मोबाइल अॅप डाउनलोड करा आणि राहा अपडेट
- ६७ लाखांचा मुद्देमाल जप्त म. टा. प्रतिनिधी, पुणे बनावट कंपनी स्थापन करून शहरातील विविध दुकानदारांचा विश्वास संपादन करीत त्यांच्याकडून उधारीवर कोट्यावधींचा माल घेऊन पसार होणाऱ्या टोळीतील दोघांना चतुःश्रृंगी पोलिसांनी अटक केली आहे. त्यांच्याकडून ६७ लाख रुपयांचा माल जप्त करण्यात आला आहे. या आरोपींनी शहरातील विविध दुकानदार व व्यापाऱ्यांची सुमारे तीन कोटींची फसवणूक केल्याचे समोर आले आहे. सचिन गंगाराम जोईजोडे (वय ३७, रा. मिरा रोड, मुंबई) आणि ओमप्रकाश जोशी (वय ४४, रा. नालासोपारा, पालघर) अशी अटक केलेल्या दोघांची नावे आहेत. तर, त्यांचे साथीदार सुजय मंडल, अग्निश्वर राय (रा. पश्चिम बंगाल) या दोघांचा शोध सुरू आहे. आरोपी हे बनावट नावाने राहत असल्याचे समोर आले आहे, अशी माहिती सहायक पोलिस आयुक्त वैशाली माने-जाधव यांनी दिली. पोलिसांनी दिलेल्या माहितीनुसार, चतुःश्रृंगी पोलिस ठाण्याच्या हद्दीत आरोपींनी 'आम्राला डील' नावाची बोगस कंपनी स्थापन केली. या कंपनीत त्यांनी नोकरीसाठी नवीन व अनुभवी अशा व्यक्तींना ठेवले. नोकरीवरील व्यक्तींना त्यांच्या ओळखीतील कंपनी व दुकानदार यांच्याकडे असलेल्या मालाची चौकशी करायला लावली. त्यानुसार या दुकानदार व कंपनीकडून एसी, गव्हाचे पीठ, सायकले पार्ट, एलसीडी, फॅन, जनरल स्टोअर्सचे साहित्य या मालाची चौकशी केली. अगोदर कमी किंमतीच्या वस्तू उधारीवर घेतल्या. त्या वस्तूचे पहिल्यांदा काही पैसे देऊन सर्वाचा विश्वास संपादन केला. त्यानंतर आरोपींनी याच दुकानदारांकडून ७१५ एसी, दोन हजार फॅन, सायकलचे सहाशे सुटे भाग, ४५ हजार टन आटा, ६५ एलईडी टीव्ही असा दोन कोटी ९० लाख ७४ हजार रुपयांचा माल घेऊन वाशी येथील एका गोदामात ठेवला. या प्रकरणी तक्रार आल्यानंतर सहायक आयुक्त वैशाली माने- जाधव यांनी चतुःश्रृंगी, हिंजवडी, वाकड पोलिस ठाण्याची पथके तयार करून आरोपींच्या शोधासाठी पाठविली. त्यानुसार चतुःश्रृंगी पोलिस ठाण्याचे निरीक्षक उदय शिंगाडे, फौजदार राजारामसिंह चौहान यांच्या पथकाने आरोपींची माहिती काढली. एसी खरेदीचा बहाणा करून आरोपींशी संपर्क साधला. वाशी येथील फाउंटन हॉटेलजवळ जोईजोडे व जोशी यांना अटक करण्यात आली. जोईजोडे हा विश्वास पवार या नावाने राहत होता. या आरोपींकडून सायकलचे सुटे भाग, एलसीडी, फॅन, एसी, गव्हाचे पीठ असा ६७ लाख रुपयांचा मुद्देमाल जप्त करण्यात आला आहे. पोलिसांची पथके दोन आरोपींच्या मागावर असून आणखी मोठ्या प्रमाणात मुद्देमाल लवकरच जप्त केला जाईल, असे पोलिसांनी सांगितले. कर्मचाऱ्यामुळे प्रकार उघडकीस आरोपींनी डिसेंबर २०१५ ला आम्राला डील नावाची स्थापन केली. या बोगस कंपनीत १२ कर्मचारी नोकरीला नेमले होते. हे कर्मचारी दुकानदारांना फोन करून मालाबाबत चौकशी करण्याचे काम करत होते. त्यांचा पगार त्यांना चेकद्वारे दिला जात होता. गेल्या महिन्याचा पगार कर्मचाऱ्यांना दिल्यानंतर त्यांनी चेक बँकेत भरले. पण, कंपनीच्या खात्यावर पैसे नसल्यामुळे चेक वटले नाहीत. त्यामुळे कर्मचाऱ्यांनी कंपनीच्या अधिकाऱ्यांना फोन लावण्याचा प्रयत्न केला. त्या वेळी अधिकाऱ्यांचे फोन क्रमांक लागत नव्हते. कर्मचारी पोलिस आयुक्तांना भेटण्यासाठी गेल्यावर आयुक्तांनी या प्रकाराची चौकशी करण्यासाठी सहायक आयुक्त वैशाली माने-जाधव यांना सांगितले. त्यानंतर हा फसवणुकीचा प्रकार उघडकीस आला.
