पुणे मुंबई एक्स्प्रेस वेवरील अपघात प्रवण क्षेत्र असलेल्या खंडाळा एक्झिट येथे रविवारी सायंकाळी पावणे पाचच्या सुमारास सिमेंटचा टँकर उलटून अपघात झाला. या अपघातामुळे दोन्ही मार्गावरील वाहतूक दोन तास ठप्प झाली होती. वाहनांच्या सुमारे पाच ते सहा किलोमीटर लांब रांगा लागल्या होत्या. या अपघातामुळे लोणावळ्यात जुन्या पुणे-मुंबई राष्ट्रीय मार्गावरही मोठी वाहतूक कोंडी झाली होती. या ठिकाणी एक महिन्यातील हा दहावा अपघात आहे.
खंडाळा महामार्ग पोलिसांनी दिलेल्या माहितीनुसार, पुण्याहून मुंबईला जाणाऱ्या सिंमेटच्या टँकरच्या (एमएच ४६ एएफ ३४००) चालकाचे येथील तीव्र उतार व वळणावर नियंत्रण सुटल्याने टँकर दोन्ही मार्गाच्या मधोमध आडवा झाला. सुदैवाने हा टँकर समोरून येणाऱ्या वाहनावर आदळला नाही. या अपघातामुळे दोन्ही मार्गावरील वाहतुकीला अडथळा निर्माण झाला. त्यामुळे वाहतूक दोन तास ठप्प झाली होती. अपघाताची माहिती कळताच खंडाळा महामार्ग व खंडाळा आउट पोस्ट पोलिसांनी घटनास्थळी धाव घेत अपघातग्रस्त टँकर बाजूला काढण्यासाठी आयआरबीच्या क्रेनला प्राचारण केले. मात्र उच्च क्षमतेची क्रेन उपलब्ध न झाल्याने कमी क्षमतेच्या दोन क्रेनच्या सहाय्याने हा टँकर बाजूला करण्यात आला. त्यानंतर सव्वासातला मुंबईकडे जाणाऱ्या तिन्ही लेनवरून वाहतूक सुरू करण्यात आली. तर साडेसातला पुण्याकडे जाणारी एक लेन सुरू करण्यात आली.
अपघाताचा परिणाम जुन्या पुणे-मुंबई राष्ट्रीय मार्गावर झाल्याने लोणवळ्यात वाहतूक कोंडी झाली. उच्च क्षमतेच्या क्रेनअभावी टँकर एक्स्प्रेस वे वरील दोन्ही लेनवर रात्री उशिरापर्यंत तसाच राहिल्याने पुण्याकडे जाणाऱ्या एका लेनवर वाहतुकीचा ताण पडला. त्यामुळे पुण्याकडे जाणारी वाहतूक रात्री उशिरापर्यंत संथ गतीने सुरू होती.
मोबाइल अॅप डाउनलोड करा आणि राहा अपडेट