पुणे जिल्ह्यांतील शेकडो धार्मिक स्थळांनी केलेले अतिक्रमण नियमान्वित करण्याचा प्रस्ताव तयार करण्यात आला असून हवेली तालुक्यातील १७ अनधिकृत धार्मिक स्थळांवर कारवाई करण्याचा निर्णय घेण्यात आला आहे. यासंदर्भातील पोलिसांचा कायदा-सुव्यवस्थेबाबतचा अहवाल आल्यानंतर येत्या काही दिवसांत ही कारवाई करण्यात येणार आहे.
धार्मिक स्थळांनी केलेल्या अतिक्रमणांवर कारवाई करण्याचे आदेश सुप्रीम कोर्टाने दिले आहेत. कोर्टाच्या आदेशानुसार पुणे जिल्ह्यातील अनधिकृत; तसेच सरकारी जागांवर अतिक्रमण केलेल्या धार्मिकस्थळांची माहिती घेण्यात आली. त्यामध्ये हवेली तालुक्यात ५७८ धार्मिक स्थळांचे अतिक्रमण असल्याचे स्पष्ट झाले आहे. ही अतिक्रमणे सरसकट हटविणे शक्य नसल्याने ती नियमान्वित करता येतील का, या दृष्टीने चाचपणी करण्यात आली आहे.
अनधिकृत धार्मिक स्थळांवर कारवाई करण्यासंदर्भात जिल्हाधिकारी कार्यालयात नुकतीच एक बैठक झाली. त्यामध्ये अतिक्रमण झालेली; परंतु नियमित होऊ शकतील अशा धार्मिक स्थळांची यादी करण्यात आली. या धार्मिक स्थळांची अतिक्रमणे नियमित करण्यासंबंधी प्रशासनाकडून चाचपणी केली जात असून, त्यासंबंधी पोलिस व सार्वजनिक बांधकाम खात्याकडून अभिप्राय मागविण्यात आले आहेत. मात्र, सतरा अनधिकृत धार्मिक स्थळांवर कारवाई करण्याचा निर्णय घेण्यात आल्याचे सांगण्यात आले.
अनधिकृत धार्मिक स्थळांवर कारवाई केल्यानंतर कायदा-सुव्यवस्थेचा प्रश्न भविष्यात उद्भवू शकतो का, यादृष्टीनेही अभिप्राय घेण्यात येत आहे. या अभिप्रायानंतर प्रत्यक्ष कारवाई केली जाणार आहे. हवेली तालुक्याबरोबरच जिल्ह्यातील अन्य बारा तालुक्यांमधीलही धार्मिक स्थळांच्या अतिक्रमणांची माहिती संकलित करण्यात येत आहे. ही माहिती संकलित झाल्यानंतर त्यावरही कारवाई केली जाणार आहेत.
मोबाइल अॅप डाउनलोड करा आणि राहा अपडेट
