‘खामोश...’ या एका शब्दाने समोरच्याची बोलती बंद करणारे प्रख्यात अभिनेते शत्रुघ्न सिन्हा यांनी बुधवारी एफटीआयआयमध्ये विद्यार्थ्यांना अभिनयाचे बाळकडू दिले. सिन्हा यांनी प्राध्यापकाच्या भूमिकेमध्ये प्रवेश करून विद्यार्थ्यांचा ‘क्लास’ घेतला. तो चांगलाच रंगला. ‘बेस्ट के भी बेस्ट बने...अगर ना बन सके तो भी अपना अलग अस्तित्व दिखाने का प्रयास करे,’ असा सल्ला त्यांनी विद्यार्थ्यांना दिला.
खासदार असलेल्या शत्रुघ्न सिन्हा यांनी राष्ट्रीय चित्रपट व दूरचित्रवाणी संस्थेत (एफटीआयआय) आंदोलनाच्या काळात विद्यार्थ्यांशी संवाद साधणे टाळले होते. बुधवारी संस्थेत येऊन त्यांनी अभिनय अभ्यासक्रमाच्या २०१३ आणि २०१६ च्या तुकडीच्या विद्यार्थ्यांशी संवाद साधला. या वेळी अभिनय विभागप्रमुख टॉम आल्टर आणि कुमार शहानी उपस्थित होते.
संस्थेमधील १९६५-६७ दरम्यानचे विद्यार्थी दशेतील अनुभव...गुरूकडून मिळालेले मार्गदर्शन...अभिनेता म्हणून घडण्याची प्रक्रिया असा पट सिन्हा यांनी विद्यार्थ्यांसमोर उलगडला. विद्यार्थ्यांशी बोलताना ते काहीसे भूतकाळात रमले. संस्थेत शिकत असताना त्यांनी केलेल्या फिल्म्स विद्यार्थ्यांना दाखविण्यात आल्या. त्या पाहून तेही काहीसे भारावले. काम करतानाच्या आठवणी... त्यासाठी केलेली धडपड...अशा आठवणी त्यांनी विद्यार्थ्यांना सांगितल्या. विद्यार्थ्यांनी त्यांना विविध प्रश्न विचारून चित्रपट भानजागवले. सिन्हा यांनी मनमोकळेपणाने प्रश्नांना उत्तरे दिली.
---------------
मला संस्थेने खूप काही दिले. तुम्हालाही खूप काही मिळेल. फक्त शिकण्यावर लक्ष केंद्रित करा. आंदोलनादरम्यान संस्थेमध्ये मरगळल्यासारखे वातावरण होते; पण आता उत्साही वातावरण पाहून खूप छान वाटत आहे.
- शत्रुघ्न सिन्हा, प्रख्यात अभिनेते
मोबाइल अॅप डाउनलोड करा आणि राहा अपडेट
