महापालिकेच्या आगामी निवडणुकीच्या पार्श्वभूमीवर शिवसैनिकांना मार्गदर्शन करण्यासाठी शिवसेनेतर्फे 'शिवतेज' शिबिराचे आयोजन करण्यात आले आहे. सातारा रोडवरील खंबाटकी घाटाजवळील सोळशी येथे ९ ते ११ मार्च दरम्यान हे शिबिर होणार आहे. शिवसेनेचे पक्षप्रमुख उद्धव ठाकरे यांच्या हस्ते याचे उद् घाटन होणार आहे. शिवसेनेचे शहरप्रमुख विनायक निम्हण यांनी ही माहिती दिली.

शिवतेज विचार मंथन शिबिरात राजकीय सद्यस्थिती, आर्थिक, सांस्कृतिक, सामाजिक अशा विविध विषयांवरील माहितीचा अभ्यास व्हावा, तसेच पक्ष संघटन बळकट करावे, या उद्देशाने कार्यक्रमांचे आयोजन करण्यात आले आहे. महापालिका निवडणुकीसाठी 'महापौर शिवसेनेचा' ही घोषणा असणार आहे. सेनेचे पक्षप्रमुख ठाकरे उपस्थित शिवसैनिकांना मार्गदर्शन करणार असल्याचे निम्हण यांनी सांगितले. या वेळी श्याम देशपांडे, अजय भोसले, पालिकेतील सेनेचे गटनेते अशोक हरणावळ उपस्थित होते.

केंद्र व राज्यातील सरकारची धोरणे, त्यांच्या कामांचे मूल्यमापन, राज्याला शिवसेनेचीच गरज, माहिती अधिकाराचा वापर, पक्ष संघटन, शाखा व गट प्रमुखांचे महत्त्व, प्रसिद्धी माध्यमांचा उपयोग अशा विविध विषयांवर या शिबिरात मार्गदर्शन केले जाणार आहे. योग, प्राणायम, जुन्या पिढीतील शिवसेना नेत्यांचे, कार्यकर्त्यांचे मनोगत अशा अनेक गोष्टींचा यात समावेश असणार आहे.

शहरातील पर्यटनाला चालना देण्यासाठी जिल्हा नियोजन समितीने (डीपीसी) संभाजी उद्यान ते वर्तक बाग दरम्यान झुलता पूल उभारण्याचा प्रस्ताव महापालिकेला पाठविला आहे. या नवीन पुलामुळे पर्यटकांना या दोन्ही उद्यानात अगदी सहजपणे ये-जा करणे शक्य होणार आहे.

जंगली महाराज रोडवरील संभाजी उद्यान शहरातील सर्वात जुने उद्यान आहे. हे महापालिकेचे मुख्य उद्यान असून, सुमारे साडेसात एकर जागेवर हे उद्यान आहे. तर शनिवार पेठेतील ओंकारेश्वर मंदिराजवळ महापालिकेचे वर्तन उद्यान आहे. अर्धा एकर जागेत हे उद्यान उभारण्यात आले आहे. शहरातून वाहणाऱ्या मुठा नदीच्या कडेला ही दोन्ही उद्याने असल्याने एका उद्यानातून दुसऱ्या उद्यानात जाण्यासाठी ओंकारेश्वर पुलाला वेढा मारून जावे लागते. पर्यटनाला चालना देण्यासाठी या दोन्ही उद्यानाला जोडणारा झुलता पूल बांधण्याचा प्रस्ताव नुकताच डीपीसीच्या बैठकीत मान्य करण्यात आला. या पुलासाठी तब्बल पंचवीस लाख रुपयांची तरतूदही करण्यात आली आहे. हा झुलता पूल करण्याबाबतचा प्रस्ताव वाहतूक शाखेकडे पाठविण्यात येणार असल्याची माहिती महापालिका प्रशासनाकडून देण्यात आली.

झुलता पूल तयार करण्याचा प्रस्ताव महापालिकेच्या वाहतूक नियोजन विभागाकडून कडून घेऊन त्याचा अहवाल घेतला जाणार आहे. अशा पद्धतीने पूल उभारणे शक्य होइल का? याचा अभ्यास या विभागाकडून केला जाणार आहे. केवळ पंचवीस लाख रुपयांमध्ये हा पूल उभारणे शक्य होणार नाही. त्यामुळे यासाठी अधिकचा निधी मिळविण्यासाठी राज्य सरकारकडे प्रयत्न केले जाणार असल्याचे पालिकेतील वरिष्ठ अधिकाऱ्यांनी सांगितले.

अंमलबजावणीत अडचणी

पर्यटनाला चालना देण्यासाठी संभाजी उद्यान ते वर्तक उद्यान या दरम्यान झुलता पूल उभारण्याचा प्रस्ताव पुढे येत असला तरी याची अंमलबजावणी करण्यात अडचणी येण्याची शक्यता आहे. वर्तक उद्यान नदीपात्रालगत असून ते जलसंपदा विभागाच्या रेडलाइनमध्ये येत आहे. त्यामुळे या पुलाला शहरातील पर्यावरण तज्ज्ञांनी आक्षेप घेतल्यास अडचण निर्माण होणार आहे.

@timesgroup.com

पुणे : शहरातील सोसायट्यांमध्ये महापालिकेला साधा रस्ता करण्यावरही निर्बंध असताना आपल्या मतदारांना खूश करण्यासाठी महापालिकेचे कोट्यवधी खर्च करून चक्क 'टेरेस गार्डन' करण्याचा घाट नगरसेवकांनी घातला आहे. पर्यावरणाचा समतोल साधण्याच्या नावाखाली पालिकेच्या अर्थसंकल्पात ही तरतूद करण्यात आली आहे. स्थायी समितीच्या तत्कालीन अध्यक्षा अश्विनी कदम यांनी आपल्या प्रभागातील सोसायट्यांमध्ये टेरेस गार्डन तयार करण्यासाठी देऊ केलेले 'प्रोत्साहन' वादाच्या भोवऱ्यात सापडण्याची शक्यता आहे.

महापालिकेतर्फे शहरातील विविध भागात विकासाची कामे केली जातात. यामध्ये प्रामुख्याने रस्ते, पाण्याची पाइपलाइन, ड्रेनेज व्यवस्था, गार्डन, सार्वजनिक वाचनालय, वाहतूक व्यवस्था सुरळीत करण्यासाठी वेगवेगळ्या उपाययोजना या कामांचा समावेश होतो. सार्वजनिक ठिकाणी नागरिकांच्या सोयीसाठी महापालिकेच्या वतीने ही कामे केली जातात. सोसायट्यांच्या आवारात महापालिकेच्या तिजोरीतून कोणताही खर्च करता येत नाही. सोसायटीमधील रस्ता खराब झाला आहे. तो दुरुस्त करून द्यावा, अशी मागणी अनेकदा सोसायटीतील नागरिकांकडून नगरसेवकांकडे केली जाते. परंतू खासगी जागेत पालिकेच्या पैशातून कोणतीही विकास कामे करता येत नसल्याचे कारण पुढे करत पालिकेच्या लेखा व वित्त विभागाच्या वतीने या कामांसाठी निधी उपलब्ध करुन दिला जात नाही. सोसायट्यांमधील रस्त्यांची कितीही दुर्दशा झाली असली तरी पालिकेला हा रस्ता दुरुस्त करण्यासाठी कोणताही निधी देता येत नाही. मात्र, याकडे दुर्लक्ष करत पा‌लिकेच्या अर्थसंकल्पात कदम यांनी चक्क सोसायट्यांमध्येच टेरेस गार्डन करण्यासाठी तरतूद केली आहे.

कदम या प्रतिनिधित्व करत असलेल्या प्रभाग क्रमांक ६७ ब मधील 'विविध सोसायट्यांमध्ये टेरेस गार्डन करणे व पर्यावरण समतोल साधणे' यासाठी एक कोटी रुपयांची तरतूद करण्यात आली आहे. महापालिकेच्या पुढील वर्षी (२०१७) होणाऱ्या निवडणुका डोळ्यासमोर ठेवून या भागातील मतदारांना खूश करण्यासाठी हा अट्टहास करण्यात आल्याची चर्चा पालिकेत सुरू आहे. सोसायट्या या खासगी असल्याने तेथे पालिकेला कोणतीही विकास कामे करता येत नाही. त्यामुळे हा निधी खर्चाचा प्रस्ताव वित्त विभागाकडे आल्यानंतर त्याला मंजुरी देता येणार नाही, असे या विभागातील अधिकाऱ्यांनी स्पष्ट केले. हा निधी खर्ची पडत नसल्याने इतर कामांसाठी मात्र त्याचे वर्गीकरण करता येते, असेही या अधिकाऱ्यांनी स्पष्ट केले.

साडेचार कोटींची तरतूद

गेल्या आठवड्यात नव्याने उद् घाटन उद्घाटन झालेल्या सहकारनगर (प्रभाग क्रमांक ६७ ब) भागातील कै. काकासाहेब गाडगीळ उद्यानात विविध विकास कामे करण्यासाठी अर्थसंकल्पात साडेचार कोटी रुपयांची तरतूद करण्यात आली आहे. संरक्षक भिंत, मुख्य कमान, रंगरंगोटी, प्रकाश व्यवस्था करणे, लाकडी आभास करणे, विविध विकासाची कामे करणे, रंगीत कारंजे उभारणे यासाठी हा खर्च केला जाणार आहे.

म. टा. प्रतिनिधी, पुणे

संरक्षण विभागाच्या आस्थापनांच्या पाचशे मीटर परिघात असलेल्या खासगी इमारतींच्या पडछायेमध्ये अन्य प्रस्तावित बांधकाम मंजूर करण्यापूर्वी त्याची 'एनओसी' घ्यावी लागणार आहे. ही 'एनओसी' तीस दिवसांत देण्याचे बंधन संरक्षण विभागाच्या संबंधित अधिकाऱ्यांवर घालण्यात आले आहे.

संरक्षण विभागाच्या आस्थापनांभोवती बांधकाम परवानगी देण्यासाठी स्वतंत्र मार्गदर्शक सूचना आहेत. त्यात काही बदल करण्यात आली आहे. या मार्गदर्शक सूचनांची राज्यभरात एकसमान अंमलबजावणी व सुसूत्रता राहण्याच्या दृष्टीने हे बदल करण्यात आले आहेत. संरक्षण विभागाच्या आस्थापनांजवळ बांधकामांच्या सूचना या केवळ बृहन्मुंबई क्षेत्रापुरत्या होत्या. आता संपूर्ण राज्यात त्याची अंमलबजावणी होणार असून संबंधित जिल्हाधिकारी, विशेष नियोजन प्राधिकरणांना त्याची अंमलबजावणी करण्याचे आदेश देण्यात आले आहेत.

महापालिका, जिल्हाधिकारी तसेच नियोजन प्राधिकरणाने मे-२०११ पूर्वी बांधकाम परवानगी वा विकसन परवानगी दिली असेल तर त्या प्रकरणांमध्ये संरक्षण विभागाच्या ना हरकत प्रमाणपत्राची (एनओसी) आवश्यकता लागणार नाही. त्यानंतर संबंधित इमारतींच्या उंचीमध्ये वाढ झाली असल्यास त्याविषयी संरक्षण विभागाच्या मार्गदर्शक सूचनांचा अवलंब करावा अशा सूचना नगर रचना विभागाने दिल्या आहेत.

संरक्षण विभागाच्या आस्थापनांच्या पाचशे मीटर परिघात अस्तित्वात असलेल्या चार मजली किंवा त्यापेक्षा अधिक उंचीचच्या इमारतींच्या पडछायेत नवीन बांधकाम परवानगी प्रस्तावित असेल तर त्यासासाठी संरक्षण विभागाची एनओसी बंधनकारक करण्यात आली आहे. संरक्षण विभागाच्या प्राधिकृत अधिकाऱ्यांकडून याविषयी मत घेऊनच बांधकामांना मंजुरी देण्यात यावी असे नगर रचना विभागाने स्पष्ट केले आहे. तसेच महापालिका, जिल्हाधिकारी आणि विशेष नियोजन प्राधिकरणाने बांधकामाविषयी मत मागविल्यानंतर ते तीस दिवसांच्या आत देण्याचे बंधन संरक्षण विभागावर घालण्यात आले आहे.

'ऑनलाइन'साठी प्रयत्न

संरक्षण विभागाच्या आस्थापनांमध्ये सामान्य नागरिक व सरकारी कर्मचाऱ्याला एनओसीसाठी प्रवेश मिळण्यापासून अनेक अडथळ्यांना सामोरे जावे लागते. त्यासाठी ही सोय ऑनलाइन करता येईल या दृष्टीने विचार करण्यात येत असल्याचे सूत्रांकडून सांगण्यात आले.

म. टा. प्रतिनिधी, पुणे

'आसियानमधील देशांमध्ये अनेक ठिकाणी अजूनही भुसुरुंग पेरलेले आहेत. त्यामुळे निरपराधांना नाहक जीव गमवावा लागत आहे. पुण्यात झालेल्या संयुक्त सरावातून आसियान देशांनी भुसुरुंग शोधणे व नष्ट करण्याच्या सर्वोत्तम कार्यपद्धतीचा अभ्यास केला आहे. हा अभ्यास आसियान देशांसाठी महत्त्वाचा ठरेल,' अशी भावना विविध आसियान देशांच्या वरिष्ठ लष्करी अधिकाऱ्यांनी सोमवारी व्यक्त केली.

'व्हिएतनाममध्ये दुसऱ्या महायुद्धाच्या तसेच अमेरिकेसोबतच्या युद्धावेळी पेरण्यात आलेले भुसुरुंग तसेच न फुटलेला दारूगोळा अजूनही आढळून येतो. व्हिएतनामचा संपूर्ण भूभाग भुसुरुंग मुक्त करण्यासाठी ३०० वर्षांचा कालावधी लागू शकेल. त्यामुळे भुसुरुंग नष्ट करण्याचा संयुक्त सराव आमच्यासाठी महत्त्वाचा ठरला. विविध देशांच्या यासाठीच्या सर्वोत्तम कार्यपद्धती आम्हाला शिकता आल्या', असे व्हिएतनामच्या पीपल्स आर्मीचे चीफ ऑफ जनरल स्टाफ सिनियर लेफ्टनंट जनरल व्हो व्हॅन तुआन यांनी सांगितले. 'संपूर्ण जग भुसुरुंग मुक्त करण्यासाठी हा संयुक्त सराव फायदेशीर ठरेल. त्यामुळे या प्रक्रियेला गती मिळेल', असेही त्यांनी सांगितले.

शांतता मोहिमेबद्दल बोलताना तुआन म्हणाले, 'दोन वर्षांपासूनच व्हिएतनाम संयुक्त राष्ट्रांच्या शांतता मोहिमेत सहभागी होत आहे. त्यामुळे आमच्या लष्कराला शांतता मोहिमेची कार्यपद्धती शिकण्यासाठी खूप वाव आहे. त्यादृष्टीनेही आमच्या लष्कराला या संयुक्त सरावाचा फायदा झाला', असेही त्यांनी स्पष्ट केले.

'थायलंड गेल्या पंधरा वर्षांपासून भुसुरूंगांच्या समस्येशी झुंजत आहे. त्यासाठी आम्ही माइन (भुसुरुंग) अॅक्शन सेंटरची स्थापनाही केली आहे. भुसुरुंगाच्या संकटातून सुटण्यासाठी आम्हाला या संयुक्त सरावाचा फायदा होईल. आसियानच्या सहकार्याने आम्ही लगतच्या देशांमध्ये असलेली भुसुरुंगांची समस्याही सोडवू शकू', असा विश्वास थायलंडच्या माइन अॅक्शन सेंटरचे महासंचालक लेफ्टनंट जनरल वित्ताया वाचीराकूल यांनी व्यक्त केला.

'जागतिक शांततेच्या दृष्टीने या सरावाचे संयोजन करत भारतीय सरकारने महत्त्वाची भूमिका बजावली आहे. आम्ही आमचे अनुभव आसियान देशांसोबत वाटून घेण्यासाठी उत्सुक आहोत', असे दक्षिण कोरियाच्या लष्कराचे महासंचालक यून सून गु यांनी सांगितले. 'आसियान देश भुसुरुंगच्या समस्येशी झुंजत आहेत. त्याचबरोबर त्यांच्याकडे संयुक्त राष्ट्रांच्या मोहिमांचाही अनुभव नाही. त्या दृष्टीने हा सराव अत्यंत महत्त्वाचा ठरला', असे इंडोनेशियाचे ब्रिगेडिअर जेन सुनार्यो यांनी सांगितले.

भारतीय लष्कराच्या मुख्यालयातील मेजर जनरल अशोक नरुला म्हणाले, 'भारतीय लष्कराने पहिल्यांदाच अशा मोठ्या बहुराष्ट्रीय संयुक्त सरावाचे आयोजन केले. सर्व आसियान देश तसेच अन्य सहभागी देशांसाठी हा सराव अत्यंत उपयुक्त तसेच विश्वास वाढविणारा ठरला. यातून भारतीय लष्कराच्या प्रशिक्षणाचे तसेच कार्यपद्धतीचेही जागतिक पातळीवर कौतुक झाले.'

'विविध समस्यांवर लढा'

'आसियान देशांनी व्हिजन २०२५ च्या माध्यमातून विविध समस्यांवर एकत्रित लढा देण्याचा निर्णय घेतला आहे. आसियान तसेच अन्य मित्र देश कशा प्रकारे एकत्रित काम करू शकतात व आपल्या सर्वोत्तम कार्यपद्धती सादर करू शकतात, याचे दर्शन या सरावातून घडले. या माध्यमातून आम्ही लवकरच कंबोडियामध्ये आसियान रिजनल माइन अॅक्शन सेंटर उभारणार आहोत', असे आसियान सचिवालयाच्या पॉलिटिकल व सिक्युरिटी विभागाचे संचालक प्रताप परमेश्वरन यांनी सांगितले.

म. टा. प्रतिनिधी, पुणे

हेलिकॉप्टरने एका गावात उतरलेले विविध देशांचे सैन्य व शस्त्रास्त्रे...काही वेळातच गावाची टेहळणी करून उभारण्यात आलेले संयुक्त राष्ट्र संघटनेचे ठाणे...त्यानंतर आधी वाहनातून आणि नंतर पायदळाने केलेली टेहळणी...गावकऱ्यांवर स्थानिक बंडखोर किंवा अतिरेक्यांनी केलेला हल्ला...तो परतवून लावण्यासाठी पायदळाच्या तुकडीने केलेला प्रतिहल्ला आणि काही मिनिटातच मोहीम फत्ते करत गावकऱ्यांची सुटका...!

संयुक्त राष्ट्र संघटनेच्या शांतता मोहिमेतले हे प्रात्यक्षिक सोमवारी पुण्यात सादर झाले. निमित्त होते, भारतीय लष्कराच्या इतिहासातील सर्वात मोठ्या बहुराष्ट्रीय संयुक्त लष्करी सरावाचे. पुण्यातील औंध लष्करी तळावर गेले सहा दिवस सुरू असलेल्या या संयुक्त सरावाचे प्रात्यक्षिक विविध देशांचे निरीक्षक व माध्यम प्रतिनिधींसमोर सादर करण्यात आले. यामध्ये या सरावात सहभागी झालेल्या सर्व देशांचे जवान सहभागी झाले होते. या सरावामध्ये संयुक्त राष्ट्रांची शांतता मोहीम आणि भुसुरुंग नष्ट करण्याचा सराव करण्यात आला. त्याचीच प्रात्यक्षिके या वेळी सादर झाली.

सुरुवातीला संयुक्त राष्ट्रसंघातर्फे अशांतता असलेल्या एका गावामध्ये शांतिसेना पाठविण्याचा निर्णय होतो. त्यानंतर हेलिकॉप्टर व अन्य साधनांच्या साहाय्याने शांतीसेना या भागात पोहोचून संयुक्त राष्ट्रसंघाचा झेंडा व ठाण्याची उभारणी करते. विविध वाहनांच्या मोठ्या ताफ्याद्वारे या परिसराची पाहणी केली जाते. त्यानंतर पायदळाची तुकडी प्रत्यक्ष टेहळणी करते. दरम्यानच्या काळात स्थानिक गावकऱ्यांना बंडखोर किंवा अतिरेकी त्रास देऊ लागतात. पायदळाची तुकडी त्यांच्याकडील शस्त्रांच्या माध्यमातून या बंडखोरांवर हल्ला करते. यासाठी रणगाडा व चिलखती वाहनांचाही वापर केला जातो. बंडखोरांना पळवून लावले जाते, आणि परिसरात शांतता प्रस्थापित करण्याची मोहीम फत्ते होते, असे प्रात्यक्षिक या वेळी सादर झाले. त्याचबरोबर संयुक्त राष्ट्र संघटनेच्या सैन्याला शत्रू समजून विरोध करणाऱ्या स्थानिकांची दुभाषांमार्फत समजूत काढणे, मार्गातील भुसुरुंग नष्ट करण्याचे प्रात्यक्षिकही या वेळी सादर झाले.

म. टा. प्रतिनिधी, पुणे

क्रिकेट खेळताना झालेल्या वादातून एका अल्पवयीन मुलाने दुसऱ्या मुलाच्या डोक्यात बॅट मारल्याची घटना शनिवारी दुपारी नाना पेठेत घडली. याप्रकरणी समर्थ पोलिस ठाण्यात गुन्हा दाखल करण्यात आला आहे.

अरफात खान (वय १४) असे जखमी झालेल्या मुलाचे नाव आहे. याबाबत त्याची आजी आमिना खान (वय ५५, नवी नाना पेठ) यांनी तक्रार दिली आहे. पोलिसांनी दिलेल्या माहितीनुसार, अरफात आणि दुसरा अल्पवयीन मुलगा एकाच वस्तीत राहण्यास आहेत. ते एकमेकांच्या परिचयाचे आहेत. शनिवारी दुपारी तीनच्या सुमारास ते दोघे नेहमीप्रमाणे क्रिकेट खेळण्यास गेले. त्यावेळी झालेल्या वादात दुसऱ्या अल्पवयीन मुलाने अराफतच्या डोक्यात बॅट मारून जखमी केले आहे. याबाबत पोलिस उपनिरीक्षक डी. डी. शिर्के तपास करीत आहेत.

पादचाऱ्याला लुटले

'गांजा आहे का', अशी विचारणा करून एका व्यक्तीच्या खिशातील मोबाइल व रोख रक्कम जबरदस्तीने काढून घेतल्याची घटना रविवारी पहाटे पाचच्या सुमारास काँग्रेस भवन येथे घडली. याबाबत संदीप पवार (वय ३६, वालन, जि.रायगड) यांनी तक्रार दिली आहे. त्यावरून दुचाकीवरील दोन अनोळखी व्यक्तींविरुद्ध गुन्हा दाखल करण्यात आला आहे. पवार रविवारी पहाटे पाचच्या सुमारास मनपा बस थांब्याकडे पायी चालत जात होते. त्या वेळी दुचाकीवरून आलेल्या दोन अनोळखी जवळ आल्या. व्यक्तींनी गांजा आहे, का अशी विचारणा पवार यांच्याकडे केली. त्यावर गांजा नाही तंबाखू आहे, असे पवार यांनी त्यांना सांगितले. आरोपींनी पवार यांना 'तुझ्या खिशात काय आहे ते काढ,' असे म्हणून जबरदस्तीने खिशातील मोबाइल व रोख रक्कम असा पाच हजारांचा ऐवज चोरून नेला. याप्रकरणी पोलिस उपनिरीक्षक ए. डी. धस तपास करत आहेत.

डोक्यात चाकू मारला

'तू लष्कराच्या हद्दीत आला आहेस, तुझ्याकडे ओळखपत्र आहे का' अशी विचारणा करून डोक्यात चाकूने वार करून एका तरुणाला घोरपडी बाजार येथे रविवारी मध्यरात्री लुटले. याप्रकरणी वानवडी पोलिस ठाण्यात गुन्हा दाखल करण्यात आला आहे. याबाबत राहुल साठे (वय ३०, शिवाजीनगर) यांनी तक्रार दिली आहे. त्यावरून दुचाकीवरील दोन अनोळखी व्यक्तींविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, साठे रविवारी रात्री दीडच्या सुमारास घोरपडी बाजार येथून घरी पायी चालत जात होते. त्या वेळी दुचाकीवरून आलेल्या दोन व्यक्तींनी त्यांना थांबविले. 'तुझ्याकडे ओळखपत्र आहे का?, तू लष्कराच्या हद्दीत आला आहेत,' असे म्हणत डोक्यात चाकूने वार करून जखमी केले. त्यांच्या खिशातील रोख रक्कम व मोबाइल असा तीन हजारांचा ऐवज जबरदस्ती काढून नेला आहे. याप्रकरणी सहाय्यक पोलिस निरीक्षक एस. ई. खेतमाळस हे अधिक तपास करीत आहेत.

म. टा. प्रतिनिधी, पुणे

महिला रिक्षाचालक असलेली पुण्यातील पहिली रिक्षा जागतिक महिला दिनाच्या दिवशी धावणार आहे. महिला दिनाचे औचित्य साधत प्रादेशिक परिवहन विभागाकडून आज, मंगळवारी महिला उमेदवारांना रिक्षा परवाना वाटप केले जाणार आहे.

परिवहन विभागाच्या आदेशानुसार पुणे व पिंपरी चिंचवड शहरात नव्याने तीन हजार २०८ परवान्यांचे वाटप केले जाणार आहे. त्यामध्ये महिलांसाठी पाच टक्के जागा आरक्षित ठेवल्या आहेत. गेले दोन महिने परवाना वाटपाची प्रक्रिया सुरू होती. वेळापत्रकानुसार उमेदवारांच्या मुलाखती पार पडल्या आहेत. त्यामुळे पात्र महिला उमेदवारांना मंगळवारपासून परवाना वाटप केले जाणार आहे, अशी माहिती प्रादेशिक परिवहन अधिकारी जितेंद्र पाटील यांनी दिली.

दरम्यान, तीन हजार २०८ रिक्षा परवान्यासाठी २९ फेब्रुवारी ते पाच मार्च या दरम्यान उमेदवारांची मुलाखत घेण्यात आली. मात्र, या कालावधीत 3०७४ उमेदवार मुलाखतीला हजर होते. त्यामुळे गैरहजर असलेल्या १३४ उमेदवारांसाठी सात मार्चला पुन्हा मुलाखतीचे आयोजन करण्यात आले होते. मात्र, एकही उमेदवार या दिवशी मुलाखतीला उपस्थित राहिला नाही. त्यामुळे वेटिंगवर असलेल्या पहिल्या चारशे जणांना आता मुलाखतीसाठी बोलाविले जाणार आहे.

म. टा. प्रतिनिधी , पुणे

पुणे-मुंबई द्रुतगती महामार्गावरील आणि मुंबई एंट्री पॉइंटवर असलेल्या टोलनाक्यांच्या धोरणाबाबत अभ्यासासाठी नमलेल्या समितीचे अध्यक्ष आनंद कुलकर्णी राज्य सरकारला अहवाल न देताच ३१ जानेवारीला निवृत्त झाले. हा अहवाल सरकारला न दिल्यानेच टोलच्या धोरणावर निर्णय झाला नाही.

त्यामुळे टोलचा झोल सुरू आहे.

राज्य सरकारने कुलकर्णी यांना निवृत्तीनंतर मिळणारे लाभ थांबवून त्यांच्याकडून समितीच्या अहवालाची मागणी त्वरित करावी, अशी मागणी सजग नागरिक मंचचे अध्यक्ष विवेक वेलणकर आणि टोल अभ्यासक संजय शिरोडकर यांनी सोमवारी मुख्यमंत्र्यांकडे केली. 'टोलनाक्याचे कंत्राटदार टोलच्या शुल्कातून जादा पैसे कमाविण्यासाठी दररोज टोलनाक्यातून जाणाऱ्या वाहनांची आकडेवारी कमी दाखवितात. या प्रकरणाचा, टोलनाक्यांच्या धोरणाबाबत तसेच टोलनाके बंद होऊ शकतात का, याचा अभ्यास करण्यासाठी मुख्यमंत्री देवेंद्र फडणवीस यांनी जून २०१५ मध्ये सार्वजनिक बांधकाम विभागाचे तत्कालीन अतिरिक्त सचिव आनंद कुलकर्णी यांच्या अध्यक्षतेखाली समितीची स्थापना केली. ही समिती ३१ जुलै २०१५ पर्यंत संबंधित टोलनाक्यांचा अभ्यास करून अहवाल राज्य सरकारकडे देणार होती. मात्र, दिलेल्या मुदतीत हा अहवाल सरकारकडे न दिल्याने सरकारकडून ३१ ऑक्टोबर आणि ३१ डिसेंबर २०१५ अशी दोनदा मुदतवाढ देण्यात आली,' असे वेलणकर म्हणाले.

दोनवेळा मुदतवाढ मिळूनही समितीने अहवाल दिला नाही. समितीचे अध्यक्ष ३१ जानेवारी २०१६ला अहवाल सरकारला न देताच निवृत्त झाले. त्यामुळे टोलनाक्यांवर वाहनांची संख्या कमी दाखविणे तसेच अनधिकृतपणे टोलवसुली अद्याप सुरूच आहे. अहवाल मुदतीत न दिल्याने कुलकर्णी यांच्यावर सार्वजनिक बांधकाम विभागाच्या सचिवांनी कारवाई करावी, अशी विनंतीही मुख्यमंत्र्यांकडे करण्यात आली आहे.

दरम्यान, कुलकर्णी अहवाल देऊन निवृत्त झाल्याची माहिती सार्वजनिक बांधकाम मंत्री चंद्रकांत पाटील यांनी सोमवारी सायंकाळी एका वृत्तवाहिनीशी बोलताना दिली.

म. टा. प्रतिनिधी, पुणे

पोलिस खात्यात भरती झाल्यापासून प्रत्येक पोलिस अधिकारी-कर्मचाऱ्याने काय कामगिरी केली, त्याला मिळालेली पारितोषिके, शिक्षा, त्याच्याविरुद्ध सुरू असणारी चौकशी, आदी माहितीसह दर वर्षी त्यांच्या कामाचे मूल्यांकन आता 'अॅप'द्वारे करण्यात येणार आहे. त्यासाठी राज्यातील पोलिसांची माहिती संकलित करण्यात येत असून, ती प्रत्येक पोलिसाला 'अॅप'द्वारे दिसणार आहे.

अप्पर पोलिस महासंचालक (प्रशासन) व्ही. व्ही. लक्ष्मीनारायण यांनी याकामी पुढाकार घेतला असून, राज्यभरातील पोलिसांची माहिती संकलित करण्यात येत आहे. ही माहिती संकलित करून पोलिस महासंचालक कार्यालयाला पाठवण्यात येणार आहे. पोलिस महासंचालक कार्यालयाकडून सॉफ्टवेअर तयार करण्यात येत आहे. या सॉफ्टवेअरच्या आधारे 'अॅप'च्या माध्यमातून प्रत्येक पोलिसाला आपल्या मोबाइलवर नोकरीचा 'सातबारा' पहावयास मिळणार आहे.

पोलिस अधिकारी-कर्मचाऱ्यांची वैयक्तिक माहिती, त्यांनी आतापर्यंत नोकरी केलेली ठिकाणे, बढती, कामाचे मूल्यांकन करण्यासाठी वापरले जाणारे 'शीट रिमार्क', बक्षिसे, पुरस्कार, सुरू असणारी प्राथमिक चौकशी, विभागीय चौकशी, रजांची माहिती तसेच पगारात झालेली वाढ, अशी विविध माहिती या 'अॅप'द्वारे पोलिसांना पाहण्यास मिळणार आहे.

पोलिसांचे सर्व्हिस रेकॉर्ड डिजिटालाइज्ड

प्रत्येक पोलिस कर्मचारी आणि अधिकाऱ्याची माहिती पोलिस दलातील क्लार्क सर्व्हिस रेकॉर्डमध्ये भरत असतात. पोलिस दलात दाखल झाल्यानंतर पोलिसांचे रेकॉर्ड हाच त्यांचा सातबारा असतो. बढती देताना, बदली करताना, किंबहुना कुठलेही पदक देताना या रेकॉर्डला फार महत्त्व प्राप्त होते. हे रेकॉर्ड आतापर्यंत हाताने लिहिण्याची परंपरा होती. मात्र, हाताने लिहिण्यात त्याला मर्यादा येत होत्या. मानवी हस्तक्षेप आला की त्याच्याबरोबर भ्रष्टाचाराची कीडही जोडून येते. ही कीड संपवण्यासाठी अप्पर महासंचालक लक्ष्मीनारायण यांनी सर्व्हिस रेकॉर्डचे डिजिटायझेशन करण्याचा निर्णय घेतला.

असे असेल 'अॅप'

राज्यातील सुमारे पावणे दोन लाख पोलिसांना या 'अॅप'चा वापर करता येणार आहे. प्रत्येक पोलिस कर्मचाऱ्या स्वतंत्र यूजर आयडी तसेच, पासवर्ड मिळेल. त्याद्वारे प्रत्येक जण वैयक्तिक माहिती पाहू शकेल. मिळालेली बक्षिसे, पुरस्कार, पगारातील बढती वेळेत आणि बिनचूक भरली गेली आहे की नाही, हे पाहू शकेल. माहिती कधी अपडेट झाली, हे देखील यातून वरिष्ठांना समजणार आहे. माहिती तंत्रज्ञानाच्या वापराने कामात पारदर्शकता येण्यास मदत होणार आहे.

चोरट्यांकडून दहा तासांत सहा घटना; महिला हवालदिल

म. टा. प्रतिनिधी, पुणे

सोनसाखळी चोरट्यांवर नियंत्रण मिळवण्यात यश आल्याचा दावा पुणे पोलिसांकडून सुरू असतानाच रविवारी सोनसाखळी चोरट्यांनी शहरात धुडगूस घातला. सकाळी साडेदहा ते रात्री आठ या वेळेत सहकार नगर, स्वारगेट, सिंहगड, वारजे, पिंपरी पोलिस ठाण्याच्या हद्दीत सहा घटनांमध्ये पावणेपाच लाखांचे सोन्याचे दागिने चोरले.

साखळीचोरांचा बंदोबस्त करण्यासाठी शहर आणि राज्यातील पोलिस पुणे पोलिसांकडून मार्गदर्शन घेत आहेत. रविवारी शहरात दहा तासांत सहा सोनसाखळीचोरीच्या घटना घडल्या. शुभांगी जाधव या रविवारी सकाळी सव्वादहाच्या सुमारास धनकवडीतील तीन हत्ती चौकातून पायी जात होत्या. त्यावेळी दुचाकीवरून आलेल्या चोरट्यांनी त्यांच्या गळ्यातील दोन लाख रुपये किमतीचे मंगळसूत्र हिसकावले. दुपारी तीन वाजता स्वारगेट येथील म्हाडा कॉलनीत दुसरी घटना घडली. कर्वेनगर येथील ७१ वर्षीय ज्येष्ठ महिला म्हाडा कॉलनीतील सिटी इंटरनॅशनल शाळेजवळून दुपारी पायी चालत जात होत्या. त्यावेळी दुचाकीवरुन दोन चोरटे त्यांच्या जवळ आले. दुचाकीवर पाठीमागे बसलेल्या चोरट्याने हिसका मारून ६० हजार रुपयांचे त्यांचे मंगळसूत्र हिसका मारून लांबवले.

सिंहगड रोड पोलिस ठाण्याच्या हद्दीत अर्ध्या तासाच्या आत दोन चोरीच्या घटना घडल्या. वडगाव बुद्रुक येथील ८३ वर्षीय वृद्ध महिला चारच्या सुमारास सनसिटी रस्ता येथील चंद्रमा सोसायटीपासून चालत जात असताना चोरट्यांनी हिसका मारून ४५ हजार रुपयांचे मंगळसूत्र लंपास केले. एका ५० वर्षीय महिलेचे साडेचारच्या सुमारास धायरीतील बेनकर वस्ती येथे महिलेच्या गळ्यातील मंगळसूत्र हिसकावले. या महिला पीएमपीएलमधून उतरून पायी घरी जात होत्या. त्यावेळी दुचाकीवरील चोरट्याने मंगळसूत्र लंपास केले. त्यांनी आरडाओरडा केला, पण चोरटे पळून जाण्यात यशस्वी झाले. वारजे-माळवाडी येथील ज्ञानेश्वरी उद्यानासमोर दुचाकीवरील दोन चोरट्यांनी ५६ वर्षीय महिलेच्या गळ्यातील ५२ हजारांचे मंगळसूत्र जबरदस्तीने हिसका मारून नेले. रात्री आठच्या सुमारास पिंपरी येथील मासुळकर कॉलनी येथे सहावी साखळी चोरी झाली. ७८ वर्षांची वृद्ध महिला पायी जात असताना दुचाकीवरील चोरट्यांनी हिसका मारून ४८ हजार रुपयांचे मंगळसूत्र चोरून नेले. या प्रकरणी पिंपरी पोलिस ठाण्यात गुन्हा दाखल करण्यात आला आहे.

शहरातील सोनसाखळी चोरी करण्यासाठी पोलिसांकडून विविध उपाययोजना केल्या जात आहेत. शहरातील पेट्रोलिंग वाढविण्यात आली आहे. तसेच, साखळीचोरीची ठिकाणे हेरून त्या ठिकाणी गस्त घालण्यात येत आहे. त्यामुळे गेल्या दोन महिन्यात सोनसाखळी चोरीच्या घटना कमी करण्यात पोलिसांना यश आले होते. मात्र, एकाच दिवसात सहा सोनसाखळी चोरीच्या घटना घडल्यामुळे पुन्हा सोनसाखळी चोरांनी डोकेवर काढल्याचे दिसून आले आहे.

..

'बाहेरगावच्या टोळीचा उच्छाद'

शहरात रविवारी सकाळीपासून ते रात्री आठपर्यंत सहा साखळीचोरीच्या घटना घडल्या आहेत. चोरटे बाहेरगावचे असून, ते पांढऱ्या रंगाच्या मोटारसायकलवरून साखळीचोरी करीत आहेत. गुन्हे करून ते त्वरित पुण्याबाहेर जातात. पोलिस त्यांच्या मागावर असल्याचे गुन्हे शाखेचे सहायक आयुक्त राजेंद्र जोशी यांनी सांगितले.