देशभरातील सरकारी शैक्षणिक संस्थांमधील विद्यार्थ्यांनाही आंतरराष्ट्रीय दर्जाचे अभ्यासक्रम उपलब्ध करून देण्यासाठी केंद्रीय मनुष्यबळविकास मंत्रालयाने विशेष पावले उचलली आहेत. मंत्रालयाने त्यासाठी जगभरातील चांगल्या दर्जाच्या विद्यापीठांमधील तज्ज्ञांची मदत घेण्याचा निर्णय घेतला आहे. त्यासाठी काही विद्यापीठांसोबत शैक्षणिक करार झाल्याची माहिती केंद्रीय मनुष्यबळविकासमंत्री स्मृती इराणी यांनी शुक्रवारी दिली.
राष्ट्रीय उच्चतर शिक्षा अभियानांतर्गत (रुसा) देशभरातील विविध विद्यापीठे आणि उच्च शैक्षणिक संस्थांमधील दहा निवडक प्रकल्पांचे औपचारिक उद् घाटन इराणी यांच्या हस्ते झाले. यानिमित्त इराणी यांनी सावित्रीबाई फुले पुणे विद्यापीठातील डिजिटल क्लासरूम आणि ई-कंटेंट लर्निंग मॉड्युल्सचे व्हिडिओ कॉन्फरन्सिंगद्वारे उद् घाटन केले. या कार्यक्रमामध्ये इराणी यांनी मंत्रालयाच्या विविध योजनांची माहिती दिली. तसेच, काही नव्या उपक्रमांच्या घोषणाही केल्या.
मंत्रालयाने 'रुसा'च्या माध्यमातून देशभरातील विद्यापीठांना पायाभूत सुविधांच्या विकासासाठी भरीव आर्थिक निधी उपलब्ध करून दिला आहे. या पुढील टप्प्यात मंत्रालयाने शैक्षणिक अभ्यासक्रमांच्या विकासावर भर दिला आहे. त्यासाठी मंत्रालयाने आंतरराष्ट्रीय पातळीवर नावाजलेल्या केंब्रिज युनिव्हर्सिटी, पेनसेल्व्हानिया युनिव्हर्सिटी, जॉर्जिया टेक युनिव्हर्सिटी आदी विद्यापीठांसोबत करार केले आहेत. त्यानुसार या विद्यापीठांमधील तज्ज्ञ भारतातील विद्यापीठांच्या अभ्यासक्रम निर्मितीसाठी मदत करू शकतील. त्याद्वारे सरकारी संस्थांमधील विद्यार्थ्यांना खासगी संस्थांमधील अभ्यासक्रमांच्या तोडीचे अभ्यासक्रम शिकण्याची संधी उपलब्ध होणार असल्याचे इराणी यांनी शुक्रवारी स्पष्ट केले.
शिक्षणमंत्री अनुपस्थित
पुणे विद्यापीठात झालेल्या या कार्यक्रमासाठी शिक्षणमंत्री विनोद तावडे यांच्यासह खासदार अनिल शिरोळे, पालकमंत्री गिरीश बापटही उपस्थित राहणार होते. मात्र, तावडे यांच्यासह इतर लोकप्रतिनिधींनी या कार्यक्रमाकडे पाठ फिरविली. इतर राज्यांमधून त्या त्या राज्यांच्या वरिष्ठ लोकप्रतिनिधी आणि शिक्षण खात्याशी संबंधित वरिष्ठ अधिकाऱ्यांनी या कार्यक्रमाला हजेरी लावली होती. विद्यापीठात इतर विद्यापीठांचे कुलगुरू उपस्थित असताना, तावडे यांची अनुपस्थिती मात्र इराणी यांनाही जाणवली. कार्यक्रमाच्या अखेरीस इराणी यांनी सर्वांचे आभार मानतानाच, तावडे यांनाही माझा नमस्कार सांगा, असा निरोप उपस्थितांना दिला. पक्षामध्ये तावडे आपल्यासाठी वरिष्ठ मार्गदर्शक असल्याची नोंद इराणी यांनी या निमित्ताने केली. लाइव्हलिहूड कॉलेजेस...
देशभरातील १० उच्च शैक्षणिक संस्थांमध्ये विद्यार्थ्यांसाठी १० स्टार्टअप्स लवकरच सुरू करण्यात येणार असल्याची माहितीही इराणी यांनी दिली. विद्यार्थ्यांमध्ये कौशल्यविकासासाठी देशभरात प्रत्येक राज्यात एक, अशी एकूण ३५ लाइव्हलिहूड कॉलेज मंत्रालयामार्फत सुरू केली जातील. तसेच, उच्च शिक्षणात स्थानिक भाषांचे महत्त्व वाढविण्यासाठी प्रत्येक राज्यात एक 'मॉडेल लँग्वेज लॅब' सुरू करण्यायत येणार आहे.
विद्यार्थ्यांच्या नवकल्पनांना चालना
विद्यार्थ्यांच्या नवकल्पनांना चालना देण्यासाठी मंत्रालय एक विशेष उपक्रम सुरू करणार आहे. राष्ट्रीय आणि आंतरराष्ट्रीय शैक्षणिक संस्थांमधील विद्यार्थ्यांचे आदान-प्रदान हा त्यातील एक उपक्रम असेल. त्यासाठीचे बोधचिन्ह आणि नाव सुचविण्यासाठी देशभरातील विद्यार्थ्यांसाठी एक स्पर्धा त्यांनी जाहीर केली. त्यासाठी येत्या १५ जुलैपर्यंत मंत्रालयाकडे प्रवेशिका पाठवाव्यात. १५ ऑगस्टला या योजनेचे नाव आणि स्पर्धेतील विजेत्यांची घोषणा केली जाईल. या स्पर्धेत विजेत्या विद्यार्थ्यांना सरकारी खर्चाने १४ दिवसांचा परदेश दौरा करण्याची संधी दिली जाईल. या दौऱ्यात परदेशातील चांगल्या दर्जाच्या शिक्षणसंस्थांना भेट देण्याचे अनोखे पारितोषिक विद्यार्थ्यांना देण्यात येणार आहे.
मोबाइल अॅप डाउनलोड करा आणि राहा अपडेट