म. टा. प्रतिनिधी, पुणे
उन्हा‍ळ्याच्या सुट्ट्यांमधील वाढती प्रवासी संख्या लक्षात घेऊन मध्य रेल्वेने पुणे-जबलपूर आणि पुणे-नागपूरदरम्यान प्रत्येकी दोन विशेष साप्ताहिक गाड्या सुरू केल्या आहेत, तर यशवंतपूर-बिकानेर एक्स्प्रेसला नागपूर हा अतिरिक्त थांबा देण्यात आला आहे.
पुणे-जबलपूर आणि जबलपूर-पुणे या गाड्या चार ते २८ एप्रिलदरम्यान धावणार आहेत. जबलपूरवरून सोमवारी पावणेसात वाजता सुटणारी गाडी मंगळवारी दुपारी पावणेतीन वाजता पुण्याला पोहोचेल, तर पुण्यावरून मंगळवारी सकाळी पावणेअकरा वाजता सुटणारी गाडी बुधवारी सकाळी सव्वासहा वाजता जबलपूरला पोहोचेल. आणि पुणे-नागपूर-पुणे या दरम्यान पाच ते २७ एप्रिल दरम्यान, दोन गाड्यांच्या प्रत्येकी चार फेऱ्या होणार आहेत. पुण्यावरून सहा, १३, २० आणि २७ एप्रिलला आणि नागपूरवरून पाच, १२, १९ व २६ एप्रिलला या गाड्या सुटणार आहेत.
दरम्यान, यशवंतपूर-बिकानेर एक्स्प्रेस आणि बिकानेर-यशवंतपूर एक्स्प्रेस या गाड्यांना नागपूर हा अतिरिक्त थांबा देण्यात आला आहे. त्यांची अंमलबजावणी अनुक्रमे २० व २१ मार्चपासून केली जाणार आहे. पुणे-हातिया एक्स्प्रेस व हातिया-पुणे एक्स्प्रेस या गाड्यांना राज॔नांदगाव हा थांबा देण्यात आला असून, त्याची अंमलबजावणी २२ मार्चपासून केली जाणार आहे. विशाखापट्टणम-लोकमान्य टिळक टर्मिनस (मुंबई) या गाडीला सलामकोट हा थांबा देण्यात आला आहे. त्याची अंमलबजावणी १७ मार्चपासून केली जाणार आहे. हे बदल प्रायोगिक तत्त्वावर सहा महिन्यांसाठी केले आहेत, अशी माहिती जनसंपर्क अधिकारी मनोज झंवर यांनी दिली.
---------
१७, २० ला ब्लॉक
लोणी व उरुळीकांचन स्टेशनच्या दरम्यान रेल्वे रुळाच्या दुरूस्तीसाठी १७ मार्च व २० मार्च रोजी दुपारी १२.३० ते ३.४० या वेळेत ब्लॉक घेण्यात आला आहे. त्यामुळे पुणे स्टेशनवरून दुपारी 3.१५ वाजता सुटणारी पुणे-निजामाबाद पॅसेंजर ५० मिनिटे उशिराने सुटणार आहे.
मोबाइल अॅप डाउनलोड करा आणि राहा अपडेट
