नव्याने नुकतीच सुरू करण्यात आलेली अखिल भारतीय मराठी बालकुमार साहित्य संस्था पुन्हा एकदा वादात सापडली आहे. संस्थेच्या घटना समितीतील मिहीर थत्ते यांनी संस्थेच्या कामकाज समितीच्या सदस्यांना विश्वासात न घेता सभासदांची बैठक बोलावल्याने नव्या वादाला तोंड फुटले आहे. घटनेनुसार थत्ते यांना कोणतेही अधिकार नसताना कोषाध्यक्ष अनिल कुलकर्णी यांच्या साथीने थत्ते यांनी हा कारभार केला असल्याचे स्पष्ट झाले आहे.
या संदर्भात बालकुमार साहित्य संस्थेच्या आजीव सभासदांच्या कामकाज समितीतर्फे पत्रकार परिषद घेण्यात आली. मिहीर थत्ते यांचा संस्थेच्या कामकाजाशी कोणताही संबंध नसताना त्यांना संस्थेची बैठक बोलावण्याचा अधिकार कोणी दिला, बैठकीसाठी काढलेल्या पत्रासाठी कोषाध्यक्ष अनिल कुलकर्णी यांनी लेटरहेड का दिले, असे प्रश्न या परिषदेत उपस्थित करण्यात आले. बालकुमार साहित्य संस्थेचे आजीव सभासद सुनील महाजन, माधव राजगुरू, मुकुंद तेलीचरी आदी या वेळी उपस्थित होते. काही दिवसांपूर्वी अनिल कुलकर्णी यांनी पत्रकार परिषद घेऊन बालकुमार साहित्य संस्था ही नव्याने उभी राहील, त्याचा आधीच्या संस्थेशी काही संबंध नसेल, असे सांगितले होते. मात्र ६ नोव्हेंबर रोजी आयोजित केलेल्या बैठकीसाठी आधीच्याच संस्थेतील आजीव सभासदांना आमंत्रणे देण्यात आली आहेत, यावरून संस्थेच्या आजीव सभासदांनी कुलकर्णी आणि थत्ते यांनी घेरले आहे.
बालकुमार साहित्य संस्थेच्या पुनरुज्जीवनासाठी घटना दुरुस्ती व्हावी, यासाठी घटना समिती नेमण्यात आली होती. त्यात मिहीर थत्ते, नंदकुमार लव्हेकर, डॉ. वि. वि. घाणेकर, माधव राजगुरू यांच्यासह अणखी काही सदस्यांचा समावेश होता. या समितीने घटना दुरुस्तीचा अहवाल देताना मिहीर थत्ते व नंदकुमार लव्हेकर हे घटना समितीच्या एकाही बैठकीला हजर राहीले नसल्याचे सांगितले. घटना दुरुस्तीच्या एकाही बैठकीला उपस्थित न राहणारा माणूस अचानक संस्थेचे पदाधिकारी अनिल कुलकर्णींच्या साथीने संस्थेची बैठक कशी बोलावतो, असा संतप्त सवाल सुनील महाजन यांनी या वेळी उपस्थित केला. संस्थेचे कोषाध्यक्ष अनिल कुलकर्णी यांनी लेटरहेड देऊन संस्थेतील पदाधिकाऱ्यांना विश्वासात न घेता परस्पर कारभार चालवला आहे. त्यासाठी त्यांनी पंधरा दिवसांच्या आत लेखी खुलासा करावा, अन्यथा त्यांना कायदेशीर कारवाईला सामोरे जावे लागेल, असा इशारा त्यांनी दिला.
बालकुमार साहित्य संस्थेचे कोषाध्यक्ष अनिल कुलकर्णी यांच्याकडे अद्यापही संस्थेची सर्व कागदपत्रे, चेक, पैसे, इतिवृत्त इत्यादी मालमत्ता असूनही ते बालकुमार साहित्य संस्थेशी काही संबंध नसल्याचे सागंत आहेत. त्यांनी त्वरित सर्व कागदपत्रे आजीव सभासदांकडे जमा करावीत आणि मिहीर थत्ते यांचा संस्थेशी कसलाही संबंध नसताना त्यांच्या साथीने मिळून केलेल्या या अनैतिक कृत्याचा खुलासा करावा, अन्यथा ते अडचणीत येतील, असे अखिल भारतीय मराठी बालकुमार साहित्य संस्थेच्या कामकाज समितीने सांगितले आहे. या प्रकरणासंदर्भात मिहीर थत्ते यांच्याशी संपर्क साधण्याचा प्रयत्न केला असता, संपर्क होऊ शकला नाही.
घटना समितीच्या एकाही बैठकीला हजर न राहता मिहीर थत्ते यांची थेट संस्थेच्या सभासदांची बैठक बोलावण्यापर्यंत मजल जाते, म्हणजेच त्यांचा हेतू चांगला नाही. त्यांना जे काम दिले होते ते त्यांनी चोख पार पाडले नाही. शिवाय संस्थेच्या पदाधिकाऱ्याला सोबत घेऊन चुकीच्या पद्धतीने संस्थेच्या सभासदांमध्ये गैरसमज पसरवण्याचे काम कुलकर्णी आणि थत्ते या जोडगोळीकडून सुरू आहे. त्यांनी त्वरित याबाबत खुलासा करावा.
- सुनील महाजन, आजीव सभासद, अ. भा. मराठी बालकुमार साहित्य संस्था
मोबाइल अॅप डाउनलोड करा आणि राहा अपडेट
