तुळशीबाग परिसरात हरीण, वाघाच्या कातडीची विक्री करण्यासाठी आलेल्या दोघांना गुन्हे शाखेच्या पोलिसांनी पकडले. त्यांच्याकडून प्रत्येकी एक लाख रुपये किमतीचे हरिणाचे आणि वाघाचे, तर ५० हजार रुपये किमतीचे रानडुकराचे दात जप्त करण्यात आले आहेत. कोर्टाने त्यांना १८ ऑक्टोबरपर्यंत पोलिस कोठडीत ठेवण्याचा आदेश दिला.
महेंद्र उरछाप पवार (वय २०), मंगल दिवार भोसले (वय ३५ दोघेही रा. अस्वलदरा जि. नाशिक, सध्या रा. बाबू गेनू चौक, शुक्रवार पेठ) अशी अटक केलल्यांची नावे आहेत. या प्रकरणी वनरक्षक सागर विलास होले (वय २६) यांनी तक्रार केली आहे. तुळशीबागेतील श्री राज लॉज समोर दोन व्यक्ती वन्य प्राण्यांचे कातडे घेऊन येणार असल्याची माहिती गुन्हे शाखेच्या दहशतवाद विरोधी पथकाला मिळाली. सापळा रचून पोलिसांनी आरोपींना ताब्यात घेतले. आरोपींकडून जप्त केलेल्या कातड्याची आंतरराष्ट्रीय बाजारात किंमत दोन लाख रुपये आहे. आरोपींनी हा मुद्देमाल कोठून आणला, कोणाला विक्री करणार होते, आदींचा तपास करण्यासाठी पोलिस कोठडी देण्याची विनंती सरकारी वकिलांनी कोर्टाला केली.
..
बलात्कारप्रकरणी कोठडी
शीतपेयातून गुंगीचे औषध देऊन विवाहित महिलेवर बलात्कार केल्याप्रकरणी हडपसर पोलिसांनी दोघांना अटक केली आहे. कोर्टाने त्यांना १९ ऑक्टोबर पर्यंत पोलिस कोठडीत ठेवण्याचा आदेश दिला.
सनी उर्फ नाना दिलीप पवार (वय ३३ रा. हडपसर), जयवंत दिलीप पवार (वय ३६ रा. हडपसर) अशी अटक केलेल्यांची नावे आहेत. या प्रकरणी २८ वर्षीय महिलेने तक्रार दिली आहे. प्रकरणातील आणखी दोन आरोपी सध्या फरारी आहेत. हडपसर भाजी मंडई ते मुंढवा रेल्वेलाइन परिसरात मे २०१६ मध्ये ही घटना घडली. पोलिसांनी दिलेल्या माहितीनुसार, पीडितेला आरोपींनी शीतपेयातून गुंगीचे औषध दिले. त्यानंतर मुंढवा ब्रिजखाली टेम्पो थांबूवन बलात्कार केला. इतर आरोपींनी महिलेची व्हिडिओ क्लीप तयार करून तिला जीवे मारण्याची धमकी दिली. या प्रकरणी महिलेने तक्रार दिल्यानंतर दोघांना अटक करण्यात आली.
मोबाइल अॅप डाउनलोड करा आणि राहा अपडेट