म. टा. प्रतिनिधी, पिंपरी 'तुमच्या घरावर कोणीतरी करणी केली आहे. माझ्या अंगात दैवीशक्ती आहे,' असे सांगून घरावरील करणी दूर करण्यासाठी महिलेला शरीरसुखाची मागणी करणाऱ्या भोंदूबाबाला वाकड पोलिसांनी अटक केली आहे. रमजान शेख असे या अटक केलेल्या भोंदूबाबाचे नाव आहे. याप्रकरणी एका २६ वर्षीय महिलेने वाकड पोलिस ठाण्यात फिर्याद दिली होती. पोलिसांनी दिलेल्या माहितीनुसार, पीडित महिला काही दिवसांपासून आजारी होती. त्याचवेळी या भोंदूबाबाने तिच्याशी संपर्क साधला आणि कोणीतरी तुमच्या घरावर करणी केली आहे. माझ्या अंगात दैवीशक्ती असून तुमच्या घरावर केलेली करणी मी दूर करू शकतो. त्यासाठी तुम्हाला सात वेळा माझ्याशी शारीरिक संबंध ठेवावे लागतील, असे सांगितले. भोंदूबाबाच्या या मागणीला पीडित महिलेने नकार दिल्यावर त्या भोंदूबाबाने 'तुम्ही मी सांगितले तसे केले नाही तर तुमच्या घरावर संकट येईल आणि घरातील कोणीतरी मरेल आणि या प्रकाराची कुठेही वाच्यता केली तर तुझ्या घरातील कुणाच्यातरी जिवावर बेतेल,' असे सांगत पैशाची मागणी केली होती. त्यानंतर संबंधित बाबा काही दिवस गायब झाला होता. या काळआत पीडित महिलेच्या मैत्रिणीच्या देखील संपर्कात आला होता. या प्रकारानंतर काही महिन्यांनी महिलेने हा सर्व प्रकार आपल्या पतीला सांगितल्यानंतर वाकड पोलिस ठाण्यात फिर्याद देण्यात आली होती. त्यानंतर वाकड पोलिसांनी भोंदूबाबाविरुद्ध महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक व उच्चाटन अध्यादेशानुसार गुन्हा दाखल केला होता. रविवारी भोंदूबाबाची माहिती मिळाल्यावर वाकड पोलिसांनी त्याला अटक केली.
मोबाइल अॅप डाउनलोड करा आणि राहा अपडेट
