म. टा. प्रतिनिधी, पुणे
मराठी भाषेचा, मराठी साहित्याचा उत्सव साजरा करणारी 'महाराष्ट्र टाइम्स' ची मैफल सर्वांसाठी खुली आहे. नवोदितांपासून दिग्गज साहित्यिकांपर्यंत, भाषेच्या अभ्यासकांपासून दिग्गज कवींपर्यंत अनेक जण रसिकांसाठी ही मैफल रंगविणार आहेत. २७ आणि २८ फेब्रुवारी रोजी पुण्यातील डेक्कन जिमखाना परिसरातील गोखले इन्स्टिट्यूटच्या आवारात हा साहित्यसोहळा आयोजिण्यात आला आहे.
ज्येष्ठ साहित्यिक रंगनाथ पठारे यांचे चिंतन, तीन परिसंवाद, लेखनविषयक चार कार्यशाळा, कविता आणि गीतांबाबतची तीन सादरीकरणे, खास कवितावाचनासाठी चालू राहणारा कवी कट्टा आणि पुस्तक प्रदर्शन असा भरगच्च कार्यक्रम या साहित्योत्सवात होणार आहे. मराठी भाषा दिनी म्हणजेच २७ फेब्रुवारी रोजी या मैफलीचे उद्घाटन होणार आहे. आपल्या राजकारणाद्वारे मराठीचा मुद्दा मांडणारे नेते, महाराष्ट्र नवनिर्माण सेनेचे प्रमुख राज ठाकरे यांच्या हस्ते सकाळी साडेदहा वाजता उद्घाटन होणार आहे. मराठी भाषेच्या राजकारणावर ते भाष्य करणार आहेत. २८ फेब्रुवारी रोजी सायंकाळी साडेपाच वाजता रंगनाथ पठारे यांच्या उपस्थितीत मैफलीचा समारोप होणार आहे. मराठी भाषेबद्दल, साहित्याबद्दल आणि आपल्या साहित्यकृतींबद्दल ते बोलणार आहेत. या मैफलीच्या निमित्ताने 'मटा'ने आयोजिलेल्या लघुत्तम कथा आणि लघुकथा स्पर्धांतील विजेत्यांना त्यांच्या हस्ते पारितोषिके दिली जाणार आहेत.
शनिवारी, उद् घाटनानंतर 'आम्ही काय लिहतो आणि काय वाचतो' या विषयावर परिसंवाद असून, साहित्य अकादमी विजेते लेखक रवी कोरडे, अभिनेत्री विभावरी देशपांडे, उत्पल चंदावर, जुई कुलकर्णी त्यात सहभागी होणार आहेत. त्यानंतरच्या सत्रात मराठी भाषेबाबतची चर्चा होणार आहे. 'अभिजात मराठी, जागतिक मराठी' हा चर्चेचा विषय असून, ज्येष्ठ अभ्यासक हरी नरके, शंतनू खेर आणि सुनीला गोंधळेकर त्यात सहभागी होणार आहेत. या खेरीज मराठी शिकण्यासाठी पुण्यात आलेले काही परदेशी विद्यार्थीही या वेळी मनोगत व्यक्त करणार आहेत. याच दिवशी सायंकाळी सहा वाजता संगीतकार सलील कुलकर्णी यांचा 'कवितेतून गीताकडे' हा कार्यक्रम होणार आहे.
रविवारी, २८ फेब्रुवारी रोजी सकाळी साडेदहा वाजता डॉ. आशुतोष जावडेकर यांचा 'लयपश्चिमा' हा कार्यक्रम होणार आहे. त्यानंतर ऐतिहासिक साहित्याबाबत परिसंवाद होणार असून, त्यात माजी संमेलनाध्यक्ष डॉ. सदानंद मोरे, इतिहासाचे अभ्यासक प्रा. राजा दीक्षित आणि प्रकाशक योगेश नांदूरकर सहभागी होणार आहेत. दोन्ही दिवशी दुपारी कविकट्टा राहणार असून, रविवारी सायंकाळी रामदास फुटाणे राजकीय भाष्य कवितांचे वाचन करणार आहेत. त्या दिवशी सायंकाळी सहा वाजता चंद्रशेखर गोखले 'मी माझा' हा कार्यक्रम सादर करणार आहेत. मटाच्या या मैफलीचा तपशीलवार कार्यक्रम आजच्याच अंकात पान क्रमांक ५ वर प्रसिद्ध करण्यात आला आहे.
मोठा प्रतिसाद
साहित्य मैफलीच्या निमित्ताने आयोजिण्यात आलेल्या कथास्पर्धेला मोठा प्रतिसाद मिळाला आहे. लेखनविषयक चारही कार्यशाळांनाही तितकाच जोरदार प्रतिसाद आहे. अधिकाधिक साहित्यप्रेमींना या कार्यशाळेत सहभागी होता यावे म्हणून नावनोंदणी न केलेल्यांनाही त्यांत प्रवेश देण्यात येणार आहे. त्यामुळे आयत्या वेळी आलेल्यांनाही कार्यशाळेस उपस्थित राहता येणार आहे.
