इंडियन मेडिकल असोसिएशनच्या डॉक्टरांची अपेक्षा; पालिकेचे स्वतंत्र मेडिकल कॉलेज हवे
म. टा. प्रतिनिधी, पुणे
चार ते पाच हजार कोटी रुपयांचे पालिकेचे बजेट, त्या तुलनेत पुणेकरांच्या सार्वजनिक आरोग्यावर होणारा तुटपुंजा खर्च यामुळेच पुण्याचे सार्वजनिक आरोग्य ‘व्हेंटिलेटर’वर आले आहे. महापालिकेसह सरकारी दवाखान्यांमध्ये पुरेशा सुविधा उपलब्ध नसल्यानेच खासगी हॉस्पिटलशिवाय सर्वसामान्यांना पर्याय उरलेला नाही. दुसरीकडे रस्ते, सार्वजनिक वाहतूक सुविधेपासून प्रस्तावित रिंगरोड तयार करण्यासाठी राजकीय इच्छाशक्ती दाखविण्यात येत नसल्याची खंतही व्यक्त करण्यात आली. ‘वॉर्डातील काम दाखवा अन् मते मागायला या’ या शब्दांत वैद्यकीय तज्ज्ञांनी लोकप्रतिनिधींना एकप्रकारे इशाराच दिला आहे.
समाजातील विविध घटकांची मते जाणून घेताना सार्वजनिक आरोग्याची काळजी घेणाऱ्या वैद्यकीय तज्ज्ञांना विसरून कसे चालेल. डॉक्टरांचे प्रतिनिधित्व करणाऱ्या ‘इंडियन मेडिकल असोसिएशन’च्या (आयएमए) पदाधिकाऱ्यांशी ‘महाराष्ट्र टाइम्स’ने संवाद साधून त्यांच्या अपेक्षा, मागण्या जाणून घेतल्या. शहराच्या आरोग्याबरोबरच मान्यवरांनी सार्वजनिक वाहतूक, रिंगरोड, रस्ते, पाणी, सार्वजनिक आरोग्य, दवाखान्यांची अवस्था, शाळा, पार्किंग, नदी सुशोभिकरण आदी मुद्यांवरही भाष्य केले.
..
डॉ. मोहन जोशी, अध्यक्ष, आयएमए
शहरात सध्याची मोठ्या प्रमाणात वाहतूक कोंडीची समस्या भेडसावत आहे. त्याशिवाय चौकाचौकातील फूटपाथवर भाजीसह अनेक छोट्या-मोठ्या विक्रेत्यांनी अतिक्रमण केले आहे. त्यामुळे पादचाऱ्यांची अडचण होत आहे. अतिक्रमण करणाऱ्यांवर एक दिवस कारवाई होते. अधिकाऱ्यांची पाठ फिरली ‘ये रे माझ्या मागल्या’ सुरूच होते. शहरातील सार्वजनिक वाहतूक सक्षम झाली पाहिजे. ती सक्षम झाल्यास खासगी वाहने कमी होतील. युरोपमध्ये सार्वजनिक वाहतूक चांगली असल्याने खासगी वाहनांची संख्या कमी आहे. हॉस्पिटल, दवाखान्यांच्या नोंदणीची नियमावली कडक नको. परिणामी नोंदणीअभावी अनेक दवाखाने, हॉस्पिटल बंद पडले आहेत. परिणामी, मोठ्या हॉस्पिटलमध्ये जाण्याशिवाय पर्याय उरत नाही. त्यासाठी छोट्या हॉस्पिटलची नोंदणी सुलभ व्हायला हवी. पेशंटच्या खिशाला देखील ते परवडणारे आहे. नदी सुशोभिकरण प्रकल्प धूळ खात असून, तो पुन्हा सुरू करायला हवा.
..
डॉ. शरद आगरखेडकर, माजी अध्यक्ष, आयएमए
मुंबईच्या धर्तीवर शहरात महापालिकेचे स्वतंत्र मेडिकल कॉलेज असावे. त्यासाठी मुकुंदनगर भागात जागाही आरक्षित केली होती. शहरात सध्या नव्या मेडिकल कॉलेजची गरज भासत आहे. त्यामुळे गरीबांना परवडणाऱ्या दरात शिक्षण मिळू शकते. राजकीय इच्छाशक्ती नसल्याने हे मेडिकल कॉलेज अद्याप उभारण्यात आलेले नाही. महापालिकेच्या कमला नेहरू हॉस्पिटल, नायडू हॉस्पिटल तसेच सोनवणे दवाखान्यात डॉक्टरांसाठी ‘डीएनबी’चे कोर्स सुरू करावेत. त्यामुळे वैद्यकीय शिक्षण घेऊ इच्छिणाऱ्या विद्यार्थ्यांना संधी मिळू शकते. परिणामी, सार्वजनिक आरोग्य सेवा सुधारण्यास मदत होईल. शहरात वाहतूक कोंडी प्रचंड आहे. त्यामुळे शहरातील प्रदूषणाच्या पातळीने उच्चांक गाठला आहे. लहान मुलांना श्वसनाचे विकार जडले आहेत. प्रदूषण कमी करायचे असेल तर, मेट्रो झाली पाहिजे. स्मार्ट सिटीचीही आवश्यकता आहे.
..
डॉ. दिलीप सारडा, माजी अध्यक्ष, राज्य आयएमए
कोणतेही हॉस्पिटल, नर्सिंग होम, दवाखाने सुरु कऱण्यासाठी विविध प्रकारच्या ३७ परवानग्या लागतात. त्यासाठी तीन महिन्यापर्यंत महापालिकेत हेलपाटे मारावे लागतात. हे वाचविण्यासाठी एक खिडकी योजना हवी. शहराभोवती होणाऱ्या रिंगरोडचे व्यवस्थित नियोजन हवे. चंदननगर, सिंहगड रोड अशा भागात बांधकाम व्यावसायिकांनी भोगवटा पत्र (बांधकाम पूर्णत्वाचा दाखला) दिला नसल्याने तेथील हॉस्पिटलची मान्यता नियमित करावी. शहरातील ८५ टक्के पेशंट हे खासगी हॉस्पिटलवर अवलंबून आहेत. पालिकेचे बजेट पाच हजार कोटी रुपयांपर्यंत पोहोचले आहे. परंतु, सार्वजनिक आरोग्यासाठी दहा टक्केही निधीची तरतूद करण्यात येत नाही. कसाबसा एक ते दोन टक्के निधी खर्च केला जातो. आरोग्यासाठीचा निधी वाढला तरच महापालिकेचे दवाखाने, हॉस्पिटलमधील सार्वजनिक आरोग्य व्यवस्था सक्षम होईल. पर्यायाने मेडिकल कॉलेज काढणे शक्य होईल. शहरात कचरा वाढला आहे. त्यामुळे डेंगी, चिकुनगुनियाचे आजार वाढत आहेत. नदीसुधार योजना राबविली गेली पाहिजे. स्वच्छता अजेंड्यावर हवी. मुळा-मुठा नद्यांचे आता गटारात रुपांतर झाले आहे. परिणामी डासांचा प्रादुर्भाव वाढला आहे. शहरात बायोमेडिकल वेस्टचा (जैव वैद्यकीय कचरा) प्रश्न ऐरणीवर आहे. जैववैद्यकीय कचरा उचलणाऱ्या गाड्या नियमितपणे डॉक्टरांच्या क्लिनिकपर्यंत आल्या पाहिजेत. त्याचे दरही ठरवून दिले पाहिजे. स्मार्ट सिटीवर भर देणाऱ्या पक्षाला आमचा पाठिंबा असेल
...
डॉ. प्रकाश मराठे, नियोजित अध्यक्ष, आयएमए पुणे
शहरात पार्किंगची समस्या मोठी आहे. बहुमजली पार्किंगची सोय पालिकेने करायला हवी. सशुल्क पार्किंग करावे. उद्यानांसाठी, परिसरातील नागरिकांच्या करमणुकीसाठी महापालिकेने उद्यानांच्या जागा आरक्षित केल्या आहेत. परंतु, त्या ठिकाणी मोठी उद्याने दिसत नाहीत. खेळण्यासाठी पुरेशी मैदाने नाहीत. लहान मुलांसह मोठ्यांना खेळण्यासाठी क्रीडांगणे हवीत. सातारा रोड येथे बीआरटी केली पण; ती अयशस्वी ठरली. रस्त्यांची रुंदी वाढली खरी, पण पार्किंग, हातगाड्यांनी ते वेढले आहेत. फ्लेक्स, बॅनरने शहराचे सौंदर्य लयाला गेले आहे. स्वीकृत सदस्यांच्या दहा जागांमध्ये डॉक्टर, आर्किटेक्ट, वकील आदी विविध क्षेत्रातील व्यक्तींना संधी द्यायला हवी. रिंगरोडवर तातडीची वैद्यकीय उपचार देणारे हॉस्पिटल उभारण्याची गरज आहे.
..
डॉ. सुहास नेने, माजी अध्यक्ष, आयएमए पुणे
वाहतुकीसाठी पीएमपीची सेवा सुधारायला हवी. परिणामी वाहनांची कमी होईल. प्रदूषण देखील कमी होईल. रस्त्यांना समांतर रस्ते असण्याची गरज आहे. त्यामुळे वाहतुकीचा ताण कमी होईल. नदीकाठचा रस्ता वादात आहे. हा वाद निकाली काढून कर्वे रस्त्याला समांतर रस्ता तयार करता येऊ शकेल. शहरात परप्रांतियांची संख्या वाढत आहे. या पार्श्वभूमीवर पोलिस ठाण्यांची तसेच, पोलिसांची संख्या वाढविण्याची आवश्यकता आहे. प्रत्येक नगरसेवकाचे प्रगतीपुस्तक जाहीर करण्याची गरज आहे.
..
डॉ. अरुण हळबे, माजी अध्यक्ष, आयएमए पुणे
राजकीय पक्षांनी स्वतःला मोठे समजू नये. प्रशासनाच्या कारभारात नगरसेवकांचा वाढलेला हस्तक्षेप कमी झाला पाहिजे. सर्वसाधारण सभेत नगरसेवकांची उपस्थिती कमी असते. सामान्य नागरिकांच्या प्रश्नांवर चर्चा करण्यासाठी नगरसेवकांना वेळ नसतो. मग मते कशासाठी द्यायची, हा प्रश्न आहे. ८० टक्क्यांपेक्षा कमी उपस्थिती असलेल्या नगरसेवकांना निलंबित करावे. नगरसेवक अनुपस्थित राहणार असतील नागरिकांच्या अपेक्षा प्रशासनासमोर मांडणार कोण? अनेक प्रकल्प मांडले जातात. पण त्या प्रकल्पांची अंमलबजावणी होत नाही.
..
डॉ. पद्मा अय्यर, उपाध्यक्ष, पुणे शाखा
कचऱ्याची विल्हेवाट लावण्याची आवश्यकता आहे. तसेच, बायोमेडिकल वेस्टचे नियोजन करण्याची आवश्यकता आहे. शहर स्मार्ट होणे आवश्यक आहे.
..
रस्त्यांचे नियोजन
डॉ. बी. एल. देशमुख, सचिव, पुणे शाखा
दर वर्षी नव्याने रस्ते तयार कऱण्यात येतात. पण पुन्हा टेलिफोन, वीज मंडळ, ड्रेनेजसारख्या विविध कारणास्तव खोदण्या येतात. त्यामुळे रस्ते खराब होतात. विनाकारण जनतेचा पैसा वाया जातो. त्यासाठी पालिकेने रस्ते तयार कऱण्यापूर्वी नियोजन करण्याची आवश्यकता आहे.
..
डॉ. प्रकाश महाजन, सदस्य, आयएमए
शहराच्या बाहेर मोठे रस्ते आहेत. पण, मध्यवर्ती भागातील फर्ग्युसन रस्ता, जंगली महाराज आदी रस्ते छोटे आहेत. या रस्त्यांवर वाहतुकीचे प्रमाण अधिक असल्याने ते ओलांडणे अवघड झाले आहे . त्यासाठी स्कायवॉकचा पर्याय अंमलात आणला पाहिजे.
..
काय करायला हवे ?
रिंगरोडवर हॉस्पिटलच्या उभारणीचे नियोजन हवे, त्यांना मान्यता हवी.
पालिकेच्या बजेटमध्ये आरोग्यासाठीचा निधी वाढवा.
महापालिकेचे स्वतंत्र मेडिकल कॉलेज सुरू करावे.
पादचाऱ्यांसाठी स्कायवॉकची निर्मिती.
वाहतूक कोंडी दूर करण्यासाठी समांतर रस्ते.
सार्वजनिक वाहतूक सक्षम करण्याची गरज.
फूटपाथवरील अतिक्रमणे कायमस्वरूपी हटवावी.
शहराच्या सर्व भागात क्रीडांगणे हवीत.
नगरसेवकांची पालिकेच्या सर्वसाधारण सभेत उपस्थिती आवश्यक. कामाचे प्रगतीपुस्तक जाहीर करावे.
मोबाइल अॅप डाउनलोड करा आणि राहा अपडेट
