दारिद्र्य रेषेखालील वर्गाला धर्मादाय खासगी हॉस्पिटलमध्ये देण्यात आलेल्या उपचारासाठी एका वर्षांत सुमारे ५४ कोटी ५२ लाख ४१ हजार १८३ रुपयांचा निधी खर्च करण्यात आला. एकूण उत्पन्नाच्या दोन टक्के रकमेपेक्षा खर्च केलेला निधी अधिक असल्याने एका वर्षात एक लाख एक हजार ३०५ पेशंटना मोफत उपचार देण्यात आले.
उच्च न्यायालयाच्या आदेशानुसार राज्यातील सर्व धर्मादाय खासगी हॉस्पिटलमध्ये एकूण उत्पन्नाच्या दोन टक्के रक्कम गरिबांसाठी राखीव ठेवणे बंधनकारक आहे. त्यानुसार शहरासह पुणे जिल्ह्यातील सुमारे ५९ हॉस्पिटलची नोंदणी धर्मादाय हॉस्पिटलच्या योजनेंतर्गत करण्यात आली आहे. प्रत्येक हॉस्पिटलने एकूण उत्पन्नाच्या दोन टक्के रक्कम ही 'आयपीएफ' निधी म्हणून राखीव ठेवणे अपेक्षित आहे. त्यानुसार जून २०१५ ते जून २०१६ या एका वर्षाच्या हॉस्पिटलमधील योजनेच्या कामगिरीचा आढावा धर्मादाय सहआयुक्त शिवाजीराव कचरे यांनी घेतला. त्यात अनेक हॉस्पिटलनी स्वतःच्या निधीपेक्षा अधिक रक्कम खर्च केल्याचे निदर्शनास आले, तर काही हॉस्पिटलनी निधीपेक्षा कमी रक्कम गरिबांसाठी खर्च केल्याचे दिसून आले.
'प्रत्येक धर्मादाय खासगी हॉस्पिटलना उत्पन्नाच्या दोन टक्के रक्कम गरिबांसाठी खर्च करण्याच्या सूचना देण्यात आल्या आहेत. दर महिन्याला हॉस्पिटलच्या निधीचा खर्चासह विविध तक्रारींचा आढावा घेण्यात येतो. दोन टक्के रक्कम म्हणून ५९ हॉस्पिटलमधून ४६ कोटी ४१ लाख ३५ हजार १५७ रुपयांचा निधी उपलब्ध झाला होता. मात्र प्रत्यक्षात या हॉस्पिटलमधून ५४ कोटी ५२ लाख ४१ हजार १८३ रुपयांचा निधी खर्च करण्यात आला आहे,' अशी माहिती खासगी धर्मादाय हॉस्पिटलच्या देखरेख समितीचे सहायक धर्मादाय आयुक्त नवनाथ जगताप यांनी 'मटा'ला दिली.
अनेकदा खासगी हॉस्पिटलकडून पेशंटच्या उत्पन्नाच्या रकमेत तफावत असल्याचे हॉस्पिटलला दिसून येते. त्यामुळे हॉस्पिटलकडून चौकशी करून पेशंटना मोफत उपचार नाकारले जातात; परंतु हॉस्पिटलच्या या भूमिकेबाबत पेशंटकडून तक्रारी करण्यात येतात. हॉस्पिटलकडून पात्र व्यक्तींनाच मोफत उपचार मिळावेत, अशी भूमिका आहे; परंतु उपलब्ध निधीपेक्षा अतिरिक्त खर्च केल्याने त्यांच्या कामगिरीची दखल घेणे भाग आहे, असेही धर्मादाय सहायक आयुक्त जगताप यांनी सांगितले.
...............
चौकट
हॉस्पिटलचे नाव ................... दोन टक्के रक्कम ................ खर्च केलेली रक्कम
रुबी हॉल क्लिनिक .........................८,८७,०२,०३४ .................. १२,०७,१७,७१९
दीनानाथ मंगेशकर हॉस्पिटल ..............६,३६,५५,१८९..................... ७३४३७४५९६
जहांगीर हॉस्पिटल ..................... ३,५५,४५,०७४ ................. ४,८७,७७,८८४
केईएम हॉस्पिटल ................... २,०९८४३६९ ....................... ३,२७,२६,३५६
पूना हॉस्पिटल ................. ........ २,०४,७०,१९३ .................. ३,०३,७५,९४६
भारती हॉस्पिटल ........................ ७४,०७,६२१ ......................... ९४, ९४,२१६
एनएम वाडिया कॉर्डिऑलॉजी ................. ६६,२३,२०२ .................... ७, ७७.२१८
नॅशनल इन्स्टिट्यूट ऑफ ऑप्थोमोलॉजी ...... ४९८९७८० .............. ६४,३७,७५०
इनामदार हॉस्पिटल .......... ..............१,०६,५८,४४३ .................... ९५,५५,९२४
........
शहरातील सर्वाधिक रक्कम खर्च करणाऱ्या हॉस्पिटलमध्ये रुबी हॉल क्लिनिकचा अव्वल क्रमांक लागतो. हॉस्पिटलकडे आठ कोटी ८७ लाख दोन हजार ३४ रुपयांची रक्कम राखीव होती. प्रत्यक्षात १२ कोटी ७ लाख १७ हजार ७१९ रुपयांचा निधी खर्च केला आहे. काही हॉस्पिटलनेदेखील अतिरिक्त निधी खर्च केला आहे. एका वर्षात एक लाख एक हजार ३०५ पेशंटना खासगी हॉस्पिटलमध्ये मोफत उपचार देण्यात आले.
- नवनाथ जगताप, सहायक आयुक्त, धर्मादाय आयुक्तालय
मोबाइल अॅप डाउनलोड करा आणि राहा अपडेट
