अकरा हजार ठिकाणी अंडी सापडली; अधिकाऱ्यांवर दबाव
म. टा. प्रतिनिधी, पुणे
शहरात सुमारे अकरा हजार ठिकाणी डासांची अंडी सापडूनही कारवाई अवघ्या ३४० ठिकाणीच झाल्याचे उघड आले आहे. डेंगी, चिकुनगुनियाचा शहरात उद्रेक वाढत असल्याने डासांची अंडी सापडतील त्या ठिकाणी कारवाई करण्याचे आदेश महापौर प्रशांत जगताप यांनी दिले आहेत. महापौरांनी आदेश देऊनही कारवाई होत नसल्याने आरोग्य विभागाच्या अधिकाऱ्यांवर नगरसेवकांचा दबाव असल्याचे स्पष्ट होत आहे.
ससून हॉस्पिटलच्या मुलांच्या वसतिगृहासह जिल्हाधिकारी कार्यालयातही डासांची अंडी सापडली. या प्रकरणी जिल्हाधिकारी कार्यालयाला दीड हजारांचा तर, ससून मुलांच्या वसतिगृहाला दोन हजार रुपयांचा दंड ठोठावण्यात आला. ‘शहरातील साडेचौदा लाख घरांची तपासणी करण्यात आली. त्यापैकी १०, ८१८ ठिकाणी डेंगी, चिकुनगुनियाच्या डासांची उत्पत्ती आढळून आली. डासांची सर्वाधिक उत्पत्ती कोंढवा-वानवडी या भागात झाल्याचे आढळून आले. हा भाग महापौरांचा म्हणून ओळखला जातो. या ठिकाणी अनुक्रमे २,९१७ आणि २,६६३ ठिकाणी डासांची अंडी आढळून आली. कोंढवा-वानवडीत २३ ठिकाणी कारवाई करून २९,४०० रुपयांचा तर, घोले रोड क्षेत्रीय कार्यालयातंर्गत २४ ठिकाणी कारवाई करून २२,९०० रुपयांचा दंड वसूल करण्यात आला. शहरातील बहुतांश भागांमध्ये डेंगी, चिकुनगुनियाच्या डासांची उत्पत्तीस्थाने आढळून आल्याचे आरोग्य विभागाचा अहवाल सांगतो. मात्र, त्यात तुलनेत कारवाई होत नसल्याचे उघडकीस आले आहे.
कारवाई न करण्यासाठी नगरसेवकांचा दबाव असल्याचे आरोग्य खात्यातील कर्मचाऱ्यांनी नाव प्रसिद्ध न करण्याच्या अटीवर सांगितले. कर्मचाऱ्यांच्या या दाव्याला वरिष्ठ अधिकाऱ्यांनी दुजोरा दिला नाही. मात्र, एकंदरीतच प्रकार पाहता डासांची उत्पत्ती अधिक आढळूनही संबंधित ठिकाणी कारवाई करण्यात कर्मचारी कचरत असल्याचे दिसून आले आहे.
..
क्षेत्रीय कार्यालय दूषित मिळकती दंडाची ठिकाणे दंड रक्कम
औंध .................. २८४ .................... १७......................... ४४,७००
घोले रोड ................... २६६३ .................. २४ ................. २२,९००
वारजे ...........................३६५ .................. ३२ ................. २३,२००
कोथरूड ................... ३९४ .................... ५ ...................... १०,०००
ढोले पाटील रोड ............... ९९८ ................... ४२ .................... ४७,१००
नगर रोड ........................ ८८१ ........................ ६४.................. ४५,४००
संगमवाडी ..................... २४३..................... १६......................... ३४,९००
टिळकरोड ...................... २९६ ................... २.......................१,५००
भवानी पेठ ...................... ३४४ ....................७ ...................... ९,७००
विश्रामबाग वाडा .................. ४४७................... ३८................... २६,५५०
बिबवेवाडी ....................... १०२...................... ३९ .....................३६,५००
सहकारनगर ......................... ३०५ ................. ७ .................. १३,७००
हड़पसर ............................२८२...................... १३ ..................... १०,१००
धनकवडी ....................... २९७ ...................... ११ ...................... १२,६००
कोंढवा - वानवडी .............. २९१७ .................... २३ ...................... २९,४००
……………………………………………………………………
एकूण ................................ १०, ८१८ .............. ३४० .................. ३,६८,२५०
...
घरगुती ठिकाणी दंड आकारण्यात येत नाही. मात्र, बांधकामांच्या ठिकाणी डासांची अंडी सापडल्यास मोठ्या प्रमाणात दंड आकारण्यात येतो. शहरात आठ बांधकामांच्या ठिकाणी कारवाई करण्यात आली आहे. अंडी सापडल्यानंतर दोनदा नोटीस बजावतो. त्यानंतरही पुन्हा अंडी आढळल्यास मात्र, दंड वसूल केला जातो.
डॉ. अंजली साबणे, सहायक आरोग्य प्रमुख
मोबाइल अॅप डाउनलोड करा आणि राहा अपडेट
