पुण्यातील आंतरराष्ट्रीय विमानतळासाठी पुरंदर तालुक्यात पाहणी केलेल्या दोन जागांपैकी एका जागेला एअरपोर्ट अॅथॉरिटी ऑफ इंडियाच्या (एएआय) पथकाने प्राधान्य दिले आहे. येत्या आठवड्याभरात त्या जागेबाबतचा तांत्रिक अहवाल राज्य सरकारला सादर केला जाणार आहे. पुरंदर तालुक्यात पथकाने पाहणी केलेली जागा पडीक आहे. तसेच तेथे डोंगरदऱ्यांचा अडथळा नाही. महत्त्वाचे म्हणजे, आंतरराष्ट्रीय विमानतळासाठी लागणारी दोन हजार हेक्टर सलग जमीन एकाच ठिकाणी उपलब्ध आहे. त्यामुळे जागेचा प्रश्न मार्गी लागल्याचे सूत्रांनी सांगितले.
'एएआय'च्या पथकाने रविवारी पुरंदर तालुक्यातील राजेवाडी, वाघापूर, आंबडी, पिसर्वे, राजुरी, जेजुरी, सासवड या परिसरातील दोन जागांची अंतिम पाहणी केली. त्यापैकी एका जागेला या पथकाने पसंती दर्शविली आहे. 'एएआय'चे सात तज्ज्ञ, राज्याचे प्रधान सचिव श्यामलाल गोयल, महाराष्ट्र विमानतळ विकास कंपनीचे व्यवस्थापकीय संचालक विश्वास पाटील आणि पुण्याचे जिल्हाधिकारी सौरव राव या वेळी उपस्थित होते. राजगुरुनगर येथे पाहणी केलेल्या दोन ठिकाणी बाराशे हेक्टरपर्यंत जागा मिळविता आली आहे. त्यापेक्षा अधिक जागा मिळणे अशक्य असल्याचे जिल्हा प्रशासनाने पथकाला स्पष्ट केले होते. त्यानंतर 'एएआय'च्या पथकाने पुरंदरमधील राजेवाडी व वाघापूर येथील प्रस्तावित विमानतळाची जागा पाहिल्यानंतर या पथकाने त्यास पसंती दर्शविली होती. त्यामुळे पुरंदर तालुक्यातील जागा विमानतळासाठी निश्चित होईल, असे सांगण्यात येत होते. त्या पार्श्वभूमीवर पथकाने आज, रविवारी सकाळी पुन्हा पुरंदर तालुक्यातील जागांची अंतिम पाहणी केली. येत्या आठवड्याभरात या जागेसंदर्भातील तांत्रिक अहवाल ही समिती राज्य सरकारला सादर करणार आहे. त्यांनतर राज्य सरकारची मान्यता मिळाल्यानंतर पुढील प्रक्रिया सुरू करण्यात येणार आहे, असे सूत्रांकडून सांगण्यात आले.
मोबाइल अॅप डाउनलोड करा आणि राहा अपडेट
