म. टा. प्रतिनिधी, पुणे
पुणे महापालिकेच्या शिक्षण मंडळाने शहरभरातील शाळांमधून उभारलेल्या कम्प्युटर लॅब गेल्या दीड वर्षांपासून धूळ खात पडून आहेत. या लॅबकडे वळणाऱ्या विद्यार्थ्यांना शिकविण्यासाठी मंडळाकडे प्रशिक्षित शिक्षक नसल्याने ही परिस्थिती निर्माण झाली आहे. त्याचवेळी या लॅबमधील कम्प्युटरच्या देखभालीकडेही दुर्लक्ष झाल्याने जनतेच्या करामधून पालिकेकडे गेलेल्या कोट्यवधी रुपयांचा चुराडा झाल्याचेही समोर आले आहे.
महापालिकेच्या शिक्षण मंडळातील कारभारामुळे गेल्या काही काळापासून मंडळाला शिक्षणप्रमुख मिळत नसल्याची बाब ‘मटा’ने नुकतीच उघड केली. या पदावर काम करत असताना विविध व्यवहारांसाठी येणारे राजकीय दडपण त्रासदायक ठरत असल्याने, शिक्षण खात्यातील अधिकाऱ्यांनी या पदावर काम करण्यास नकार दिला आहे. तसेच, मंडळाच्या कारभाराचे त्रयस्थ सरकारी यंत्रणेकडून मूल्यमापन करण्याची मागणीही अधिकाऱ्यांकडूनच पुढे आली आहे. मंडळाने शिपायांना शिक्षक म्हणून काम करण्याची अनोखी संधीही मिळवून दिल्याचे नुकतेच समोर आले. त्या पाठोपाठ हा कम्प्युटर लॅबचा कारभार समोर आल्याने मंडळाविषयीचे अविश्वासाचे धुके दाट होत चालले आहे.
महाराष्ट्र नवनिर्माण विद्यार्थी सेनेचे शहराध्यक्ष कल्पेश यादव आणि विक्रांत अमराळे यांनी या विषयी मंडळाकडे माहिती मागविली होती. त्यातून मिळालेल्या माहितीनुसार, मंडळाने आपल्या शाळांमधून शिकणाऱ्या विद्यार्थ्यांना कम्प्युटरचे शिक्षण देण्यासाठी म्हणून शाळांमधून कम्प्युटर लॅब उघडण्याची योजना राबविली आहे. त्या आधारे मंडळाच्या शाळांमधून एकूण २६६ कम्प्युटर लॅब सुरू करण्यात आल्या. २२ जुलै २०१५ पर्यंत या लॅबमध्ये एकूण एक हजार ७३५ कम्प्युटर बसविण्यात आले. त्यापैकी एक हजार ९२ कम्प्युटर हे सुरू; तर ६६४ कम्प्युटर बंद अवस्थेत होते. या लॅबमध्ये विद्यार्थ्यांना शिकविण्यासाठी प्रशिक्षक नेमण्यासाठी पालिकेने निविदा प्रक्रिया सुरू केली आहे. त्यामुळे सुरू असलेल्या कम्प्युटरच्या आधारे विद्यार्थ्यांना शिकविण्यासाठी किती प्रशिक्षक आहेत, याची कोणतीही माहिती मंडळाकडे नसल्याचेही मंडळाने लेखी पत्राद्वारे कळविले आहे.
शिक्षण मंडळाने गेल्या दीड वर्षांपासून या योजनेकडे हेतुपुरस्सर दुर्लक्ष केले आहे. त्यामुळे मंडळ विद्यार्थ्यांच्या भविष्याशीच खेळत आहे. या प्रकारात दोषी असलेले मंडळाचे अधिकारी आणि योजनेत सहभागी असलेल्या खासगी कंपन्यांवर त्वरीत गुन्हे दाखल करावेत. सर्व कम्प्युटर लॅब येत्या दोन आठवड्यात कार्यरत झाल्या नाहीत, तर मनविसे तीव्र आंदोलन करेल.
- महाराष्ट्र नवनिर्माण विद्यार्थी सेना
मोबाइल अॅप डाउनलोड करा आणि राहा अपडेट
