Suneet.Bhave@timesgroup.com
पुणे : पावसाळ्याचा हंगाम सुरू होण्यास जेमतेम १५ दिवस राहिले असताना, शहरात मोठ्या प्रमाणात खोदलेल्या रस्त्यांची दुरुस्ती आणि डागडुजी अद्याप पूर्ण झालेली नाही. शहरातील रस्ते खड्डेमुक्त असावेत म्हणून पालिकेतील पदाधिकाऱ्यांकडून वारंवार सूचना दिल्या जात असूनही स्थितीत फारसा फरक पडल्याचे जाणवत नाही. तसेच, डांबराच्या रस्त्यांवर दुरुस्तीसाठी सिमेंट आणि सिमेंटच्या रस्त्यावरील उर्वरित पॅचवर्कसाठी पेव्हिंग ब्लॉक्सचा सर्रास वापर केला जात आहे. त्यामुळे, येणाऱ्या पावसाळ्यात कोणते आणि किती रस्ते नक्की सुस्थितीत असतील, हे सांगता येणे आतातरी अवघडच आहे.
महापालिकेच्या पाणीपुरवठा आणि ड्रेनेज विभागांसह महावितरण, महाराष्ट्र नॅचरल गॅस लिमिटेड (एमएनजीएल), भारत संचार निगम लिमिटेड (बीएसएनएल) आणि खासगी केबल कंपन्यांकडून शहरात गेल्या सहा महिन्यांत खूप मोठ्या प्रमाणावर खोदाई करण्यात आली. या खोदाईप्रमाणेच शहरातील अनेक महत्त्वाचे रस्ते सिमेंट काँक्रिटचे करण्यासाठी खोदण्यात आले होते. गेल्या दोन-तीन महिन्यांच्या कालावधीत तर रस्ता खोदला नाही, असा एकही भाग शहरात उरला नव्हता. परिणामी, नागरिकांना त्याचा प्रचंड मनस्ताप सहन करावा लागला. साधारणतः दहा वर्षांपूर्वी अशाच पद्धतीने रस्त्यांवरील खड्ड्यांमध्ये मोठ्या प्रमाणात वाढ झाल्याने काँग्रेसला सत्तेपासून दूर व्हावे लागले होते. त्यामुळे, राष्ट्रवादीने तातडीने रस्त्यांच्या दुरुस्तीची, डागडुजीची कामे करा, असे फर्मान प्रशासनाला सोडले आहे. दुर्दैवाने, त्याकडे लक्ष न देता, रस्त्यांच्या दुरुस्तीची कामे अतिशय संथगतीने सुरू आहेत.
फूटपथाच्या कडेने केबलसाठी खोदाई केलेल्या रस्त्यांवर योग्य पद्धतीने डांबरीकरण करण्याऐवजी थेट सिमेंटचा थर टाकून दुरुस्ती उरकरण्याचा प्रकार महापालिकेने अनेक ठिकाणी केला आहे. तर, ड्रेनेजची खोदाई केलेल्या ठिकाणी रस्त्याच्या दुरुस्तीचे काम योग्य पद्धतीने करण्याची गरज असताना, केवळ मलमपट्टी स्वरूपात डांबराचा पॅचवर्क मारण्यात आल्याची उदाहरणे दिसून येत आहेत. यंदा पावसाळा वेळेवर सुरू होण्याची शक्यता असल्याने रस्त्यांच्या दुरुस्तीची सर्व कामे खरेतर ३१ मे पर्यंत पूर्ण होणे अपेक्षित आहे. मात्र, पालिकेचा रस्ते दुरुस्तीचा सध्याचा वेग पाहता, पुणेकरांना जूनमध्येच खड्ड्यांचा सामना करावा लागण्याची चिन्हे आहेत.
.................
पावसाळ्यात सत्वपरीक्षा
शहरातील अनेक रस्ते काँक्रिटचे करण्यासाठी पालिकेतील माननीयांचा आग्रह होता. त्यामुळे, सुस्थितीत असलेले डांबरी रस्ते खोदून तेथे काँक्रिटचे रस्ते झाले आहेत. डांबरी रस्त्यांच्या तुलनेत अनेक ठिकाणी काँक्रिटच्या रस्त्यांची लेव्हल वर-खाली झाली असून, येणाऱ्या पहिल्याच पावसाळ्यात रस्त्यांवर पाणी साठून राहणार, की रस्त्यांची उंची वाढल्याने आजूबाजूच्या घरांमध्ये पाणी शिरणार, याची परीक्षा होणार आहे. रस्त्यांवरून वाहणारे पाणी नागरिकांच्या घरांत-सोसायट्यांमध्ये शिरल्यास, त्याचा आणखी फटका पालिकेला सहन करावा लागणार आहे. तसेच, काँक्रिटच्या रस्त्यांच्या मधोमध अनेक ठिकाणी पेव्हिंग ब्लॉक्स बसविण्यात आले असून, काही रस्त्यांवर जड वाहनांची वाहतूक अधिक असल्याने हे ब्लॉक्स आत्ताच उखडले गेले आहेत.
मोबाइल अॅप डाउनलोड करा आणि राहा अपडेट
