केंद्रीय बजेटचे कॉन्फिडेरेशन ऑफ इंडियन इंडस्ट्रीने (सीआयआय) स्वागत केले आहे. विकास, गुंतवणूक, कृषी, रोजगार निर्मिती आणि सामाजिक सुरक्षेवर लक्ष केंद्रित करणारे हे बजेट असल्याची प्रतिक्रिया उद्योजकांकडून व्यक्त करण्यात आली आहे.
'सीआयआय'तर्फे बजेटवरील चर्चासत्राचे आयोजन करण्यात आले होते. या वेळी 'सीआयआय'चे पश्चिम विभागाचे अध्यक्ष आणि किर्लोस्कर ब्रदर्स लिमिटेडचे व्यवस्थापकीय संचालक संजय किर्लोस्कर, कमिन्स इंडिया लिमिटेडचे संचालक प्रदीप भार्गव, इंडिया इटनचे व्यवस्थापकीय संचालक नितीन चाळके, वेलफिल्ड फूड प्रा. लिमिटेडचे व्यवस्थापकीय संचालक अश्विनी मल्होत्रा, वर्कहार्ट कंप्रेशन इंडिया प्रा. लिमिटेडचे व्यवस्थापकीय संचालक नरसिंह राव, थरमॅक्स लिमिटेडचे कार्यकारी उपाध्यक्ष अमिताभ मुखोपाध्याय, सँडविक एशिया प्रा. लिमिटेडचे व्यवस्थापकीय संचालक पराग सातपुते आदी उपस्थित होते.
..........
शेती आणि पायाभूत सुविधांवर भर
'शेती आणि पायाभूत सुविधा देण्याकडे विशेष लक्ष केंद्रित करण्यात आले आहे. सिंचन योजना, पीक विमा यामुळे या क्षेत्राचा सकारात्मक विकास होऊ शकणार आहे; तसेच सरकारने पायाभूत सुविधांसाठी गुंतवणूक करण्याकडे लक्ष दिले असल्यामुळे आर्थिक विकास होण्यास मदत होणार आहे. ग्रामपंचायती आणि नगरपालिका या सक्षम बनविण्याकडे भर असल्याने विकासाची गती वाढू शकणार आहे.'
- संजय किर्लोस्कर, व्यवस्थापकीय संचालक, किर्लोस्कर ब्रदर्स लिमिटेड
............
संतुलित बजेट
संतुलित असे हे बजेट आहे. ग्रामीण आणि सामाजिक क्षेत्रातील वाढत्या गरजा; तसेच औद्योगिक क्षेत्राच्या अपेक्षा पूर्ण करण्यासाठी प्रयत्न करणारे बजेट आहे. चांगल्या प्रशासनासाठी तंत्रज्ञानाचा वापर करण्यास लावणारे बजेट आहे.
- प्रदीप भार्गव - संचालक, कमिन्स इंडिया लिमिटेड
...........
ग्रामीण अर्थव्यवस्थेला चालना
शेती, आरोग्य, पायाभूत सुविधा आणि सामाजिक क्षेत्रावर भर आहे. ग्रामीण अर्थव्यवस्थेला प्रोत्साहन देणारे हे बजेट संतुलित असून, स्वागतार्ह आहे.
- नितीन चाळके- व्यवस्थापकीय संचालक, इंडिया इटन
...........
फूड प्रोसेसिंग क्षेत्रासाठी उत्तम
फूड प्रोसेसिंग क्षेत्रासाठी हे बजेट स्वागतार्ह आहे. सेंद्रिय शेती क्षेत्राला चालना देणारे बजेट आहे. फूड प्रोसेसिंग उद्योग क्षेत्राला प्रोत्साहन आणि वाढीला चालना मिळू शकणार आहे.
- अश्विनी मल्होत्रा, व्यवस्थापकीय संचालक, वेकफिल्ड फूड प्रा. लिमिटेड
.................
विकासावर भर
विकासावर भर देणारे हे बजेट आहे. या बजेटमुळे शेती आणि ग्रामीण भागाचा विकास; तसेच पायाभूत सुविधा मिळू शकणार आहेत.
- नरसिंह राव, व्यवस्थापकीय संचालक, वर्कहार्ट कंप्रेशन इंडिया प्रा. लिमिटेड
..........
गुंतवणुकीला वाव
पायाभूत सुविधांमध्ये गुंतवणुकीस वाव देणारे बजेट आहे. सरकारने या क्षेत्रात एक महत्त्वपूर्ण पाऊल टाकले आहे.
- अमिताभ मुखोपाध्याय, कार्यकारी उपाध्यक्ष, थरमॅक्स लिमिटेड
..............
व्यवसायवाढीसाठी उत्तम
व्यवसाय वाढीसाठी एक चांगली सुरुवात आहे. सरकारने ग्रामीण, सामाजिक आणि पायाभूत क्षेत्रावरील खर्चाला प्राधान्य दिले आहे. ग्रामीण अर्थव्यवस्था सुधारण्यास मदत होईल, अशी आशा आहे. पायाभूत सुविधांमध्ये प्रामुख्याने रस्ते आणि रेल्वे याकडे लक्ष देण्यात आले आहे.
- पराग सातपुते, व्यवस्थापकीय संचालक, सँडविक एशिया प्रायव्हेट लिमिटेड
मोबाइल अॅप डाउनलोड करा आणि राहा अपडेट
