म. टा. प्रतिनिधी, पुणे
विधानपरिषदेच्या पुणे स्थानिक स्वराज्य संस्था मतदारसंघाची निवडणूक लढविण्याच्या तयारीत असणाऱ्या राष्ट्रवादी काँग्रेसच्या अनेक इच्छुकांनी गुडघ्याला बाशिंग बांधले आहे. भाजपकडूनही उमेदवाराचा शोध सुरू झाला आहे. यंदा या दोन्ही पक्षाच्या उमेदवारांना स्वपक्षीयांसह मित्रपक्षांनीही मदतीचा हात पुढे न केल्याने घोडेबाजार होण्याची शक्यता आहे.
राष्ट्रवादीचे आमदार अनिल भोसले यांचा कार्यकाळ संपल्याने या जागेसाठी निवडणूक होणार आहे. पुणे महापालिका, पिंपरी चिंचवड महापालिका, जिल्हा परिषद, नगरपालिका, पंचायत समित्यांच्या सभासदांना या निवडणुकीत मतदान करता येते. शहर आणि जिल्ह्यातील बहुतांश स्थानिक स्वराज्य संस्थांमध्ये राष्ट्रवादी काँग्रेसची सत्ता असल्याने उमेदवारीसाठी इच्छुकांची मोठी स्पर्धा आहे. स्वतः भोसले यांच्यासह महापौर प्रशांत जगताप, अंकुश काकडे, अप्पा रेणुसेही या जागेसाठी इच्छुक आहेत. पिंपरी चिंचवड आणि जिल्ह्यातील पक्षाचे पदाधिकारी देखील प्रयत्नशील आहेत. भोसरीचे अपक्ष आमदार महेश लांडगे यांनी गेल्याच आठवड्यात राष्ट्रवादीला सोडचिठ्ठी देऊन भाजपमध्ये प्रवेश केला. याचा फटका आगामी महापालिका निवडणुकीत राष्ट्रवादीला बसू नये, यासाठी पिंपरी चिंचवड भागाला संधी द्यावी, अशी मागणी केली जात आहे. माजी आमदार विलास लांडे, आझम पानसरे, योगेश बहल देखील उमेदवारीसाठी इच्छुक आहेत.
यंदाच्या निवडणुकीत ग्रामीण भागाला झुकते माप देण्याची भूमिका घेऊन जिल्हा परिषदेचे अध्यक्ष प्रदीप कंद आणि जिल्हाध्यक्ष जालिंदर कामठे यांनीही जोर लावला आहे. पुढील आठवड्यात उमेदवाराच्या नावावर शिक्कामोर्तब होईल, असे पक्षातील वरिष्ठ पदाधिकाऱ्यांनी सांगितले. दरम्यान, आघाडी न झाल्यास काँग्रेसकडून माजी मंत्री हर्षवर्धन पाटील यांच्या नावाचीही चर्चा आहे.
०००००००००
भाजपची भिस्त ‘इनकमिंग’वरच
गेल्या निवडणुकीत उमेदवार मागे घेऊन भाजपने राष्ट्रवादीला पुढे चाल दिली होती. यंदा त्याची पुनरावृत्ती होणार नाही, असे पक्षाचे नेते सांगत आहेत. पक्षाकडून माजी नगरसेवक उज्ज्वल केसकर, पालिकेतील गटनेते गणेश बीडकर यांची नावे पुढे येत आहेत. ही निवडणूक सोपी नसल्याने भाजपकडून आयत्यावेळी इतर पक्षातील मातब्बर उमेदवार निवडणुकीच्या रिंगणात उभा केला जाऊ शकतो. त्यामुळे येथेही आयारामांवरच पक्षाची भिस्त असल्याची चर्चा आहे.
...
बुधवारपासून अर्ज स्वीकारणार
विधान परिषदेच्या पुणे स्थानिक स्वराज्य संस्था मतदारसंघासाठी येत्या बुधवारपासून (२६ ऑक्टोबर) उमेदवारी अर्ज स्वीकारण्यास सुरुवात होणार आहे.
निवासी उपजिल्हाधिकारी राजेंद्र मुठे आणि उपजिल्हा निवडणूक अधिकारी समीक्षा चंद्राकार यांनी शुक्रवारी ही माहिती दिली. या निवडणुकीसाठी १९ नोव्हेंबर रोजी मतदान आहे. जिल्ह्यातील सर्व स्थानिक स्वराज्य संस्थांचे सदस्य यासाठी मतदान करणार आहेत. येत्या बुधवारपासून ते दोन नोव्हेंबरपर्यंत अर्ज भरता येणार आहेत. या निवडणुकीच्या आचारसंहितेतील तरतुदींचीही माहिती जिल्हा प्रशासनाकडून देण्यात आली.
दरम्यान, या निवडणुकीनंतर नगरपरिषदांच्या चार टप्प्यात निवडणुका होत आहेत. २७ नोव्हेंबर, १४ व १८ डिसेंबर आणि ८ जानेवारी असे चार टप्प्यांत यासाठी मतदान होणार आहे. पुणे जिल्ह्यातील दहा नगरपरिषदांच्या निवडणुका जाहीर झाल्या आहेत. येत्या फेब्रुवारी महिन्यांत पुणे आणि पिंपरी-चिंचवड महानगरपालिकेची निवडणूक होत आहे. त्यामुळे संपूर्ण जिल्ह्यात निवडणुकांचा हंगाम सुरू झाला आहे.
..................
विधानपरिषदेच्या निवडणुकीचा कार्यक्रम
एकूण मतदार - ७०२
अधिसूचना प्रसिद्धी- २६ ऑक्टोबर
अर्ज दाखल करण्याची अंतिम तारीख- २ नोव्हेंबर
अर्जाची छाननी ३ नोव्हेंबर
उमेदवारी मागे घेणे- ५ नोव्हेंबर
मतदानाची तारीख - १९ नोव्हेंबर
मतमोजणी - २२ नोव्हेंबर
निवडणूक कार्यक्रम पूर्ण करण्याची अंतिम तारीख - २४ नोव्हेंबर
..............
अशी असेल आचारसंहिता
- मंत्र्यांनी विशेष अथवा टाळता येणार नाहीत असेच शासकीय कार्यक्रम घ्यावेत. कार्यक्रमानंतर लगेचच आपल्या मुख्यालयाकडे जावे.
- निवडणुकीशी संबंधित कोणत्याही अधिकाऱ्याला आणि सदस्याला मंत्र्यांनी बैठकीसाठी बोलावू नये.
- स्थानिक संस्थांच्या नियमित बैठका अत्यावश्यक कारणासाठी जिल्हा निवडणूक अधिकाऱ्यांच्या पूर्वपरवानगीने घेण्यास हरकत नाही.
- निवडणूक कार्यक्रम सुरू असलेल्या मतदार संघात कोणतेही मंत्री त्यांच्या खासगी कारणासाठी शासकीय वाहनांचा वापर करणार नाहीत.
मोबाइल अॅप डाउनलोड करा आणि राहा अपडेट
