म. टा. प्रतिनिधी, पुणे/येरवडा
मुंबई बॉम्बस्फोट खटल्यातील शिक्षा झालेला अभिनेता संजय दत्त याची शिक्षा गुरुवारी संपणार आहे. सकाळी नऊ ते अकराच्या दरम्यान तो तुरुंगातून बाहेर पडणार असल्याचे उच्चपदस्थ सूत्रांनी सांगितले. त्याची पत्नी मान्यता आणि वकील त्याला घेण्यासाठी येरवडा तुरुंग परिसरात येणार असल्याचे वृत्त आहे. दरम्यान, संजत दत्त हा सुटणार असल्याने पोलिसांकडून तुरुंगाच्या दिशेने येणाऱ्या सर्व रस्त्यांवर चोख बंदोबस्त तैनात ठेवण्यात येणार आहे. विश्रांतवाडीकडून तुरुंगाच्या दिशेने येणारा रस्ता गर्दीची स्थिती पाहून बंद करण्याचा निर्णय घेण्यात येणार आहे. मुख्यालयातील पोलिस कर्मचाऱ्यांसह येरवडा पोलिसांतील अधिकारी-कर्मचारी गुरुवारी सकाळी सहापासून बंदोबस्तासाठी तैनात असतील, अशी माहिती उच्चपदस्थ सूत्रांनी दिली.
तुरुंगातील त्याच्या सामानाची बांधाबांधही झाली असून, लोहगाव विमानतळावरून खासगी विमानाने तो मुंबईतील सहारा विमानतळावर पोहोचेल. विमानतळावरील गेट नंबर आठने तो थेट सिद्धीविनायकाच्या दर्शनासाठी जाणार आहे. दर्शन झाल्यानंतर आई नर्गिस दत्त यांच्या मरीन लाइन येथील दफनभूमीतील कबरीचे दर्शन घेईल. दोन्ही ठिकाणचे दर्शन घेतल्यानंतर संजय बांद्रा येथील इम्पिरिअल हाइटस् या आपल्या घरी परतेल, अशी माहिती सूत्रांकडून देण्यात आली आहे.
संजय दत्तच्या सुटक्याच्या पार्श्वभूमीवर येरवडा पोलिसांकडून तुरुंगाच्या चोहोबाजूंनी चोख बंदोबस्त ठेवला जाणार आहे. तो बाहेर पडेपर्यंत तुरुंगाकडे जाणारे सर्व अंतर्गत रस्ते बंद केले जाणार असल्याची माहिती सूत्रांनी दिली. तुरुंग परिसरात कायदा सुव्यवस्थेचा प्रश्न निर्माण होऊ नये, म्हणून येरवडा पोलिसांनी कडेकोट बंदोबस्त ठेवला आहे. पोलिस उपायुक्त सुधीर हिरेमठ, खडकी विभागाच्या सहायक आयुक्त स्वप्ना गोरे, वरिष्ठ पोलिस निरीक्षक संजय पाटील, विलास सोंडे यांच्या नेतृत्वाखाली पंधरा अधिकारी आणि शंभर हून अधिक कर्मचारी सकाळी सहा वाजल्यापासून बंदोबस्तासाठी असणार आहेत. तुरुंग परिसरातील १५ रस्त्यांवर पोलिसांची विविध तुकड्या लक्ष ठेवणार आहे. विश्रांतवाडी, प्रतीक नगरकडून जेलच्या समोरून जाणार रस्ता बंद केला जाणार असल्याने नागरिकांनी पर्यायी रस्त्याचा वापर करण्याचे आवाहन पोलिसांनी केले आहे.
संजय दत्तच्या सुटकेविरोधात याचिका
अभिनेता संजय दत्त आज, गुरुवारी शिक्षासवलतीमुळे तुरुंगातून सुटणार असतानाच प्रदीप भालेकर यांनी पुन्हा एकदा त्याच्या शिक्षेला आव्हान देणारी जनहित याचिका केली आहे. त्यावर प्राथमिक सुनावणी होण्याची शक्यता आहे.
संजयला पाच वर्षांची शिक्षा झालेली असताना राज्य सरकारकडून त्याच्यावर मेहेरनजर दाखवली जात आहे. चांगल्या वर्तणुकीच्या नावाखाली त्याला शिक्षेत सवलत दिली जात आहे. परंतु, त्याच्याप्रमाणे कित्येक कैदी चांगल्या वर्तणुकीबद्दल अशा शिक्षासवलतीसाठी पात्र असताना त्यांना हा लाभ दिला जात नाही. मग संजयलाच का, असा सवाल भालेकर यांनी याचिकेत उपस्थित केला आहे.
मोबाइल अॅप डाउनलोड करा आणि राहा अपडेट
