म. टा. प्रतिनिधी, पुणे
येत्या वर्षात गुन्हेगारांना शिक्षा होण्याचे प्रमाण ६५ टक्क्यांपर्यंत पोहोचवण्याचे लक्ष्य पोलिसांसमोर ठेवण्यात आले असल्याची माहिती राज्याचे अप्पर मुख्य सचिव (गृह) के. पी. बक्षी यांनी दिली. बक्षी यांनी पुणे पोलिस आयुक्तालय, राज्य गुन्हे अन्वेषण विभागात (सीयआयडी) बैठक घेत महत्त्वाचे प्रश्न, गुन्हे या विषयी सोमवारी आढावा घेतला.
६५ टक्क्यांचे टार्गेट
० गुन्हेगारांना शिक्षा होण्याचे प्रमाण वाढले पाहिजे, यासाठी मुख्यमंत्री देवेंद्र फडणवीस यांनी पोलिसांना टार्गेट दिले होते. या मार्चअखेर हे प्रमाण ३५ टक्के असणे अपेक्षित होते.
० पोलिस विभागाने केलेल्या चांगल्या कामामुळे मार्च अखेर हे प्रमाण ४८ टक्के इतके आहे, तर गेल्या दोन महिन्यांत त्यात वाढ झाली आहे.
० जून अखेर ते ५४ टक्क्यांपर्यंत पोहोचले आहे. या वर्षांसाठी आम्ही आणखी लक्ष्य ठेवले असून मार्च-२०१७ अखेर हे प्रमाण ६५ टक्क्यांपर्यंत पोहोचण्यासाठी प्रयत्न करण्यात येत आहे, अशी अपेक्षा बक्षी यांनी व्यक्त केली....
'सीआयडी'मध्ये महत्त्वाच्या गुन्ह्यांवर चर्चा
० भंडारा येथील धान्य घोटाळा, अण्णा भाऊ साठे महामंडळातील घोटाळा, तुळजापूर मंदिर तसेच महालक्ष्मी मंदिरांच्या आर्थिक व्यवहारांची चौकशी 'सीआयडी'मार्फत सुरू आहे. या गुन्ह्यांचा तपासाबाबत गृह विभागाचे अप्पर मुख्य सचिव के. पी. बक्षी यांनी 'सीआयडी'च्या पाषाण येथील कार्यालयात आढावा घेतला.
० 'भंडारा धान्य घोटाळ्याचा तपास पूर्ण झाला आहे. पोलिसांना नव्याने पुरावे मिळाले असल्याने आरोपींचा जामीन रद्द करण्यासाठी सुप्रीम कोर्टात धाव घेतली होती. कोर्टाने नवीन पुरावे सत्र न्यायालयासमोर सादर करावेत, असे आदेश सुप्रीम कोर्टाने दिले आहेत. त्यामुळे येत्या १५ सष्टेंबरपर्यंत कोर्टासमोर पुरावे सादर करण्यात येतील.'
० अण्णा भाऊ साठे महामंडळ घोटाळाप्रकरणी ७० टक्के तपास पूर्ण झाला आहे. राहिलेला तपास लवकरच पूर्ण करून चार्जशीट दाखल करण्यात येईल. मंदिरांच्या आर्थिक व्यवहारांची चौकशी अंतिम टप्प्यात असून, लवकरच त्याचा अहवाल सरकारला सादर करण्यात येईल.
...
पोलिस हाउसिंगसाठी विशेष प्रयत्न
० मुख्यमंत्री फडणवीस यांनी पोलिसांसाठी एक लाख घरे बांधण्याचे जाहीर केले असून, त्या दृष्टीने पावले उचलण्यात येत आहेत.
० पुण्यात लोहगाव येथे पोलिसांसाठी पाच हजार घरे बांधण्यात येत आहेत. संबंधितांकडून सरकारी मदतीची अपेक्षा व्यक्त केली आहे. मुंबईत पुढील काही दिवसांत याबाबत बैठक आयोजित केली जाईल.
० पुणे शहरातील स्वारगेट, औंध, शिवाजीनगर येथील पोलिस वसाहतींची पाहणी केली आहे. शहरातील आणखी काही जागांची पाहणी केली असून तेथे काही कार्यालये सुरू करता येतील का, याबाबत विचार सुरू असल्याचे बक्षी यांनी सांगितले.
...
'सीसीटीव्ही'चे कामकाज चांगले
० पुणे शहरात १२००पेक्षा अधिक कॅमेरे आहेत. त्यातील ९५ टक्के कॅमरे चालू असेल, तर काम समाधानकारक आहे.
० 'एडीएसएल' कंपनीमुळे दीड टक्के कॅमेरे बंद आहेत. तर 'बीएसएनएल'ने खोदकाम केल्यामुळे काही कॅमेरे बंद आहेत. या दोन्ही कारणांमुळे ३९ कॅमेरे बंद असून, हे प्रमाण तीन-साडेतीन टक्के आहे.
० पुण्यातील 'सीसीटीव्ही' चांगल्या रीतीने सुरू असल्याचे दिसले आहे, असे बक्षी यांनी स्पष्ट केले. गणपतीत विसर्जन मार्गावर 'सीसीटीव्ही' बसवण्यास सांगण्यात आले आहे.
...
पिंपरी-चिंचवड आयुक्तालयासाठी जोरदार मागणी
पिंपरी-चिंचवडसाठी स्वतंत्र पोलिस आयुक्तालय सुरू करावे, यासाठी जोरदार मागणी होत आहे. मात्र, त्याबाबतचा कुठलाही प्रस्ताव माझ्यासमोर आलेला नाही. या मागणीला पूरक असे कागदी स्वरूप आलेले नाही. माझ्याकडे प्रस्ताव आल्यानंतर त्याबाबत मी बोलेन, असे त्यांनी सांगितले.
मोबाइल अॅप डाउनलोड करा आणि राहा अपडेट