फरासखाना पोलिस ठाण्याच्या आवारात स्फोट घडविणाऱ्या ‘सिमी’संघटनेच्या तिन्ही संशयितांचा मध्य प्रदेशातील पोलिस एन्काउंटरमध्ये खात्मा झाला. तुरुंग फोडून फरारी झालेल्या आठ संशयितांमध्ये त्यांचा समावेश होता.
या पूर्वी हैदराबाद पोलिसांच्या एन्काउंटरमध्ये फरासखाना स्फोटातील एका संशयिताला यमसदनी पाठविण्यात आले होते. अशा प्रकारे फरासखाना पोलिस ठाण्याच्या आवारात स्फोट करणाऱ्या चौघा संशयितांची अखेरही पोलिसांच्या हातून झाली. शेख मेहबूब शेख इस्माईल ऊर्फ गुड्डू ऊर्फ किसन ऊर्फ मलिक ऊर्फ रमेश ऊर्फ समीर ऊर्फ आफताब (रा. गणेश तलाई, खंडवा, मध्य प्रदेश), जाकीर हुसेन बद्रुल हुसेन ऊर्फ सिद्दीक ऊर्फ आनंद ऊर्फ विकी डॉन ऊर्फ विनयकुमार (रा. खांडवा, मध्य प्रदेश), अमजदखान ऊर्फ पप्पू ऊर्फ दाऊद रमजान खान (रा. खांडवा, मध्य प्रदेश) हे तिघे फरासखाना स्फोट प्रकरणातील संशयित होते. त्यांच्यासह महंमद एजाजउद्दीन ऊर्फ अरविंद (रा. करेली, मध्य प्रदेश) याच्यावरही संशय होता. हैदराबाद पोलिसांनी या पूर्वी केलेल्या एन्काउंटरमध्ये एजाजउद्दीन मारला गेला.
सिमी संघटनेचे आठ दहशतवादी भोपाळच्या मध्यवर्ती तुरुंगातून सोमवारी पहाटे फरारी झाले. दहशतवाद्यांनी कारागृहातील सुरक्षारक्षकाला ठार करून इतरांचे हातपाय बांधून ठेवले. चादरीचा दोर करून त्यांनी कारागृहाची भिंत ओलांडली. मध्य प्रदेश सरकारने तातडीने तीन पथके तयार करून या दहशतवाद्यांचा शोध घेतला. भोपाळपासून दहा किलोमीटर अंतरावर असलेल्या मलिखेडा गावात पोलिस आणि फरारी दहशतवाद्यांमध्ये चकमक झाली. आत्मसमर्पण करण्याचा इशारा धुडकावून दहशतवाद्यांनी गोळीबार केल्यामुळे पोलिसांनी प्रत्युत्तरादाखल केलेल्या गोळीबारात ते ठार झाले. 000
..
दोन वर्षांपूर्वी पुणे हादरले
फरासखाना पोलिस ठाण्याच्या आवारात श्री स्वामी समर्थ स्नॅक्स सेंटरच्याकडेला सातारा येथून चोरण्यात आलेल्या दुचाकीवर बॉम्ब पेरण्यात आला होता. या बॉम्बचा १० जुलै २०१४ रोजी दुपारी २.०५ मिनिटांनी स्फोट झाला. स्फोटात सहा दुचाकींचे सुमारे दीड लाख रुपयांचे नुकसान झाले. पुणे पोलिस, दहशतवादविरोधी पथकाने उपलब्ध सीसीटीव्ही फुटेजच्या आधारे आरोपींचा माग काढण्याचा प्रयत्न केला.
..
‘सीसीटीव्हीं’मध्ये दिसले दहशतवादी
दहशतवादविरोधी पथकाने फरासखाना स्फोटाप्रकरणी तपास सुरू केल्यावर शहरातील २५० सीसीटीव्ही कॅमेऱ्यांचे फुटेज तपासण्यात आले होते. त्यातील २४ ठिकाणच्या कॅमेऱ्यांमध्ये आरोपी कैद झाले होते. सातारा शहरातील तीन तसेच पुणे-सातारा रोडवरील दोन टोल नाक्यांवरील फुटेज तपासण्यात आले होते. फरासखाना पोलिस ठाण्यासमोरील एका कॅमेऱ्यात स्फोटाचा प्रसंग कैद झाला होता. पोलिस ठाण्याच्या आवारात सकाळच्या सुमारास दुचाकी पार्क करणारे दोघे संशयित आणि सातारा रोडवरील टोलनाक्यांच्या कॅमेऱ्यात कैद झालेले संशयित यांची वर्णने जुळल्यानंतर आरोपींची खात्री पटली होती.
..
एन्काउंटरमध्ये दोघे ठार
हैदराबाद - विजयवाडा रस्त्यावरील सूर्यापेठ येथील हायटेक बसस्टँडवर बसमधील दोघा संशयितांना पोलिसांनी तपासणीदरम्यान चौकशीसाठी खाली उतरवले. ते दोघेही सिमीचे दहशतवादी होते. पोलिसांनी आपल्याला पकडल्याचा संशय आल्याने त्यांनी पिस्तुलातून पोलिसांवर बेछूट गोळीबार केला. त्यात दोघे पोलिस कर्मचारी मारले गेले आणि दोघे जखमी झाले होते. ४ एप्रिल रोजी स्थानिक गावकऱ्यांना मुख्य रस्त्यांवर दोन दहशतवादी कार्बाईन गन घेऊन फिरत असल्याचे दिसले. ते समजल्यानंतर मोदकूर पोलिस ठाण्याच्या हद्दीत पोलिस आणि दहशतवाद्यांमध्ये गोळीबार झाला. यामध्ये एक फौजदार व त्यांचा चालक हे ठार झाले. या वेळी दहशतवादी एजाजउद्दीन आणि अस्लम ठार झाले.
मोबाइल अॅप डाउनलोड करा आणि राहा अपडेट
