गुरूवार पेठेतील गवरी आळी मंडळाच्या कार्यकर्त्यानी वर्गणीसाठी एकाला लाथाबुक्क्यांनी जबर मारहाण केल्याची घटना रविवारी दुपारी घडली. या प्रकरणी मंडळाच्या चार कार्यकर्त्यांवर खडक पोलिसांनी खंडणीचा गुन्हा दाखल केला असून दोघांना अटक करण्यात आली आहे.
सचिन प्रकाश मायणे (वय ३८, रा. मार्केट यार्ड) आणि बाळासाहेब जगन्नाथ मायणे (वय ५४, रा. गुरुवार पेठ) अशी अटक केलेल्या दोघांची नावे आहेत. तर, इतरांचा शोध सुरू आहे. याबाबत विशाल सुरेंद्र नवगिरे (वय ३५, रा. गवरीआळी, गुरुवार पेठ) यांनी तक्रार दिली आहे. पोलिसांनी दिलेल्या माहितीनुसार, मायणे आणि त्याचे साथीदार रविवारी दुपारी गुरुवार पेठेत गणेशोत्सवासाठी वर्गणी मागत होते. नवगिरे यांच्या घरापुढे बसलेल्या दोन भाजीविक्रेत्या महिलांकडे त्यांनी प्रत्येकी दोन हजार रुपये वर्गणी मागितली. त्या वेळी मध्यस्थी करत नवगिरे यांनी 'या महिला गरीब आहेत, त्यांच्याकडे इतकी कशाला वर्गणी मागता', असे विचारले. त्यावरून मायणे याच्यासह चौघांनी नवगिरे यांना जबर मारहाण केली. एवढ्यावरच न थांबता त्यांनी भाजीविक्रेत्या महिलांकडील वजनकाटे आणि भाजी रस्त्यावर फेकून दिली. या प्रकाराबाबत नवगिरे हे पोलिसांकडे तक्रार करायला निघाले असता पुन्हा त्यांना शिवीगाळ करून ठार मारण्याची धमकी दिली, असे पोलिसांनी सांगितले. या प्रकारानंतर दोघांना अटक करण्यात आली आहे. याप्रकरणी उपनिरीक्षक एस. पी. देवकर हे अधिक तपास करत आहेत.
मोबाइल अॅप डाउनलोड करा आणि राहा अपडेट
