म. टा. प्रतिनिधी लोणावळा
भरधाव वेगातील कंटेनर लँडक्रुझरवर आदळल्याने झालेल्या भीषण अपघातात प्रसिद्ध बांधकाम व्यावसायिक दीपक सखाराम कुलकर्णी ऊर्फ डीएसके गंभीर जखमी झाले. अपघातात त्यांच्या कारचालकाचा जागीच मृत्यू झाला. मुंबई-पुणे एक्स्प्रेस वेवरील खंडाळा एक्झिटजवळ बुधवारी (२५ मे) रात्री सव्वाअकराच्या सुमारास हा अपघात घडला.
नीरज रामकांत सिंग (४०, रा. गणेशनगर, बोपखेल) असे अपघातात मृत्यूमुखी पडलेल्या चालकाचे नाव आहे. कुलकर्णी (६६, पुणे) यांचे सहकारी किरण पांडुरंग काटे (वय ३२, रा. वारजे, पुणे) सुखरूप बचावले आहेत. अपघातानंतर कुलकर्णी यांना उपचारासाठी 'आयआरबी' आणि 'देवदूत' या आपत्कालीन यंत्रणेच्या कर्मचाऱ्यांनी तत्काळ निगडीच्या लोकमान्य हॉस्पिटलमध्ये दाखल केले. तेथे रात्रभर अतिदक्षता विभागात उपचार केल्यानंतर त्यांना पुण्यातील दीनानाथ मंगेशकर हॉस्पिटलमध्ये दाखल करण्यात आले आहे.
खंडाळा पोलिसांनी दिलेल्या महितीनुसार, बुधवारी रात्री उशिरा खंडाळा परिसरात पावसाचा शिडकावा झाला होता. त्यामुळे पुण्याहून मुंबईला जाताना एक्सप्रेस वेवरील खंडाळा एक्झिट येथील तीव्र उतार आणि वळणावरील मार्गावर एक कंटेनर आडवा झाला होता. दरम्यान मागून आरआर रोडवेजचा कंटेनर (एमएच ४६ एआर०४६४) पहिल्या लेनने येत होता. कंटेनर चालकाने पुढे आडवा झालेला कंटेनर पाहून ब्रेक लावून आपत्कालीन पर्यायी मार्गाकडे कंटेनर नेण्याचा प्रयत्न केला. मात्र, उतारामुळे त्याचे नियंत्रण सुटल्याने कंटेनर दोन्ही मार्गांमधील रस्ता दुभाजक ओलांडून विरूध्द दिशेला असणाऱ्या मुंबई-पुणे लेनवर जाऊन थेट कुलकर्णी यांच्या लँडक्रुझरवर (एमएच १२ जेएन १००१) जोरात आदळला.
या भीषण धडकेत कुलकर्णी यांच्या चालकाचा जागीच मृत्यू झाला. कुलकर्णी यांच्या डाव्या बाजूच्या पाठीच्या बरगडीला गंभीर दुखापत झाली आहे. दरम्यान, कंटेनर मागून येणारी टॅक्सी, लक्झरी बस आणि टेम्पोही एकमेकांवर आदळले. या पाच वाहनांच्या विचित्र अपघातात सुदैवाने अन्य कोणालाही दुखापत झाली नाही. अपघातानंतर आरआर रोडवेजचा कंटेनरचालक घटनास्थळावरून पळून गेला. या अपघातामुळे दोन्ही मार्गावरील वाहतूक काही काळ विस्कळित झाली होती. कुलकर्णी काही कामानिमित्त मुंबईला गेले होते. काम आटोपून पुण्याकडे येत असताना हा अपघात झाला. कारमध्ये तिघेजण होते. कुलकर्णी मागील सीटवर बसले होते. अपघाताची माहिती मिळताच खंडाळा महामार्गाचे पोलिस कर्मचारी अल्ताफ पठाण, फिरोज सय्यद यांनी घटनास्थळी धाव घेतली. 'आयआआरबी' आणि 'देवदूत' या आपत्कालीन यंत्रणांच्या कर्मचाऱ्यांच्या मदतीने जखमी कुलकर्णी यांना तत्काळ उपचारासाठी हलविण्यात आले. पोलिसांनी अपघातग्रस्त वाहने बाजूला केल्यानंतर दोन्ही मार्गांवरील वाहतूक पूर्ववत झाली. अपघातानंतर कंटेनरसह फरारी झालेल्या कंटेनर चालकाला पोसलिसांनी अटक केली आहे. घटनेचा तपास लोणावळा शहर पोलिस ठाण्याचे फौजदार बालाजी गायकवाड तपास करीत आहेत.
मोबाइल अॅप डाउनलोड करा आणि राहा अपडेट