सहलपरवानगीसाठी हमीपत्र लिहून देण्याची अट
म. टा. प्रतिनिधी, पुणे
सहलींच्या परवानगीसाठी मुख्याध्यापक वा प्राचार्यांना शंभर रुपयांच्या बाँड पेपरवर हमीपत्र लिहून देण्याची सक्ती करणाऱ्या नियमावलीमध्ये अखेर गुरुवारी सुधारणा करण्यात आली. बाँड पेपरची अट नियमावलीमधून वगळण्यात आली आहे. त्याऐवजी केवळ हमीपत्र लिहून देण्याची अट नव्याने समाविष्ट करण्यात आली आहे. या पूर्वीच्या नियमावलीतील बहुतांश नकारात्मक सूचना काढून त्या ऐवजी पुरेशी काळजी घ्यावी, अशी सुधारणाही नव्या नियमावलीद्वारे करण्याचा निर्णय शिक्षण विभागाने घेतला.
मुरूड येथे झालेल्या दुर्घटनेमध्ये आबेदा इनामदार कॉलेजच्या १४ विद्यार्थ्यांचा बुडून मृत्यू झाला होता. त्या पार्श्वभूमीवर पुणे विभागीय शिक्षण उपसंचालक रामचंद्र जाधव यांनी २७ सूचनांचा समावेश असणारी सहल नियमावली प्रसिद्ध केली होती. पुणे विभागातील शाळा आणि ज्युनिअर कॉलेजांपुरत्या मर्यादीत या नियमावलीविषयी राज्यभरातून तीव्र प्रतिक्रिया उमटल्यामुळे त्यात सुधारणा करण्याचा निर्णय उपसंचालकांनी घेतला होता. त्यासाठी गुरुवारी आयोजित बैठकीत शिक्षक आणि संस्थाचालक प्रतिनिधींशी झालेल्या चर्चेनंतर नियमावलीमध्ये सुधारणा करण्यात आल्या. प्रोग्रेसिव्ह एज्युकेशन सोसायटीचे कार्याध्यक्ष डॉ. गजानन एकबोटे, मॉडर्न कॉलेजचे प्राचार्य डॉ. राजेंद्र झुंझारराव आदी या वेळी उपस्थित होते.
नुकत्याच काढण्यात आलेल्या नियमावलीच्या विषयापासूनच सुधारणा सुचविण्यास सुरुवात झाली.त्यानुसार यापुढील काळात ही नियमावली शाळांनी सहलींसंबंधात दक्षता व काळजी घेण्याविषयीची नियमावली म्हणून ओळखली जाईल. दहा विद्यार्थ्यांमागे एक शिक्षक पाठविण्याची अट आता किमान वीस विद्यार्थ्यांमागे एक शिक्षक पाठविण्यापर्यंत शिथिल करण्यात आली आहे. सहलीला जाणाऱ्या विद्यार्थ्यांना मोबाइलच्या वापराची मुभा दिली जाणार असून, गरजेनुसार पालकांच्या संपर्कात राहण्याच्या सूचना दिल्या जाणार आहेत. हायस्कूलच्या विद्यार्थ्यांना ट्रेकिंग, जलक्रीडा आदी उपक्रमांसाठी परवानगी न देण्याचा निर्णय बदलून, पुरेशी काळजी घेऊन परवानगी देण्यात येणार आहे. सहलीचा कालावधी आणि मुक्काम याचा विचार करताना विद्यार्थ्यांचा शैक्षणिक अभ्यासक्रम आणि वयानुसार निर्णय घेण्याची सूचना करण्यात आली आहे. सहलीसाठी योग्य शुल्क घेण्यात यावे, प्राथमिक शाळांचे वर्ग वगळून माध्यमिक आणि उच्चमाध्यमिक वर्गांना राज्याबाहेरील सहलींसाठी पुरेशी काळजी घेऊन परवानगी द्यावी,असा नियमही करण्यात आला आहे.
000
पालकांच्या अनुपस्थितीत जबाबदारी निश्चिती
या बैठकीमध्ये पालकांच्या जबाबदारीच्या संदर्भाने चर्चा झाली असली, तरी या चर्चेमध्ये कोणत्याही पालक संघटनेला बोलविण्यात आले नसल्याचे दिसून आले. त्या विषयी प्रश्न उपस्थित केल्यानंतर उपस्थित शिक्षक पालकांचेही प्रतिनिधी असल्याचे उपसंचालकांकडून सांगण्यात आले. सहलीमध्ये विद्यार्थिनींचा सहभाग असल्यास शक्यतो एक महिला पालक प्रतिनिधी सहलीसोबत असावा, सहलीमध्ये पालक प्रतिनिधी म्हणून पालक-शिक्षक संघातील पालक प्रतिनिधीचा समावेश असावा, अशी सुधारणा नव्या नियमावलीमधून करण्यात येणार आहे.
000
कठोर शब्द वगळला
शाळेच्या शिक्षकांच्या निष्काळजीपणामुळे अपघात झाल्यास संबंधित शिक्षक, मुख्याध्यापक, प्राचार्य, संस्थेचे संबंधित जबाबदार पदाधिकारी यांच्यावर नियमानुसार कायदेशीर वा कठोर कारवाई करण्याचा नियम यापूर्वीच्या नियमावलीमध्ये होता. मात्र या बैठकीत शिक्षक संघटनांच्या प्रतिनिधींनी कठोर या शब्दाला आक्षेप घेतल्याने नव्या नियमावलीमध्ये केवळ कायदेशीर कारवाई असा उल्लेख ठेवण्याचा निर्णय घेण्यात आला. तसेच, विद्यार्थ्यांना त्रास झाल्याचे दिसल्यास संबंधित जबाबदार शिक्षक, मुख्याध्यापक, प्राचार्य यांच्याविरुद्ध चौकशीअंती दोषी आढळून आल्यास कडक कारवाई करण्याचा नियमही नव्या नियमावलीमध्ये समाविष्ट करण्यात आला.
