म. टा. प्रतिनिधी, पुणे
'मटा हेल्पलाइन' या उपक्रमांतर्गत मदत मिळालेल्या १५ विद्यार्थ्यांना आज, रविवारी (७ ऑगस्ट) चेक प्रदान करण्याचा कार्यक्रम होत आहे. त्या निमित्ताने, याआधी या उपक्रमांतर्गत मदत मिळालेल्या विद्यार्थ्यांनी मांडलेल्या भावनांचे हे प्रातिनिधिक शब्दरूप...
.........
'मटा हेल्पलाइन' या उपक्रमाचे यंदाचे सहावे वर्ष. गुणवंत विद्यार्थ्यांचे उच्च शिक्षण केवळ आर्थिक समस्यांमुळे अडू नये, या उद्देशाने सुरू करण्यात आलेल्या या उपक्रमांतर्गत पुण्यामध्ये गेल्या पाच वर्षांत ३६ गुणवंत विद्यार्थ्यांना भरघोस मदत मिळाली. यंदा 'मटा हेल्पलाइन'द्वारे १५ विद्यार्थ्यांच्या पंखांना बळ दिले जात आहे. केवळ वाचकांच्या प्रतिसादावर चालणारा हा एक अनोखा उपक्रम. आर्थिक अडचणींवर जिद्दीने मात करून दहावीच्या परीक्षेत ९० टक्क्यांहून अधिक मार्क मिळविणाऱ्या गुणवंत विद्यार्थ्यांचे उच्च शिक्षण पैशांअभावी अडू नये, याकरिता 'महाराष्ट्र टाइम्स'तर्फे हा उपक्रम सुरू झाला. प्रतिकूलतेच्या पाषाणावर पाय रोवून उमललेली जिद्दीची रोपे आणि त्याला सलाम करत, आणखी बहरण्यासाठी बळ देणारे दानतीचे अनेक अनाम हात, हेच चित्र गेली पाच वर्षे अनुभवास येते आहे. यंदाही अशाच अनेक अनाम हातांनी 'मटा हेल्पलाइन'च्या १५ शिलेदारांना उत्स्फूर्तपणे मदत देऊन त्यांच्या पाठीवर कौतुकाची थाप दिली आहे.
एकीकडे 'समाजात संवेदनशीलता राहिली आहे का,' असा प्रश्न उपस्थित व्हावा, अशा काही घटना घडतात, हे वास्तव आहेच; पण चांगल्या कामासाठी भरभरून पाठिंबा देण्याची वृत्तीही समाजात आहे, याची खात्रीच या उपक्रमाच्या निमित्ताने पटते, असे म्हटल्यास वावगे ठरणार नाही. कर्तृत्ववान विद्यार्थ्यांची यशोगाथा 'मटा'मध्ये प्रसिद्ध झाल्यानंतर मदतीचा ओघ सुरू होतो, तो अगदी या मुलांना चेक प्रदान करण्याच्या कार्यक्रमापर्यंत कायम राहतो, असा गेल्या पाच वर्षांतील अनुभव आहे. यंदाचा अनुभवही असाच होता. दहा रुपयांपासून काही हजार रुपयांपर्यंत मदत करणारे वाचक आहेत; पण यामध्ये किती पैसे दिले यापेक्षाही चांगल्या कामाला मनापासून मदत करण्याची वाचकांची तळमळ महत्त्वाची आहे. कधी लहान मुले येऊन आपल्याला मिळालेले खाऊचे पैसे 'हेल्पलाइन'साठी देतात, तर कधी कोणी आजी-आजोबा मिळालेल्या पेन्शनचा वाटा या कामासाठी देऊ करतात. आणि हे सर्व करणे असतेही एकदम निरपेक्ष. खऱ्या अर्थाने ही कर्तृत्वाला मिळणारी दातृत्वाची साथ असते.
'शिक्षणाची आस आहे, गुणवत्तेची कास आहे आणि सर्वोत्तमाचा ध्यास आहे,' अशी भावना असलेले अनेक विद्यार्थी समाजात आहेत. अशा गुणवंतांचे शिक्षण केवळ आर्थिक समस्येमुळे अडू नये, यासाठी 'मटा हेल्पलाइन'च्या माध्यमातून, 'बळ हवे पंखांना' अशी साद घातली जाते आणि त्याला तितकाच उत्स्फूर्त प्रतिसाद मिळतो.
गेल्या पाच वर्षांत ही मदत मिळालेल्या विद्यार्थ्यांमध्येही आपल्याला मिळालेल्या मदतीबाबत कृतज्ञ भाव आहे, हेही महत्त्वाचेच. आपल्याला मिळालेली मदत आपल्या शिक्षणासाठी आहे, याचे भान थोडेही सुटू न देणे, हे या मुलांचे वय पाहता, खरोखरच कौतुकास्पद आहे. आपल्यावर असलेल्या जबाबदारीची त्यांना उत्तम जाणीव आहे. त्यामुळेच गेल्या चार वर्षांत ज्या विद्यार्थ्यांना 'मटा हेल्पलाइन'च्या माध्यमातून मदत मिळाली आहे, ते पुढील शिक्षणातही उत्तम कामगिरी करत आहेत. रिझल्ट लागल्यावर तो सांगण्यासाठी त्यांचे पाय आपोआपच 'मटा'च्या कार्यालयाकडे वळतात, हे आश्वासक आहे. त्यांचे ध्येय गाठण्यासाठी तर ते प्रयत्न करतच आहेत; पण देणाऱ्याचे 'हात' घेण्याची शपथही त्यांनी घेतली आहे, हे त्याहूनही महत्त्वाचे आहे...
---
'सीए होण्याचे स्वप्न पूर्ण करणार'
...
(अनुजा नांदे : २०१४ )
..
उराशी सीए होण्याचे स्वप्न बाळगलेल्या अनुजाला दोन वर्षांपूर्वी आपल्याला शिक्षणासाठी कुठून पैसा मिळणार याची काळजी होती. मात्र, 'मटा हेल्पलाइन'मुळे भक्कम आधार मिळाला. अनुजा आणि तिचे कुटुंबीय हडपसर येथील एका चाळीत छोट्या घरात राहतात. तिचे वडील रिक्षा चालविण्याचे काम करतात. चाळीतल्या गोंधळातही तिने चांगला अभ्यास करून उत्तम मार्क मिळविले. 'पुढील शिक्षणाची चिंता होती; पण 'मटा हेल्पलाइन'द्वारे मिळालेल्या रकमेतून तिच्या पुढील शिक्षणाची सर्व काळजी मिटली,' अशी प्रतिक्रिया अनुजाच्या आईने दिली. अनुजाला बारावी कॉमर्सला ८५ टक्के मार्क मिळाले आहेत. तिने 'सीपीटी'ची परीक्षाही दिली असून, त्यात तिला १६५ मार्क मिळाले आहेत. अनुजाला सीए व्हायचे असून, तिने त्यासाठी आवश्यक क्लास लावले आहेत.
---
'ध्येयाच्या दिशेने वाटचाल सुरू'
..
(सुप्रिया आगम : २०१२)
..
'मटा हेल्पलाइन'ची मदत नसती, तर आयुष्य खूप वेगळे असू शकले असते; पण स्वप्नांना बळ मिळाले आणि आज मी ठरवलेल्या ध्येयाच्या दिशेने वाटचाल करते आहे. असा पाठिंबा मिळायला नशीब असावे लागते. म्हणूनच खूप अभ्यास करा आणि यशस्वी व्हा, असेच मी यंदा 'मटा हेल्पलाइन'ची मदत मिळालेल्या शिलेदारांना सांगेन...' हे शब्द आहेत सुप्रिया आगमचे. मुंढव्यातल्या छोट्याश्या खोलीतले वास्तव्य, भाजीच्या गाडीवर चालणारे घर अशा परिस्थितीतही अभ्यास आणि स्वप्नांचा पाठपुरावा करण्यात तिने कुठलीही कसर ठेवली नाही. तिच्या या स्वप्नांना तिचे पालक आणि 'मटा हेल्पलाइन'चा भक्कम आधार मिळाला. आज सुप्रिया कमिन्स कॉलेजमध्ये इलेक्ट्रॉनिक्स अँड टेलिकम्युनिकेशन इंजिनीअरिंगच्या तिसऱ्या वर्षात शिकते आहे. सन २०१२ मध्ये दहावीला तिने ९२.७३ टक्के गुण मिळवले होते. तिला इंजिनीअरिंगच्या सगळ्या सेमिस्टरना डिस्टिंक्शन मिळाले आहे. 'घरी मला अभ्यासाशिवाय कोणतेही काम सांगितले जात नाही. मी क्लास न लावता माझ्या पद्धतीने अभ्यास करते आहे. वडील आता घोरपडीत पूना सिक्युरिटीमध्ये काम करताहेत. बहीण तन्वीनेही दहावीला ९२ टक्के मार्क मिळवले. ती बीएमसीसीत शिकते आहे आणि तिला सीए करायचे आहे,' असे सुप्रिया सांगते.
---
'इंजिनीअर बनण्याच्या दिशेने मार्गस्थ'
..
(अंकिता ठोंबरे : २०१३)
..
घरची परिस्थिती बेताची असतानाही अहोरात्र अभ्यास करून अंकिता ठोंबरे या विद्यार्थिनीने दहावीत ९६.३६ टक्के गुण मिळवले. लहानपणापासून पहिल्या नंबरात येणारी अंकिता आज इंजिनीअर होण्याच्या दिशेने वाटचाल करीत आहे. तिने इंजिनीअरच्या प्रथम वर्षातही ९६ टक्के गुण मिळविले आहेत. कोथरूड येथील जयभवानीनगर येथे लहानशा घरात राहणाऱ्या अंकिताने रात्रंदिवस अभ्यास करून ९६.३६ टक्के गुण मिळविले. परिस्थितीमुळे आपण पुढील शिक्षण कसे घेणार, याची तिला सतत चिंता वाटायची. त्यामुळे ९६ टक्के गुण मिळवूनही तिने कॉमर्सला जाण्याचा निर्णय घेतला होता; परंतु 'मटा'ने दिलेल्या मदतीमुळे आज ती तिचे स्वप्न प्रत्यक्षात साकारत आहे. अंकिताने गरवारे कॉलेजमधून सायन्समधून अकरावी-बारावी पूर्ण केले. बारावीला तिने ८० टक्के गुण मिळविले. सध्या ती काशीबाई नवले इंजिनीअर कॉलेजमध्ये दुसऱ्या वर्षात शिकत असून, तिच्या यशाची घौडदोड सुरू तितक्याच वेगाने सुरू आहे. तिने प्रथम वर्षातही ९६ टक्के गुण मिळवले.
---
'स्वप्न वास्तवात येणार आहे'
...
(रेवती जगताप : २०१४)
...
अत्यंत हालाखीच्या परिस्थितीतही रेवती जगताप या विद्यार्थिनीने इयत्ता दहावीच्या परीक्षेत ९१.४० टक्के गुण मिळवले. आर्थिक परिस्थिती बेताची असल्याने आपले शिक्षण घेण्याचे स्वप्न अर्धवट राहील की काय, याची तिला कायम भीती होती. ती भीती 'मटा'च्या माध्यमातून मिळालेल्या मदतीमुळे दूर झाली आहे. रेवतीचे इंजिनीअर होण्याचे स्वप्न पूर्ण होण्याच्या मार्गावर आहे. रेवती आज हडपसरला जेएसपीएम संस्थेच्या की स्टोन कॉलेजमध्ये कम्प्युटर इंजिनीअरिंगच्या पहिल्या वर्षात गेली आहे. बारावीत तिने ७५ टक्के गुण मिळविले. रेवतीच्या आईच्या कमाईवर तिचे घर अवलंबून आहे. ऐन दहावीच्या परीक्षेत रेवतीच्या आर्इचा अपघात झाला. त्यात आर्इचा पाय फ्रॅक्चर झाला. अशा वेळी रेवतीने घर सांभाळून अभ्यास केला होता.
---
'बारावीतही चांगले मार्क मिळवेनच'
..
(अंजली हिवरे : २०१५)
..
घरची परिस्थिती अत्यंत हलाखीची असतानाही दहावीत ९१.२० टक्के गुण मिळवून इंजिनीअर होण्याचे स्वप्न उराशी बाळगून असलेली अंजली हिवरे ही त्या दिशेने पावले टाकत आहे. 'मटा हेल्पलाइन'च्या माध्यमातून पुणेकरांनी केलेल्या मदतीमुळे तिची वाटचाल सुकर होत आहे. औंधमधील डॉ. बाबासाहेब आंबेडकर वसाहतीत दहा बाय दहाच्या खोलीत राहणाऱ्या अंजलीची चिंता तिला 'मटा हेल्पलाइन'च्या माध्यमातून मिळालेल्या मदतीमुळे दूर झाली. आता ती मराठवाडा मित्रमंडळाच्या कॉलेज ऑफ सायन्समध्ये बारावीत शिकत असून, तिने अकरावीत ८१ टक्के गुण मिळवले आहेत. बारावीत चांगले मार्क मिळण्यासाठी ती कॉलेज सांभाळून दिवसातून चार-पाच तास अभ्यास करीत आहे. हा अभ्यास करतानाच तिने 'सीईटी' आणि 'जेईई'चा अभ्यास करण्याचे नियोजन केले आहे.
---
'आहे आयआयटीचा ध्यास'
..
(निकिता रेणुसे : २०१५)
..
आंबेगाव पठार येथील चाळीतील दोन खोल्यांच्या घरात दाटीवाटीने राहणाऱ्या कुटुंबातील निकिता रेणुसे या विद्यार्थिनीने सन २०१५ मध्ये दहावीला ९७.२० टक्के मिळवले. अतिशय प्रतिकूल परिस्थितीमध्ये शिकणाऱ्या निकीताला 'मटा हेल्पलाइन'ची साथ मिळाली आणि तिचे आयुष्यच बदलून गेले. दहावीनंतर तिने सायन्सला प्रवेश घेतला. सध्या ती 'आयआयटी'ची तयारी करीत आहे. अकरावीला गणितात तिला ९७ गुण मिळाले, तर फिजिक्स आणि केमिस्ट्रीमध्ये अनुक्रमे ८० आणि ८९ गुण मिळाले आहेत. 'मटा हेल्पलाइन'मध्ये मिळालेल्या मदतीनंतर निकिताच्या शिक्षणाची चिंता मिटली आहे. 'महाराष्ट्र टाइम्सच्या माध्यमातून मिळालेल्या मदतीमुळे आम्ही निकिताला उत्तम शिक्षण देण्यासाठी प्रयत्न करीत आहोत,' असे तिचे वडील भीमसेन रेणुसे सांगतात.
---
'सुरू आहे बीफार्मचा प्रवास'
..
(अपूर्वा जाधव : २०१४)
..
बिकट परिस्थितीशी दोन हात करून दहावीला तब्बल ९७.२० टक्के मिळवणाऱ्या अपूर्वा जाधवचं आयुष्य 'मटा हेल्पलाइन' या उपक्रमाने पूर्णपणे बदलून गेलं. अपूर्वाचे वडील एका खासगी कंपनीमध्ये ड्रायव्हर म्हणून काम करतात. अपूर्वा नुकतीच बारावी उत्तीर्ण झाली आणि तिला ७९ टक्के मार्क मिळाले आहेत. अपूर्वाला बीफार्मला प्रवेश घ्यायचा आहे. अतिशय खडतर परिस्थितीतून तिने दहावीला उत्तम गुण मिळवले. अपूर्वाने जिद्दीने मिळवलेल्या यशाला 'मटा हेल्पलाइन'चे बळ मिळाले आणि तिने भरारी घेतली. 'महाराष्ट्र टाइम्स'च्या या उपक्रमाचा लाभ तिला मिळाला आणि तिच्या मनातील करिअरच्या दिशेने तिची वाटचाल सुरू झाली आहे. 'मटा'च्या वाचकांनी दाखविलेला विश्वास मी नक्कीच सार्थ ठरवेन, असे अपूर्वा म्हणते.
---
'आयटी इंजिनीअर होणार आहे'
..
(चैतन्य तापसे : २०१५)
घरच्या प्रतिकूल परिस्थितीतही दहावीत ९४.४० टक्के गुण मिळवून आयटी इंजिनीअर बनण्याचे स्वप्न पाहिलेला चैतन्य राजेश तापसे आता आणखी जिद्दीने वाटचाल करतो आहे. पुणेकरांनी त्याची गुणवत्ता ओळखून त्याला दिलेल्या 'लक्ष्मीचैतन्या'ची जाणीव ठेवून तो स्वतःचे स्वप्न सत्यात उतरवण्यासाठी जोमाने अभ्यास करतो आहे. 'मटा हेल्पलाइन'च्या माध्यमातून पुणेकरांनी केलेल्या मदतीमुळे त्याची आर्थिक गरज पूर्ण झाली. चैतन्यने 'नूमवि'त अकरावीला विज्ञान शाखेत प्रवेश घेऊन कम्प्युटर सायन्सचे विषय घेतले. अकरावीत त्याला ८२ टक्के गुण मिळाले असून, आता त्याने बारावीच्या तयारीला सुरुवात केली आहे. दिवसभराचे कॉलेज, क्लासचे वेळापत्रक सांभाळून तो दर दिवशी किमान दोन तास स्वतः अभ्यास करतो. डिसेंबरपर्यंत बारावीचा अभ्यास पूर्ण करून, नंतर 'सीईटी'चा अभ्यास करण्याचे नियोजन त्याने केले आहे. त्यामुळे बारावीतही चांगले यश मिळण्याचा विश्वास त्याला वाटतो आहे.
---
'विश्वास सार्थ ठरवेन'
...
(पूजा जगताप : २०१५)
..
आंबेगाव पठार येथील स्वामीनगर भागातील भाड्याच्या छोट्याशा दोन खोल्या, वडील पेट्रोल पंपावर कामाला, नोकरीतून घरात येणारे अत्यंत तुटपुंजे उत्पन्न, त्यामुळे होणारी ओढाताण अशा प्रतिकूल परिस्थितीशी झगडून पूजा शिवाजी जगताप हिने दहावीला ९०.६० टक्के गुण मिळविले होते. 'मटा हेल्पलाइन'च्या माध्यमातून मिळालेल्या मदतीतून आर्थिक परिस्थितीचा अडथळा दूर होऊन तिच्या कम्प्युटर इंजिनीअर होण्याच्या ध्येयाकडे तिची वाटचाल सुकर झाली आहे. ती सध्या गव्हर्नमेंट पॉलिटेक्निक, पुणे येथे इंजिनीअरिंग डिप्लोमाच्या दुसऱ्या वर्षात शिकत आहे. पहिल्या सेमिस्टरमध्ये ७९ टक्के आणि दुसऱ्या सेमिस्टरमध्ये ७० टक्के गुण तिने मिळविले आहेत. दहावीच्या वेळेला असलेली अभ्यासाची जिद्द कायम असून, 'मटा हेल्पलाइन'मुळे आता तिच्या स्वप्नांना बळ मिळाले आहे. आई-वडिलांचा; तसेच आपले स्वप्न पूर्ण करण्यासाठी ज्या-ज्या दात्यांनी मदतीचे हात पुढे केले, त्या सर्वांचा आणि विशेषतः 'मटा'चा विश्वास सार्थ ठरविण्यासाठी ती खूप मेहनत घेत आहे.
......
'यशस्वी होणारच...!'
...
सायली साळवी (२०१५)
..
सायली साळवीने दहावीला ९२ टक्के मार्क होते. पुढे शिकायचे होतेच. तिला इंजिनीअरिंगला जायचे होते. ती हुशार होती, शिकायची तीव्र इच्छा होती. पण आर्थिक बळ कमी होते. अर्थात आर्थिक गोष्टींसाठी सायलीचे शिक्षण अडू द्यायचे नाही, असा पक्का निर्णय तिच्या आईवडिलांनी केला होता. त्यानंतर सायलीला 'मटा' हेल्पलाइनचे भक्कम पाठबळ मिळाले. सायलीने गव्हर्मेंट पॉलिटेक्निकला इलेक्ट्रॉनिक्स आणि टेलिकम्युनिकेशच्या डिप्लोमाला प्रवेश घेतला आहे. जनता वसाहतीतल्या गडबड गोंधळातही तिने जिद्दीने अभ्यास करून पहिल्या वर्षी ८७ टक्के मार्क मिळवले आहेत.
..
डॉक्टर होणारच
...
ऐश्वर्या वीर (२०१५)
...
ऐश्वर्या वीरला अकरावीत ८५ टक्के मार्क मिळाले आहेत. सध्या ती एसएनडीटीमध्ये बारावी सायन्सला आहे. ऐश्वर्याला डॉक्टर व्हायचे आहे. ऐश्वर्याचे शालेय शिक्षण निगडीत महापालिकेच्या शाळेत झाले आहे. तिची आई धुणीभांडी करून चरितार्थ चालवते. झोपडपट्टीमधील एका खोलीत तिने अभ्यास करून यश मिळवले होते. त्यात तिच्या शिक्षकांचा मोठा वाटा असल्याचे ती आवर्जून नमूद करते. 'मटा हेल्पलाइन'चे पाठबळ मिळाल्याने अभ्यासाला अधिक हुरूप आला आहे. त्यामुळे बारावीत अधिक अभ्यास करून उत्तम मार्क मिळवणार असा निश्चय ती बोलून दाखवते. सध्या तिने एका विषयाचा क्लास लावला आहे. बाकीच्या विषयांसाठी शिक्षकांचे मार्गदर्शन घेत असल्याचेही तिने सांगितले.
...
ध्येय यशस्वी होण्याचे
...
अश्विनी आव्हाड (२०१५)
...
अश्विनी आव्हाडचे वडील गेल्यानंतर तिची आई मोलमजुरी करून प्रपंच चालवत आहे. दहावीत उत्तम मार्क मिळाले तरी पुढे शिक्षण कसे होणार हा प्रश्न होता. पण हा प्रश्न 'मटा'च्या हेल्पलाइनमुळे सुटला आहे. अश्विनी सध्या बारावीच्या अभ्यासात व्यग्र आहे. 'गेट'ची तयारीही तिने सुरू केली आहे. अधिकाधिक अभ्यास करून 'गेट'मध्ये उत्तम मार्क मिळवणारच असा निश्चय ती बोलून दाखवते.
मोबाइल अॅप डाउनलोड करा आणि राहा अपडेट
