शहराच्या सर्व भागांत समान पाणीपुरवठा (२४ बाय ७) करण्याच्या दृष्टीने पाणी साठवण टाक्यांची संख्या वाढविण्याचे महत्त्वाकांक्षी काम महापालिकेने हाती घेतले आहे. पुढील दोन वर्षांमध्ये शहराच्या वेगवेगळ्या भागांमध्ये तब्बल ८२ टाक्या उभारण्याचे नियोजन असून, त्याद्वारे शहराच्या पाणीपुरवठ्यात आमूलाग्र सुधारणा करण्याचे उद्दिष्ट महापालिकेने ठेवले आहे.
गेल्या अनेक वर्षांपासून समान पाणीपुरवठा करण्याचे पालिकेचे प्रयत्न सुरू आहेत; पण त्याला पुरेशी चालना मिळाली नव्हती. समान पाणीपुरवठ्यासाठी तब्बल २८०० कोटी रुपयांचा प्रकल्प पालिकेने मान्य केला आहे. त्यासाठी, पाणीपट्टीत वाढ करण्यासही मंजुरी दिली गेली असून, आता या प्रकल्पासाठी आवश्यक मूलभूत सुविधांच्या निर्मितीवर भर दिला जाणार आहे.
गेल्या महिन्यात कॅनॉलमधून घेण्यात येणारे पाणी बंद करून ते बंद पाइपलाइनद्वारेच घेण्यास महापालिकेने सुरुवात केली. त्याचाच पुढच्या टप्प्यात शहराच्या वेगवेगळ्या भागांमध्ये पाणी साठवण टाक्या उभारण्याचे नियोजन पाणीपुरवठा विभागाने केले आहे. संपूर्ण शहराचे आठ विभागांमध्ये विभाजन करून ८२ टाक्या उभारण्याचे टेंडर नुकतेच काढण्यात आले आहे. त्यामुळे, समान पाणीपुरवठ्याच्या दृष्टीने पालिकेने आणखी एक पाऊल पुढे टाकल्याचे सांगितले जात आहे.
समान पाणीपुरवठ्याचा संपूर्ण प्रकल्प २८०० कोटी रुपयांचा असला, तरी त्याचे विविध टप्पे करून कामाची सुरुवात करण्याचे पालिकेने निश्चित केले आहे. तसेच, काही दिवसांपूर्वी मुख्यमंत्री देवेंद्र फडणवीस यांच्यासमवेत झालेल्या बैठकीमध्ये या प्रकल्पासाठी केंद्र अथवा इतर वित्तीय संस्थांकडून कर्ज घेण्यासाठी मदत करण्याचे आश्वासन देण्यात आले होते. त्यामुळे, या प्रकल्पासाठी आवश्यक निधी उपलब्ध होईल, अशी पालिकेची धारणा आहे.
टाक्यांसाठी २३५ कोटी रुपये
शहरात नव्याने उभारण्यात येणाऱ्या या सर्व टाक्यांसाठी महापालिकेला तब्बल २३५ कोटी रुपये खर्च करावे लागणार आहेत. या साठवण टाक्यांची क्षमता २० लाख लिटरपासून ते एक कोटी लिटरपर्यंत असेल. त्यामुळे, शहराच्या विविध भागांतील नागरिकांची गरज आणि तेथील लोकसंख्या लक्षात घेऊन वेगवेगळ्या क्षमतेच्या टाक्या बसविण्यात येणार आहेत. हे संपूर्ण काम पूर्ण होण्यासाठी किमान दोन वर्षांचा कालावधी अपेक्षित धरण्यात आला आहे, अशी माहिती पाणीपुरवठा विभागाचे प्रमुख व्ही. जी. कुलकर्णी यांनी दिली.
मोबाइल अॅप डाउनलोड करा आणि राहा अपडेट
