पारंपरिक पद्धतीने मानाच्या बाप्पांची प्रतिष्ठापना
म. टा. प्रतिनिधी, पुणे
ढोलाच्या ठेक्याला ताशाची साथ मिळाल्याने झालेला गजर, त्यावर मनसोक्त थिरकणारी तरुणाई, श्रींच्या आगमनासाठी विविधरंगी फुलांनी सजवलेल्या रथातून निघालेली मिरवणूक आणि मानाच्या गणपतींचा दिमाखदार थाट पुणेकरांना सोमवारी अनुभवायला मिळाला.
शहराच्या मध्यवर्ती भागात असणाऱ्या मानाच्या गणपती मंडळांच्या भव्य मिरवणुकांनी उत्साह निर्माण करून खऱ्या अर्थाने उत्सवाचा दमदार श्रीगणेशा केला. पारंपरिक पद्धतीने मानाच्या गणपतींची प्राणप्रतिष्ठापना करण्यात आली. श्रीमंत दगडूशेठ हलवाई गणपतीची मिरवणूक यंदाही मुख्य आकर्षण ठरली. या मिरवणुकीमध्ये पाचहून अधिक पथकांनी सहभाग घेतला होता. सकाळी ८.३० वाजता दगडूशेठ मंदिरापासून मिरवणुकीला सुरुवात झाली. बुधवार चौक, अप्पा बळवंत चौक, नूमवि, टिळक पुतळा या मार्गाने मिरवणूक पुढे सरकत होती. बरोबर ११ वाजून ५५ मिनिटांनी 'श्रीं'ची इंदूरच्या त्रिपदी परिवाराचे डॉ. बाबासाहेब पराणेकर यांच्या हस्ते प्राणप्रतिष्ठा करण्यात आली. प्रभात आणि दरबार ब्रास बँडदेखील या मिरवणुकीत सहभागी होते. बाप्पाचे दर्शन घेण्यासाठी चौकाचौकात पुणेकरांनी गर्दी केली होती.
पुण्याचे ग्रामदैवत आणि मानाचा पहिला गणपती असलेल्या कसबा गणपतीची पारंपरिक पद्धतीने पालखीतून सकाळी साडेआठच्या सुमारास मिरवणूक सुरू झाली. कसबा गणपतीपासून हमाल वाडा, अप्पा बळवंत चौक, लोखंडे तालीम, लक्ष्मी रोड, कुंटे चौक, बुधवार चौक, जिजामाता बाग़ेतून उत्सवमंडप, असा मिरवणुकीचा मार्ग होता. श्रीराम आणि शिवतेज ढोल-ताशा पथकांनी वादन करून मिरवणुकीत रंगत भरली. परंपरेप्रमाणे प्रभात ब्रास बँड, देवळणकर बंधू यांचे सनई-चौघडा वादन मिरवणुकीमध्ये सहभागी होते. सकाळी ११ वाजून २० मिनिटांनी प्रसाद प्रभुणे यांच्या हस्ते 'श्रीं'च्या मूर्तीची प्रतिष्ठापना करण्यात आली. मानाचा दुसरा गणपती तांबडी जोगेश्वरी मंडळाची सकाळी १० वाजण्याच्या सुमारास मंदार लॉज येथून वाजतगाजत मिरवणूक निघाली. शिवमुद्रा पथकाच्या उस्फूर्त वादनाने मिरवणुकीत रंगत आणली. सतीश आढाव यांचे नगारावादन, बाळासाहेब आढाव यांचा न्यू गंधर्व ब्रास बँड मिरवणुकीत सहभागी झाले होते. लोखंडे तालीम, कुंटे चौक, लक्ष्मी रस्ता, गणपती चौक, जोगेश्वरी मंदिर या मार्गाने मिरवणूक उत्सव मंडपात दाखल झाली. दुपारी दीडच्या सुमारास बांधकाम व्यावसायिक मकरंद केळकर आणि अपर्णा केळकर यांच्या हस्ते श्रींची प्राणप्रतिष्ठा करण्यात आली.
गुरुजी तालीम मंडळाची मिरवणूक सकाळी ११.३० वाजता सुरू झाली. जयंत नगरकर यांच्या नागरावादनाने वातावरणात रंग भरला, शितळादेवी मंदिर, गणपती चौक, लक्ष्मीरस्ता, नगरकर तालीम, अप्पा बळवंत चौक, जोगेश्वरी मंदिर, सिटी पोस्ट या मार्गाने मिरवणूक मंडपात आली. दरवर्षीप्रमाणे यंदाही आकर्षक फुलांची सजावट रथाला करण्यात आली होती. नादब्रह्म, शिवगर्जना, गुरुजी प्रतिष्ठान ही ढोल-ताशा पथके मिरवणुकीत सहभागी होती. दुपारी २ वाजून ५ पाच मिनिटांच्या मुहुर्तावर मणिलाल गडा यांच्या हस्ते मूर्तीची प्राणप्रतिष्ठा करण्यात आली. मानाचा चौथा गणपती तुळशीबाग गणेशोत्सव मंडळाच्या मिरवणुकीला सकाळी ९.३० वाजता गणपती चौकातून सुरुवात झाली. गणपती चौक, नगरकर तालीम, अप्पा बळवंत चौक, मजूर अड्डा, सिटी पोस्ट, गणपती चौक या मार्गाने मिरवणूक मंडपात दाखल झाली. गजलक्ष्मी ढोल-ताशा पथकाने मिरवणुकीत आपली कला सादर केली. दुपारी एकच्या सुमारास मंडळाचे अध्यक्ष विवेक खटावकर यांच्या हस्ते मूर्तीची प्राणप्रतिष्ठापना करण्यात आली.
मानाचा पाचवा गणपती केसरीवाडा मंडळाची रमणबाग चौकातून मिरवणूक निघाली. श्रीराम पथकाने लयबद्ध वादन करून उत्साह भरला. दुपारी १२ वाजता डॉ. दीपक टिळक, डॉ. रोहित टिळक, प्रणती टिळक यांच्या हस्ते श्रींच्या मूर्तीची प्राणप्रतिष्ठापना करण्यात आली. शारदागजाननाची मनमोहक मूर्ती असलेल्या अखिल मंडई मंडळाने फुलांनी सजवलेल्या रथात श्रींच्या मूर्तींची मिरवणूक काढली. श्रींच्या मुकूटावर घातलेली बाजीराव पगडी भाविकांचे लक्षवेधून घेत होती. उत्सव मंडपातून मंडई पोलिस चौकी, रामेश्वर चौक, गोटीराम भय्या चौक, झुणका भाकर केंद्र, बुरूड गल्ली असा मिरवणुकीचा मार्ग होता. मोरया, मृत्यूंजय, जल्लोष, नूमवि आदी पथके सहभागी झाली होती. १२.१५ वाजता स. प. महाविद्यालयाचे प्राचार्य दिलीप शेठ यांच्या हस्ते प्राणप्रतिष्ठा करण्यात आली.
यंदा शतकोत्तर रौप्य महोत्सवी वर्ष साजरे करणाऱ्या श्रीमंत भाऊसाहेब रंगारी गणपतीची मिरवणूक गणपती भवनापासून सुरू झाली. अप्पा बळवंत चौक, उत्सव मंडप या मार्गाने मिरवणूक काढण्यात आली. सव्वाशे वर्षानिमित्त यंदा प्रथमच मिरवणुकीत भाऊसाहेब रंगारी यांचा पालखी रथ समाविष्ट करण्यात आला होता. अब्दागिरी, छत्रछामर, घोडे, उंट अशा लवाजम्यासह शंभूगर्जना, ताल आणि वाद्यवृंद अशी पथके मिरवणूकीत सहभागी झाली होती. सकाळी ११ वाजता माजी उपमुख्यमंत्री अजित पवार यांच्या हस्ते श्रींच्या मूर्तीची प्राणप्रतिष्ठा करण्यात आली.
मोबाइल अॅप डाउनलोड करा आणि राहा अपडेट
