पुरंदर तालुक्यातील जेजुरी येथील देवतालिंग कडेपठार देवस्थानच्या विश्वस्त तसेच पुजाऱ्यांच्या गैरकारभारामुळे ट्रस्टचे विश्वस्त मंडळ बरखास्त करण्याचे आदेश धर्मादाय सहआयुक्त शिवकुमार डिगे यांनी दिले. त्याचबरोबर ट्रस्टच्या प्रशासकपदी सहायक धर्मादाय आयुक्त नवनाथ जगताप यांची नियुक्ती करून संबंधितांवर फौजदारी कारवाईचे आदेश देण्यात आले आहेत.
ट्रस्टच्या कारभाराबाबत भक्तांकडून तक्रारी येत होत्या. तक्रारींची शहानिशा करण्यासाठी आयुक्तालयातील निरीक्षक रविंद्र गव्हाणे यांनी देवस्थानला भेट देऊन विश्वस्तांच्या जबाबाचा अहवाल सहायक धर्मादाय आयुक्तांकडे दिला होता. ट्रस्टचे विश्वस्त पुजारी म्हणून काम पाहतात. तसेच ट्रस्टला वर्षभरात केवळ दोन महिने १८ दिवसांचे उत्पन्न मिळते. उर्वरित उत्पन्न हे पुजारी किंवा विश्वस्त आपसात वाटून घेतात.
देवस्थानला दिलेले मौल्यवान दागिने पुजारी वाटून घेतात. मंदिराच्या आजूबाजूस अतिक्रमण वाढले असून, बेकायदा दुकानांची संख्या वाढली आहे. या बाबत ट्रस्टच्या विश्वस्तांनी कारवाई केली नसल्याचे निदर्शनास आले. तसेच, वार्षिक हिशेबात देखील मौल्यवान वस्तूंचा उल्लेख नसल्याचे आढळून आले. काही विश्वस्त बाहेरगावी राहत असून, मुख्य विश्वस्त मुंबईला राहतात. ते सहा महिन्यांत एकदा येऊन जातात, असे अहवालात आढळून आले.
या बाबी ट्रस्टच्या विकासाला मारक आहेत. तसेच विश्वस्त व पुजाऱ्यांनी ट्रस्टची योजना स्वतःच्या फायद्यासाठी केली आहे. त्यामुळे त्यांच्याकडून रकमा, दागिने आपसात वाटून घेणे ही बाब गंभीर आहे. पुजारीच विश्वस्त असल्याने ट्रस्टचे नुकसान होत आहे. विश्वस्त म्हणून काम पाहण्यास ते अपात्र आहेत. महाराष्ट्र सार्वजनिक विश्वस्त व्यवस्था अधिनियम १९५० चे कलम ४७ (ग़) आणि ४७ (२) या प्रमाणे एखाद्या विश्वस्त न्यासाचे काम पाहण्यास अपात्र असल्यास त्यांना पदावरून हटवता येते. या आर्थिक व्यवहारांची चौकशी करून दोषींवर फौजदारी कारवाई करावी, असे डिगे यांनी आदेशात म्हटले आहे.
मोबाइल अॅप डाउनलोड करा आणि राहा अपडेट