म. टा. वृत्तसेवा, दौंड
'विधिमंडळात विचारांच्या बांधिलकीपेक्षा बहुमताच्या डोक्यांची जास्त गरज असते,' अशी बोचरी टीका राष्ट्रीय समाज पक्षाचे अध्यक्ष आमदार महादेव जानकर यांनी केली. दौंड तालुक्यातील वासुंदे या दुष्काळी गावात जनहित रक्षक सेवा समितीच्या वतीने मोफत चारा छावणी सुरू करण्यात आली आहे. या छावणीला भेट देण्यासाठी 'रासप'चे पदाधिकारी आले असताना, जानकर यांनी उपस्थित शेतकऱ्यांशी संवाद साधला. या वेळी राष्ट्रीय समाज पक्षाचे दौंडचे आमदार अॅड. राहुल कुल, जनहित रक्षक सेवा समितीचे अध्यक्ष विठ्ठल थोरात, वासुंदे गावच्या सरपंच मनीषा जामले, सहकारी सोसायटीचे अध्यक्ष विलास जामले व 'रासप'चे पदाधिकारी उपस्थित होते.
या वेळी जानकर म्हणाले, 'शेतकऱ्यांच्या हिताच्या योजना राबवण्यासाठी यापुढे सरकारवर दबाव वाढवणार आहे. शेतकऱ्यांची जनावरे दुष्काळात जगवण्यासाठी मोफत चारा छावणीचा उपक्रम बहुमूल्य आहे. या उपक्रमाला हातभार लावण्यासाठी समाजातील इतर घटक पुढे येतील.'
अॅड. राहुल कुल यांनी मोफत चारा छावणी उपक्रमाचे कौतुक करून जनहित रक्षक सेवा समितीला सर्वतोपरी मदत करण्याचे आश्वासन दिले. मोफत चारा छावणीसाठी वार्ताहर हितेंद्र गद्रे, अब्बास शेख, रमेश वत्रे यांनी मदत जाहीर केली. वार्ताहर संतोष काळे, रवींद्र खोरकर, संदीप नवले, मनोज थोरात यांनी सक्रिय साह्य केले. वासुंदे गावची लोकसंख्या १७०० असून, जनावरांची संख्या ११०० आहे. सुमारे ४०० जनावरे छावणीत दाखल झाली आहेत. छावणीच्या ठिकाणी जनावरांसाठी व स्वतःसाठी निवारा तयार करण्यासाठी शेतकऱ्यांची लगबग सुरू आहे. संपूर्ण कुटुंबच छावणीच्या ठिकाणी राबताना दिसत आहे. वासुंदे गावात पिण्याच्या पाण्याचे दोन टँकर सुरू असून, विहिरींनी कधीच तळ गाठला आहे. यंदाचा पाऊस इकडे फिरकलाच नसल्याने शेती पडीक राहिली असल्याचे शेतकऱ्यांनी सांगितले.
दौंड तालुक्यात वासुंदे, रोटी, जिरेगाव, हिंगणीगाडा, कौठडी, खडकी, रावणगाव, देऊळगाव गाडा, कुसेगाव, पडवी, खोर, भरतगाव, बोरीऐंदि, ताम्हणवाडी या १५ गावांत तीव्र पाणीटंचाईमुळे पिण्याच्या पाण्याचे टँकर सुरू आहेत. हा भाग दुष्काळी पट्टा म्हणून ओळखला जातो. या सगळ्या गावांत मिळून असलेल्या जवळपास लाखभर लोकसंख्येला पाणीटंचाईचा सामना करावा लागत असल्याची माहिती गटविकास अधिकारी संतोष हराळे यांनी दिली. आणखी दहा गावांनी पिण्याच्या पाण्याची मागणी केली आहे.
मोबाइल अॅप डाउनलोड करा आणि राहा अपडेट
