म. टा. प्रतिनिधी, पुणे
इतिहासाची साक्ष असणाऱ्या ऐतिहासिक लाल महालाच्या प्रवेशद्वारामध्ये बदल करण्यात येणार असून, शिवाजी रस्त्यालगत नवीन प्रवेशद्वार उभारण्यात येणार आहे. लाल महालाकडे जाण्यासाठी सध्याचा रस्ता अरुंद असल्याने होणारी वाहतुकीची कोंडी सोडविण्यासाठी हा निर्णय घेण्यात आला आहे. महापालिकेच्या भवन रचना विभागाने हा प्रस्ताव मांडला होता.
शिवाजी रस्त्यावरून कसबा गणपती मंदिराकडे जाणाऱ्या रस्त्यावर सध्या लाल महालाचे प्रवेशद्वार आहे. हा रस्ता अरुंद असल्याने वास्तूला भेट देण्यासाठी आलेल्या पर्यटकांना वाहतूक कोंडीचा त्रास सहन करावा लागतो. हा त्रास कमी करण्यासाठी सध्या असलेल्या प्रवेशद्वारात बदल करण्याचा निर्णय पालिकेने घेतला आहे. महापालिकेच्या वतीने लाल महालाचे नूतनीकरण आणि सुशोभिकरण करण्यात येत आहे. त्यासाठी दीड कोटी रुपये खर्चण्यात येणा आहेत. या रकमेतून लाल महालाची डागडुजी केली जाणार आहे. नूतनीकरणामध्ये लाल महालाच्या छतावर विविध किल्ल्यांच्या प्रतिकृती आणि त्यांची सविस्तर माहिती पर्यटकांसाठी उपलब्ध करून दिली जाणार आहे. त्यामध्ये शिवाजी महाराजांचे तैलचित्र आणि छायाचित्रांचाही समावेश आहे.
लाल महालाची ऐतिहासिक माहिती सर्वांना समजावी, त्याची अधिकाधिक प्रसिद्धी व्हावी यासाठी पालिकेने विविध उपक्रम हाती घेतले आहेत. या वास्तूला भेट देण्यासाठी आलेल्या पर्यटकांना अगदी सहजपणे प्रवेश करता यावा, यासाठी सध्या असलेले प्रवेशद्वार बंद करून नवीन प्रवेशद्वार उभारले जाणार आहे. नव्याने उभारले जाणारे प्रवेशद्वार शिवाजी रस्त्याच्या बाजूने असेल. पूर्व-पश्चिम दिशेने नवे प्रवेशद्वार असल्याचे पालिकेच्या हेरिटेज विभागाचे प्रमुख श्याम ढवळे यांनी सांगितले. या सुशोभिकरणाच्या कामामध्ये लाल महालातील पहिल्या मजल्यावरील प्रदर्शनात नव्याने काही दुर्मिळ छायाचित्रे मांडण्यात येणार आहेत. तसेच, महालाची सुरक्षितता आणि अन्य महत्त्वाची कामे करण्याचेही नियोजन करण्यात आले आहे. सोमवारी झालेल्या पक्षनेत्यांच्या बैठकीत पालिका प्रशासनाने मांडलेल्या या प्रस्तावाला मान्यता देण्यात आली.
..
लाल महालाला ऐतिहासिक वारसा लाभला आहे. या वास्तूचे सध्याचे प्रवेशद्वार दक्षिणोत्तर आहे. अरुंद रस्त्यावर जुने प्रवेशद्वार असल्याने पर्यटकांना ये-जा करताना त्रास होतो. पर्यटकांच्या सोयीसाठी आता शिवाजी रस्त्यावर पूर्व-पश्चिम असे नवीन प्रवेशद्वार उभारले जाईल.
श्याम ढवळे, हेरिटेज विभाग प्रमुख, पुणे महापालिका
मोबाइल अॅप डाउनलोड करा आणि राहा अपडेट
