मोबाइल अॅप डाउनलोड करा आणि राहा अपडेट
म. टा. प्रतिनिधी, पुणे फेसबुकवर ओळख झालेल्या व्यक्तीने दुबईवरून पाठविलेले गिफ्ट सोडवून घेण्याचा बहाणा करून एका प्राध्यापक महिलेची फसवणूक केल्याचा प्रकार उघडकीस आला आहे. या प्रकरणी कोंढवा पोलिस ठाण्यात आयटी अॅक्टनुसार गुन्हा दाखल करण्यात आला आहे. याबाबत ३८ वर्षीय महिलेने तक्रार दिली आहे. त्यावरून अजयकुमार, रंजनकुमार (दिल्ली) व सुरेंद्र कुमार यांच्याविरुद्ध गुन्हा दाखल करण्यात आला आहे. १७ जुलै ते १ सप्टेंबर २०१५ दरम्यान ही घटना घडली. पोलिसांनी दिलेल्या माहितीनुसार, तक्रारदार महिला या प्राध्यापिका आहेत. त्या एनआयबीएम रोड परिसरात राहतात. त्यांची अजयकुमार नावाच्या व्यक्तींसोबत फेसबुकवरून ओळख झाली. आरोपीने तो दुबईला असल्याचे सांगत संवाद वाढविला, त्यांच्या ओळखीचे रूपांतर मैत्रीत झाले. त्या वेळी आरोपीने बोलण्यासाठी महिलेकडे व्हॉट्स अॅप नंबरची मागणी केली. महिलेने त्याला व्हॉट्स अॅप नंबर दिला. त्यानंतर व्हॉट्स अॅपद्वारे त्यांच्यात चॅटिंग सुरू झाले. या दरम्यान अजयकुमारने महिलेचा विश्वास संपादन केला. दुबईवरून कुरिअरने गिफ्ट पाठविले असून त्यामध्ये २५ हजार पौंड व मौल्यवान वस्तू असल्याचे अजयकुमार याने संबंधित महिलेला सांगितले. हे गिफ्ट दिल्ली येथील कुरिअर कंपनीकडे रखडले असल्याचे त्याने सांगितले. गिफ्ट मिळविण्यासाठी महिलेला वेगवेगळ्या बँकांच्या खात्यावर सुमारे एक लाख ७ हजार भरण्यास अजयकुमारने सांगितले. पैसे भरूनही गिफ्ट अथवा भरलेले पैसे न मिळाल्याने फसवणूक झाल्याचे महिलेच्या लक्षात आले. या प्रकरणी महिलेने कोंढवा पोलिस ठाण्यात गुन्हा दाखल केला. याबाबत उपनिरीक्षक वर्षाराणी पाटील तपास करीत आहेत.
