महापालिकेत इंजिनीअरची भरती करण्यासाठी पालिका प्रशासनाने सर्वाधिक जलद प्रक्रिया राबवून परीक्षा घेतली. मात्र त्यानंतरची निवड यादी, पात्र उमेदवारांच्या कागदपत्रांची तपासणी करण्यास उशीर झाल्याने या भरती प्रक्रियेला आचारसंहितेचा फटका बसला आहे. ही भरती आचारसंहितेमध्ये येत असल्याबाबत स्पष्ट माहिती प्रशासनाकडे नसल्याने प्रत्यक्ष नियुक्ती पत्रे मिळण्यास उमेदवारांना निवडणूक संपण्याची प्रतीक्षा करावी लागण्याची शक्यता आहे.
महापालिकेत इंजिनीअरची भरती करण्यासाठी महापालिका आयुक्त कुणाल कुमार यांनी राज्य सरकारच्या ‘महाऑनलाइन’ बरोबर करार करून परीक्षा घेतली. अत्यंत वेगाने आयुक्तांनी ही प्रक्रिया राबविण्याचा निर्णय घेऊन स्थापत्य, विद्युत आणि यांत्रिकी या तीन विभागांसाठी ही भरती केली. या तीनही विभागांतील २१८ जागांसाठी पालिकेकडे २१ हजार अर्ज आले होते. पुण्यासह इतर शहरांमध्ये एकाच दिवशी ऑनलाइन परीक्षा घेऊन तीन तासांमध्ये त्याचा निकालदेखील जाहीर करण्यात आला होता. पालिका आयुक्त कुमार यांनी केलेल्या या नियोजनामुळे त्यांचे विशेष कौतुकदेखील करण्यात आले होते. ऑनलाइन पद्धतीने ही परीक्षा घेण्यात आल्याने तसेच प्रत्येक विद्यार्थ्याला परीक्षेसाठी वेगवेगळ्या प्रश्नपत्रिका देण्यात आल्या होत्या. यामुळे या परीक्षा प्रक्रियेत कोणताही हस्तक्षेप करण्याची संधी उपलब्ध झाली नसल्याचा दावा प्रशासनाने केला आहे.
पालिकेने घेतलेल्या परीक्षेचा निकाल तातडीने कळत असल्यामुळे उमेदवारांनाही काय झाले ते समजत होते. या तीनही विभागांसाठीच्या प्रश्नपत्रिका तपासण्यासाठी पालिकेने स्वतंत्र यंत्रणा ठेवली होती. पालिकेने घेतलेल्या परीक्षेची गुणांच्या प्राधान्यक्रमानुसार यादी तयार करण्याचे काम प्रशासनाने सुरू केले होते. मात्र याच दरम्यान, महापालिकेच्या निवडणूक आचारसंहितेची घोषणा झाली. त्यामुळे हे कामच ठप्प झाले आहे. परीक्षेला बसलेल्यांपैकी एकूण किती उमेदवारांना ९० पेक्षा अधिक गुण मिळाले याचीदेखील एकत्रित माहिती अद्याप प्रशासनाकडे तयार नाही. त्यामुळे पात्र उमेदवारांना नियुक्तीपत्रे मिळण्यास निवडणूक निकालाची वाट पाहावी लागणार असल्याची शक्यता व्यक्त केली जात आहे. याबाबत पालिका प्रशासनाकडे विचारणा केली असता, कोणताही संपर्क होऊ शकला नाही.
मोबाइल अॅप डाउनलोड करा आणि राहा अपडेट
