'अंजुमन-ए-इस्लामने गेल्या नव्वद वर्षांत व्यक्तीला मोठे करण्यापेक्षा संस्थेला मोठे करण्याचे काम केले आहे. संस्थेने अनाथ मुलींना शिक्षणासोबतच जीवनातील हक्क, स्वातंत्र आणि स्वतःच्या पायावर उभारण्यासाठी मोलाची मदत केली आहे,' या शब्दांत खासदार सुप्रिया सुळे यांनी संस्थेचे कौतुक केले. शहरातील 'अंजुमन ए इस्लाम' संस्थेच्या 'पीर मोहम्मद अनाथालया'ने यंदा नव्वदीत पदार्पण केले. त्या निमित्त अनाथालयातील मुलींसाठीच्या नवीन कम्प्युटर विभागाचे आणि मीना बाजारचे उदघाटन श्रीमती सुळे यांच्या हस्ते बुधवारी करण्यात आले. या वेळी संस्थेचे अध्यक्ष डॉ. झहीर काझी, पुणे कॅम्पसच्या अध्यक्षा नाझुरा सत्तार, व्यवस्थापकीय सदस्य हसीब फकीह, मुनीर चिनॉय, शाह सुलतान चिनॉय आदी उपस्थित होते. सुळे यांच्या हस्ते शाळा ,अनाथालयाच्या माहिती पुस्तकाचे प्रकाशनही करण्यात आले. 'देशात मुलींची संख्या झपाट्याने घटू लागल्यानंतर सरकारला सक्तीने स्रीभ्रूण हत्या कायदा करावा लागला. त्याचप्रमाणे महिला सशक्तीकरणाच्या योजना राबविण्यात आल्या. मात्र, हाच विचार स्वातंत्र्यपूर्व कालखंडात करण्याचे धाडस अंजुमन ए इस्लामने दाखवले. संस्थेने अनाथ मुली आणि स्रियांचा विचार करून अनाथालयाची केलेली स्थापना उल्लेखनीय आहे,' असे सुळे यांनी स्पष्ट केले. वली मोहम्मद आणि दोस्त मोहम्मद या दोन भावांनी एकत्र येऊन अनाथाश्रमची उभारणी केली. अनाथालय उभारणीसाठी वली मोहम्मद यांनी रकमेची, तर दोस्त मोहम्मद यांनी जमिनीची मदत केली. गरीब अनाथ मुलींना शिक्षण देण्यासोबतच त्यांचे राहणीमान, हक्क मिळवून देण्यासाठी संस्था कार्यरत आहे. शिक्षण पूर्ण केलेल्या मुलींना पायावर उभे राहता यावे, या हेतूने त्यांना विविध व्यावसायिक प्रशिक्षण दिले जाते. मागील काही वर्षांपासून इंग्रजी शाळांमुळे मराठी माध्यमातील शाळांतील मुलांची संख्या घटू लागली आहे. मात्र, या उलट ऊर्दू शिकणाऱ्यांची संख्या वेगाने वाढत असल्याचे सुळे यांनी सांगितले. .. अंजुमन-ए-इस्लाम संस्थेला पंचवीस लाखांचा निधी देणारे शरद पवार हे एकमेव राज्याचे मुख्यमंत्री आहेत. पीर मोहम्मद अनाथाश्रमाची १९२५मध्ये स्थापना झाली. २३ मुलींवरून सुरुवात होऊन आज ही संख्या १७०वर गेली आहे. प्रसिद्ध अभिनेते दिलीप कुमार, कादर खान, तब्बसुम हे अंजुमनचे माजी विद्यार्थी आहेत. संस्थेच्या पाच विद्यार्थ्यांनी भारतीय क्रिकेट संघात स्थान मिळवले आहे. भविष्यात मुलींना उच्च शिक्षण देण्याचा मानस आहे. - डॉ. झहीर काझी, अध्यक्ष, अंजुमन-ए-इस्लाम
मोबाइल अॅप डाउनलोड करा आणि राहा अपडेट
