‘तिरस्काराला प्रेमाने उत्तर द्यायला हवे’

September 27, 2016, 2:30 pm

म. टा. प्रतिनिधी, पुणे
‘भूतकाळ विसरून भविष्यकाळ सुधारण्यासाठी सर्वांनी एकत्र येऊन करण्याची गरज आहे. तिरस्काराला तिरस्काराने नव्हे, तर प्रेमाने उत्तर दिल्यास नक्कीच जम्मू-काश्मीरमध्ये शांतता प्रस्थापित होईल,’ असे मत बीएसएफ असिस्टंट कमांडंट परीक्षेत देशात प्रथम क्रमांक पटकाविणाऱ्या जम्मू-काश्मीर येथील नबील वाणी याने मंगळवारी व्यक्त केले. धर्म, जात, भाषा व प्रांत याच्या चौकटीतून बाहेर पडून आपण सगळे भारतीय आहोत, असा विचार केल्यास अनेक प्रश्न सुटतील, असेही तो म्हणाला.

नबीलचा पुण्यात सत्कार करण्यात आला. या वेळी तो बोलत होता. लेफ्टनंट जनरल (निवृत्त) विनायक पाटणकर, आनंद आगरवाल, शैलेश पगारिया, शैलेश वाडेकर आदी या वेळी उपस्थित होते. ‘काश्मीरमधील तरुणाईला भेडसावणारे नोकरी व सुरक्षितता हे प्रश्न देशाच्या अन्य भागातील तरुणांनाही भेडसावतात. त्यामुळे काश्मीरी तरुणांनी नकारात्मक विचार न करता, सकारात्मक विचार करून ते प्रश्न कसे सोडविता येतील, याचा विचार करावा. त्यासाठी सरकार तुमच्याशी चर्चा करायला तयार आहे. तुमच्या हक्कांची पायमल्ली झाल्यास, त्यास विरोध करा, पण तो अहिंसक मार्गाने असावा. विरोधासाठी हातामध्ये दगड घेण्याची आवश्यकता नाही. त्याने प्रश्न सुटणार नाही. भूतकाळातील घटनांशी तुलना करून नुकसान करून घेण्यापेक्षा, प्रत्येकाने स्वतःमध्ये सकारात्मक बदल केले पाहिजेत,’ असे मत नाबीलने व्यक्त केले.

‘काश्मीरमधील पाच टक्के लोकांमुळे जम्मू-काश्मीरची बदनामी होत आहे. या लोकांकडे दुर्लक्ष केले पाहिजे. गेल्या काही महिन्यांपासून जम्मू-काश्मीरमधील परिस्थिती तणावाची आहे. त्यामुळे शाळा, कॉलेज बंद असून, विद्यार्थ्यांचे नुकसान होत आहे,’ अशी खंत नबीलने व्यक्त केली.

‘लोक विचार करतील’

‘माझी ‘बीएसएफ’मध्ये निवड झाली आहे. येत्या काळात माझ्यासारखेच आणखी काश्मिरी तरुण सैन्यात भरती झाले आणि तेच जम्मू-काश्मीरमध्ये संरक्षणासाठी तैनात असतील, तेव्हा सैन्यावर दगडफेक करताना येथील लोक विचार करतील,’ असे अपेक्षा नबीलने व्यक्त केली. माझ्यावर सोपविण्यात येणारी जबाबदारी जात, धर्म आणि प्रांत विसरून पार पाडणार आहे, असेही त्याने स्पष्ट केले.

Latest Images