म. टा. प्रतिनिधी, पुणे/ हडपसर
प्रेमप्रकरणातून एका तेवीस वर्षीय तरुणाने राहत्या घरात गळफास घेऊन आत्महत्या केल्याची खळबळजनक घटना हडपसर परिसरात मंगळवारी सकाळी उघडकीस आली. आत्महत्या करण्यापूर्वी तरुणाने सुसाइड नोट लिहून ठेवली आहे. 'कोणालाही दोषी धरू नये,' असे त्यात म्हटले आहे. तरुणाच्या प्रेमाला कुटुंबीयांचा विरोध असल्यामुळे नैरश्यातून त्याने आत्महत्या केल्याचे आढळून आले आहे.
शुभम संभाजी टिळेकर (२३, रा. कसबा) असे आत्महत्या केलेल्या तरुणाचे नाव आहे. या प्रकरणी हडपसर पोलिस ठाण्यात अकस्मात मृत्यूची नोंद करण्यात आली आहे. पोलिसांनी दिलेल्या माहितीनुसार, शुभमचे वडील 'टाउन प्लॅनिंग' येथे नोकरीस आहेत, तर आई शिक्षण मंडळात नोकरीला आहे. शुभमला मोठी बहीण आहे. तो गरवारे महाविद्यालयात डिप्लोमाच्या दुसऱ्या वर्गात शिकत होता. त्याचे आई-वडील कसबा परिसरात भाड्याच्या खोलीत राहतात. त्यांनी काही दिवसांपूर्वीच हडपसर परिसरातील फुरसुंगी येथे सप्तरंग हाउसिंग सोसायटीत फ्लॅट घेतला होता. शुभम झोपण्यासाठी तेथे जात होता. सोमवारी त्याच्या बहिणीच्या नणंदेचे हडपसर परिसरात लग्न होते. त्यासाठी तो गेला होता. शुभमला त्याचा मित्र शुभंकर ढोले याने दुचाकीवरून घरी सोडले. तसेच, शुभमने त्याला सकाळी घेण्यासाठी येण्यास सांगितले होते. दरम्यान, मध्यरात्री शुभमने घरात गळफास घेऊन आत्महत्या केली. सकाळी त्याचा मित्र शुभंकर त्याला घेण्यासाठी आला. त्याने दरवाजा ठोठावला; पण बराच वेळ दार वाजवूनही उघडले नाही. त्यामुळे त्याने खिडकीतून पाहिले. त्या वेळी शुभमने गळफास घेतल्याचे आढळून आले. त्याने तत्काळ शंभर क्रमांकावर फोन करून घटनेची माहिती दिली. हडपसर पोलिसांनी घटनास्थळी धाव घेतली. शुभमचा मृतदेह ससून हॉस्पिटलमध्ये पाठवण्यात आला आहे.
शुभमचे एका मुलीवर प्रेम होते. त्यांना लग्न करायचे होते; मात्र शुभमच्या आई-वडिलांचा त्याला विरोध होता. या नैराश्यातून त्याने आत्महत्या केल्याची माहिती पोलिसांनी दिली.
..............
'आई-वडिलांकडे लक्ष ठेव'
शुभमने सुसाइड नोट लिहून ठेवली आहे. 'आई-वडिलांना साभाळ. माझ्यामुळे आई-वडिलांना खूप त्रास झाला आहे. आता कोणीही त्रास देणार नाही. मित्रांना माझ्या प्रेमाबाबत माहिती होते. त्यांनी तुम्हाला समजावून सांगायला पाहिजे होते; मात्र त्यांनी तसे केले नाही. माझी आठवण आल्यास माझा फोटो पहा,' असे त्याने बहिणीला उद्देशून लिहले आहे. तसेच, 'माझ्या मृत्यूला कोणाला जबाबदार धरू नये. हा माझा स्वतःचा निर्णय आहे. मी तिच्याशिवाय जगू शकत नाही; मात्र ते तुम्हाला सांगूनही कळले नाही,' असेही त्याने लिहिले आहे.
मोबाइल अॅप डाउनलोड करा आणि राहा अपडेट