंबेडकर यांच्या शतकोत्तर रौप्यमहोत्सवी स्मृतीवर्षाच्या निमित्ताने भोर येथे २६ व २७ नोव्हेंबर रोजी दुसरे ‘फुले, शाहू, आंबेडकर विचार प्रसार’ साहित्य संमेलनाचे आयोजन करण्यात आले आहे.
स्वागताध्यक्ष आमदार संग्राम थोपटे यांनी ही माहिती दिली. या वेळी डॉ. प्रदीप पाटील, ज्ञानोबा घोणे, डॉ. रोहिदास जाधव व सदस्य उपस्थित होते. भोर येथील फुले, शाहू, आंबेडकर विचार प्रसारक मंडळ, डॉ. बाबासाहेब आंबेडकर अध्यासन व संशोधन केंद्र, सावित्रीबाई फुले पुणे विद्यापीठ, अंधश्रद्धा निर्मूलन समिती शाखा भोर, अनंतराव थोपटे विद्यालय व समविचारी संस्था, संघटना यांच्या विद्यमाने त्याचे आयोजन केले जाणार आहे. श्री. छत्रपती शिवाजी महाविद्यालयाच्या भव्य प्रांगणांत हे संमेलन होणार आहे. २६ नोव्हेंबर रोजी दुपारी २ वाजता संविधान रॅली, ग्रंथ प्रदर्शनाचे उद्घाटन पत्रकार राही भिडे यांच्या हस्ते होणार आहे. सायं. ७ वाजता कविसंमेलन होणार आहे. २७ नोव्हेंबर रोजी सकाळी नऊ वाजता आंबेडकरी जलसा झाल्यानंतर संमेलनाचे उद्घाटन होणार आहे. डॉ. भालचंद्र मुणगेकर, साहित्य संमेलनाचे अध्यक्ष श्रीपाल सबनीस, डॉ. विजय खरे, स्वागताध्यक्ष आमदार संग्राम थोपटे यांच्या उपस्थितीत हे उद्घाटन होणार आहे.
महात्मा ज्योतिराव फुले यांच्या विचारातील सामाजिक क्रांती या परिसंवादामध्ये डॉ. दत्ता भगत, डॉ. हमीद दाभोलकर, डॉ. चंद्रकांत वाघमारे, डॉ. अनिल सपकाळ, डॉ. दत्ता पाटील, डॉ. विजय धिवार, डॉ.राजाभाऊ भैलुमे, विजय लडकत सहभागी होणार आहेत. सामाजिक अत्याचार आणि जातीअंताची लढाई या परिसंवादामध्ये पत्रकार अनंत दीक्षित, अशोक धिवरे, डॉ. भालचंद्र कांगो, डॉ. विश्वंभर चौधरी, डॉ. नितीश नवसागरे, डॉ. शमसुद्दीन तांबोळी, उद्धव कांबळे, समीरण वाळवेकर सहभागी होणार आहेत. शिक्षणतज्ज्ञ पी. ए. इनामदार यांना डॉ. बाबासाहेब आंबेडकर कार्यगौरव राज्य; तर तालुकास्तरीय पुरस्काराने अर्जून शेलार यांना गौरविण्यात येणार आहे. संविधान कन्या मनश्री आंबेतकर हिची प्रकट मुलाखत अयोजित केली आहे. समारोप पत्रकार उत्तम कांबळे, अतुल गोतसुर्वे, मिलिंद जोशी उपस्थितीत होणार आहे.
मोबाइल अॅप डाउनलोड करा आणि राहा अपडेट
