म. टा. प्रतिनिधी, पुणे वाघाचे कातडे आणि दात विक्री करण्यासाठी आलेल्या महिलेला खडक पोलिसांनी अटक केली आहे. या महिलेकडून एकूण २५ दात आणि ३३ इंच लांबीचे वाघाचे कातडे आदी अडीच लाखांचा माल जप्त करण्यात आला आहे. कोर्टाने तिला १४ मार्चपर्यंत पोलिस कोठडीत ठेवण्याचे आदेश दिले आहेत. मीरा लक्ष्मण परदेशी (वय २८, रा. सध्या महात्मा फुले मंडई, गाळा नं. १२३६, मूळ रा. फलटण, जि. सातारा) असे या महिलेचे नाव आहे. तिच्यावर खडक पोलिस ठाण्यात गुन्हा दाखल करण्यात आला आहे. या बाबत वनअधिकारी सागर होले यांनी तक्रार दिली आहे. शुक्रवार पेठेतील हॉटेल सुशीलजवळ एक महिला वाघाच्या कातड्याची विक्री करण्यासाठी येणार असल्याची माहिती खडक पोलिस ठाण्याचे पोलिस कर्मचारी अतुल भिंगारदिवे यांना मिळाली. त्यानुसार पोलिसांनी वनपरिक्षेत्र अधिकारी सागर होले यांच्यासोबत शुक्रवार पेठेत सापळा रचून महिलेस अटक केली. तिच्याकडून ३३ इंच लांब, १७ इंच रुंद, शेपटी १० इंच, मुखवट्याचे कातडे आणि २५ दात असा दोन लाख साठ हजार रुपये किमतीच माल जप्त करण्यात आला. या महिलेकडे तपास केला असता, त्यावेळी तिने कातडे विक्रीसाठी आणऱ्याचे सांगितले. या महिलेने वाघाचे कातडे कोठून आणले, तिचे साथादीर कोण आहेत, वाघाची शिकार कोठे केली, आणखी कातडी आहे का या बाबत पोलिस तिच्याकडे तपास करत आहेत. आरोपी महिलेस कोर्टात हजर केले असता सहायक सरकारी वकील योगेश कदम यांनी पोलिस कोठडी देण्याची मागणी केली. त्यानुसार कोर्टाने ती मान्य केली. खडक पोलिस ठाण्याचे वरिष्ठ पोलिस निरीक्षक रघुनाथ जाधव यांच्या मार्गदर्शनाखाली उपनिरीक्षक अनंत व्यवहारे, संजय गायकवाड, पोलिस कर्मचारी सुरेश सोनवणे, महेंद्र पवार, सर्फराज शेख, झाकिर पठाण यांच्या पथकाने ही कारवाई केली.
मोबाइल अॅप डाउनलोड करा आणि राहा अपडेट