म. टा. प्रतिनिधी, पुणे/हडपसर
कुत्रा भुंकला म्हणून झालेल्या भांडणात नाहक एका तरुणाला जीव गमवावा लागला. हडपसर परिसरातील डवरीनगर येथे बुधवारी रात्री ही घटना घडली. या वेळी झालेल्या दंगलीत महिलांनाही मारहाण झाली. पोलिसांनी या भांडणाची दखल वेळीच घेतली असती, तर या तरुणाचा जीव वाचू शकला असता.
सागर नामदेव चौगुले (वय २३, रा. डवरीनगर, हडपसर) असे तरुणाचे नाव आहे. गोरख लोंढे, उमेश खंडागळे आणि नागेश जगताप (सर्व रा. हडपसर) यांना अटक करण्यात आली आहे, तर मुख्य आरोपी गणेश वाबळे (वय २५), प्रदीप करपे, इतर सहा-सात संशयितांविरुद्ध खुनाचा गुन्हा दाखल झाला आहे. आरोपींच्या मारहाणीत सनी चौगुले, संदीप शिंदे, केसराबाई शिंदे, शकुंतला सावंत जखमी झाल्या आहेत. नीलेश प्रकाश शिंदे (वय २६, रा. डवरीनगर) यांनी पोलिसांत तक्रार दाखल केली आहे. भांडणाचा हा प्रकार डवरीनगर येथील लोखंडी पुलाजवळील पाण्याच्या टाकीजवळ घडला होता.
तक्रारदार शिंदे बुधवारी सायंकाळी सार्वजनिक शौचालयाकडे चालले होते. त्या वेळी वाबळे याचा पाळीव कुत्रा त्यांच्यावर भुंकला. शिंदे यांनी त्या कुत्र्याला हाकलले. त्या वेळी वाबळे याच्या आईने शिंदे यांच्याशी वाद घालण्यास सुरुवात केली. हे भांडण सुरू असताना वाबळे तेथे आला आणि त्याने शिंदे यांना शिवीगाळ केली. शिंदे यांनी हडपसर पोलिस ठाणे गाठले आणि त्याच्याविरुद्ध तक्रार नोंदवली.
दरम्यान, शिंदे, भाऊ शिंदे, संदीप शिंदे असे डवरी वस्तीसमोरील लोखंडी पुलाजवळ उभे होते. त्या वेळी वाबळे आणि त्याचे साथीदार दुचाकींवर तेथे पोहोचले. ते मारहाण करण्याच्या इराद्याने येत असल्याचे पाहून शिंदे बंधू तेथून निघून गेले. त्या वेळी वाबळे यांनी शिंदे यांची चुलत मावशी शालन ठाकरे यांच्या घरावर हल्ला केला. त्यांनी पोलिस नियंत्रण कक्षाला फोन केल्याचे लक्षात येताच वाबळे आणि त्याचे साथीदार तेथून पळून गेले. त्यानंतर पोलिस घटनास्थळी पोहोचले; तेथे थोडा वेळ थांबले, मात्र वाबळे न सापडल्याने निघून गेले. त्यानंतर वाबळे पुन्हा आपल्या साथीदारांसमवेत तेथे वस्तीवर पोहोचला. त्या वेळी त्याने मारहाण करण्यास सुरुवात केली. या वेळी सागर चौगुले हाणामारी सोडवण्यासाठी गेला असता त्यालाच लाकडी काठीने बेदम मारहाण करण्यात आली. त्यात त्याचा मृत्यू झाला. या वेळी काही महिलांनाही मारहाण झाल्याचे तक्रारीत नमूद करण्यात आले आहे.
मोबाइल अॅप डाउनलोड करा आणि राहा अपडेट
