म. टा. प्रतिनिधी, पुणे
महाराष्ट्र राज्य परीक्षा परिषदेने यंदा प्रथमच तयार केलेल्या स्कॉलरशिप परीक्षा मार्गदर्शक पुस्तकांविषयी काही सूचना नव्याने पुढे आल्यामुळे छपाई आणि वितरण पूर्ण झाले नसल्याची बाब सोमवारी उघड झाली. त्यामुळे अभ्यासक्रम असला, तरी पुस्तके नाहीत अशा परिस्थितीत राज्यभरातील पाचवी आणि आठवीच्या विद्यार्थ्यांना पुन्हा एकदा स्कॉलरशिपची तयारी करावी लागणार आहे.
यंदा राज्यात प्रथमच पाचवी आणि आठवीच्या विद्यार्थ्यांसाठी स्कॉलरशिपच्या परीक्षांचे आयोजन केले जाणार आहे. परिषदेने या दोन्ही परीक्षांचा अभ्यासक्रम नुकताच जाहीर केला. तसेच, शिक्षणमंत्री विनोद तावडे यांनी याच आधारे परिषदेने तयार केलेल्या स्कॉलरशिप मार्गदर्शकांचेही प्रकाशन केले. त्यामुळे राज्यभरातील विद्यार्थ्यांना स्कॉलरशिप परीक्षेच्या तयारीसाठी लवकरच पुस्तके उपलब्ध होण्याविषयी शिक्षक आणि विद्यार्थ्यांमध्ये आशा पल्लवित झाल्या होत्या. मात्र, या पाठ्यपुस्तकांच्या निर्मिती आणि वितरणाची जबाबदारी असणाऱ्या राज्य पाठ्यपुस्तक निर्मिती आणि अभ्यासक्रम संशोधन मंडळाकडे (बालभारती) सोमवारअखेर ही पुस्तके वितरणासाठी उपलब्धच झाले नसल्याचे उघड झाले. या विषयी संबंधितांकडे चौकशी केली असता, स्कॉलरशिपच्या पुस्तकांविषयी नव्याने काही सूचना पुढे आल्याने, या सूचनांची पूर्तता करून ही पुस्तके लवकरच उपलब्ध करून दिली जाणार असल्याचे सांगण्यात आले.
यापूर्वी स्कॉलरशिपच्या पुस्तकांसाठी विद्यार्थी आणि पालकांना केवळ खासगी प्रकाशकांवरच अवलंबून राहावे लागत होते. यंदा प्रथमच परिषदेने बालभारतीच्या मदतीने स्कॉलरशिपच्या तयारीसाठीही पुस्तकांची निर्मिती करण्याचा निर्णय घेतला. स्कॉलरशिपचा अभ्यासक्रम आणि पुस्तकांचे प्रकाशन एकाच दिवशी जाहीर करण्याची काळजीही शिक्षण खात्याने घेतली होती. स्कॉलरशिपचा अभ्यासक्रम अगोदर जाहीर झाला असता, तर त्या आधारे खासगी प्रकाशकांनी आपली पुस्तके बाजारात आणली असती आणि त्याचा अधिकृत सरकारी पुस्तकांच्या खपावर परिणाम झाला असता, असा अंदाज होता. मात्र आता अभ्यासक्रम जाहीर होऊन आठवडा उलटून गेल्यानंतही अधिकृत पुस्तके बाजारात न आल्याने, पालकांना पुन्हा खासगी प्रकाशकांकडेच वळावे लागणार असल्याची नोंद या क्षेत्रातील जाणकार करत आहेत. त्यामुळे खात्याने पुरेशी तयारी केल्यानंतरही पुन्हा खासगी प्रकाशकांनाच स्कॉलरशिपचा फायदा होणार असल्याचे अंदाज हे जाणकार वर्तवित आहे.
मोबाइल अॅप डाउनलोड करा आणि राहा अपडेट
