म. टा. प्रतिनिधी, पुणे
पालकमंत्र्यांच्या दबावामुळे जिल्हाधिकारी आणि पाटबंधारे विभागाने पुन्हा महापौरांचे आदेश आणि आयुक्तांच्या पत्राला केराची टोपली दाखवली. पुणेकरांच्या हक्काचे पाणी धरणातून सोडले जात असताना, पुणेकरांना मात्र पाण्यापासून वंचित ठेवण्याचे काम गिरीश बापट करत आहेत, असा थेट आरोप महापौर प्रशांत जगताप यांनी गुरुवारी केला.
गेल्या महिन्यात धरणे पूर्ण क्षमतेने भरली नसल्याने पाणीकपात रद्द करण्यास पालकमंत्री बापट यांनी स्पष्ट नकार दिला होता. ऑगस्टच्या सुरुवातीपासून सुरू असलेल्या पावसामुळे धरणांत पुरेसा साठा झाला आहे. एवढेच नाही, तर बुधवारी आणि गुरुवारी मोठ्या प्रमाणावर धरणातून पाणी सोडण्यात आले. त्याचे पडसाद सर्वसाधारण सभेत उमटले. पालिका प्रशासनाने सकारात्मक भूमिका घेऊन तातडीने जिल्हाधिकाऱ्यांकडे पाणीकपात मागे घेण्याची मागणी केली. तरीही, जिल्हाधिकारी आणि पाटबंधारे विभागाचे अधिकारी पाणीकपात मागे घेण्याबाबत टाळाटाळ करत असल्याची टीका जगताप यांनी केली. 'पाणीकपात रद्द करण्याचे श्रेय इतर कोणाला मिळू नये, या अहंकारापोटी पालकमंत्री पुण्याचे हक्काचे पाणी देण्यात चालढकल करत आहेत. बापट यांना श्रेय घ्यायचे असेल, तर जरूर घ्यावे. आम्ही त्यांच्या अभिनंदनाचे फलक लावू; पण पुणेकरांना त्यांच्या हक्काचे पाणी द्या', असा टोला जगताप यांनी बापट यांना लगावला.
शहरासाठी आम्ही अतिरिक्त पाण्याची मागणी करत नसून, पुण्याच्या कोट्याचे पाणी दिले जावे, अशी मागणी केली आहे. पालकमंत्र्यांच्याच कसबा मतदारसंघातून नदीतून पाणी वाहत असताना, पाचशे मीटरवर असलेल्या नागरिकांना पाणी मिळत नाही. एक खासदार, आठ आमदार पुणेकरांनी निवडून दिले आहेत. त्यामुळे, ते निश्चित याचा विचार करतील, अशी अपेक्षा महापौरांनी व्यक्त केली.
.................
धरणांत अत्यल्प साठा असतानाही, पुणेकरांच्या पाणीकपातीमध्ये एक थेंबही कपात माजी पालकमंत्र्यांनी केली नव्हती. मात्र, विद्यमान पालकमंत्री धरणांत २३ टीएमसी पाणी असूनही पुणेकरांना पाणी देत नाहीत. यावरून, कोणते पालकमंत्री चांगले हे पुणेकरांनीच ठरवावे.
प्रशांत जगताप, महापौर
मोबाइल अॅप डाउनलोड करा आणि राहा अपडेट
