म. टा. प्रतिनिधी, पुणे
परिस्थिती अनुकूल नसल्याने मान्सूनचा अरबी समुद्रावरील रखडलेला प्रवास पुन्हा सुरू होण्याचे संकेत आहेत. येत्या चार ते पाच दिवसांत मान्सून कोकण, दक्षिण मध्य महाराष्ट्र आणि मराठवाड्यात दाखल होण्यास परिस्थिती अनुकूल असल्याचे हवामान विभागातर्फे (आयएमडी) सांगण्यात आले. तसेच १९, २० जून रोजी राज्यात चांगल्या पावसाची शक्यता असल्याचे हवामानविषयक मॉडेल्समधून दिसत आहे.
मान्सून देशात दाखल झाल्यानंतर त्याच्या दोन शाखा निर्माण होतात. एक बंगालच्या उपसागरावरून वाहणारी तर, दुसरी अरबी समुद्रावरून वाहणारी.. दोन्ही शाखांना जसे हवामान अनुकूल होईल, तसा त्यांचा प्रवास होऊन मान्सून संपूर्ण देश व्यापतो. साधारण दहा जूनपर्यंत मान्सून विदर्भाकडील काही भाग वगळता राज्याच्या बहुतांश भागात दाखल होतो आणि पंधरा जूनपर्यंत संपूर्ण राज्य व्यापतो. मात्र, यंदा १५ जून उजाडला तरीही मान्सून राज्यात दाखल झालेला नाही.
गेले काही दिवस परिस्थिती अनुकूल असल्याने मान्सूनच्या बंगालच्या उपसागरावरील शाखेची वाटचाल नियमितपणे सुरू होती. मात्र, प्रतिकूल परिस्थितीमुळे मान्सूनची अरबी समुद्राकडील शाखा कारवारपर्यंत येऊन थंडावली आहे. विशेषतः या शाखेकडील मोसमी वारे प्रभावी नसल्याने वाटचाल थंडावली आहे. आता मात्र, पुन्हा या शाखेकडील मोसमी वारे प्रभावी होण्याची चिन्हे असून, येत्या चार ते पाच दिवसांत या भागात मान्सूनची आगेकूच होईल, असे संकेत हवामान विभागाने दिले आहेत.
'येत्या चार ते पाच दिवसांत मान्सून अरबी समुद्राच्या आणखी काही भागात, संपूर्ण गोव्यात, कोकण, दक्षिण मध्य महाराष्ट्र आणि मराठवाड्याच्या काही भागात तसेच कर्नाटकचा उर्वरित भाग, रायलसीमा व आंध्रप्रदेशाचा किनारपट्टी भागात दाखल होण्यास परिस्थिती अनुकूल आहे,' असे विभागाच्या अधिकृत प्रसिद्धीपत्रकात म्हटले आहे.
---
१९,२० जूनला मराठवाड्यात पाऊस?
येत्या १७ जूनपर्यंत बंगालच्या उपसागरावर कमी दाबाचे क्षेत्र निर्माण होण्याची शक्यता आहे. हे क्षेत्र महाराष्ट्राकडे सरकण्याची शक्यता आहे. तसे झाल्यास १९ आणि २० जूनला राज्यात बहुतांश ठिकाणी चांगल्या पावसाची शक्यता आहे. विशेषतः दुष्काळग्रस्त मराठवाड्यात चांगला पाऊस होईल. याच काळात मान्सूनचीही चांगली प्रगती होईल, अशी शक्यता असल्याचे 'आयएमडी'च्या हवामानविषयक मॉडेल्समधून दिसत असल्याचे हवामानतज्ज्ञांनी सांगितले.
मोबाइल अॅप डाउनलोड करा आणि राहा अपडेट
