स्फोटांच्या एकापाठोपाठ आलेल्या आवाजांनी चार दिवसांपूर्वी दुपारी रहाटणी, काळेवाडी, पिंपळेसौदागरसह पश्चिम पुणे चांगलेच हादरले होते. 'रेड झोन' पट्ट्यातील दिघी मॅगझिन आणि परिसरातील नागरिकांना अशा प्रकारांच्या आवाजाची आता सवय झाली आहे. परंतु, सलग चार-पाच स्फोटांच्या गूढ आवाजांनी मध्यवर्ती भागातील नागरिकांची धास्ती अजूनही कायम आहे. मध्यंतरी कोर्टाच्या निर्देषांचा विपर्यास करून बंद करण्यात आलेल्या कुंजीरवस्ती ते रक्षक चौकाच्या आसपास देखील हा गूढ आवाजाची दोरदार चर्चा होती.
अनेकजण गुरुवार असल्याने (२८ जानेवारी) घरी होते. दुपारी दीडच्या सुमारास एक जोरदार आवाज झाला. स्फोटासारखा आवाज असल्याने अनेकांच्या मनात संशयाची पाल चुकचुकली. आवाज कशाचा हे कळायच्या आता सलग चार-पाच वेळा स्फोटांसारखे आवाज झाले आणि रहाटणी, काळेवाडी मधील नागरिकांनी रस्त्यावर धाव घेतली. अनेकांच्या घरांच्या काचांना तडे गेले. तर इमारती आणि रस्ते हादरल्याचा अनुभव आल्याचे बरेच जण सांगत होते. औंधपासून रहाटणी, काळेवाडी हे अंतर जवळ आहे. मात्र, कोथरूड आणि वारजे येथे देखील काहींनी स्फोटाचे आवाज ऐकले. घरात बसलेल्यांना हा आवाज अधिक जाणवला होता. रक्षक चौकाजवळील औंध येथील लष्कराच्या जागेत १८ देशांचा संयुक्त युद्ध सराव नियोजित असून, त्याचा हा आवाज असावा असा तर्क काढण्यात आला. पण, त्यानंतर कोणताही युद्ध सराव सुरू नसल्याचे सांगितले होते. त्यामुळे या आवाजाचे गूढ अजूनच वाढले.
आळंदी रस्त्यावर 'दिघी मॅगझिन'मुळे दिवसातून किमान आठ-दहा वेळा तरी अशा प्रकारचे मोठे आवाज होता. घरे हादरतात. नव्याने राहण्यात आलेल्यांची या भागात पुरती भंबेरी उडते. येथील अनेकांच्या घरांना-इमारतींना भेगा पडल्या आहेत. परंतु, याची आता स्थानिकांना सवय झाली आहे. रेड झोन भागात बांधकाम होऊ नये हे सांगण्याचा हेतू देखील हाच असल्याचे जाणकारांचे मत आहे.
मध्यंतरी बोपखेलकरांसाठी नदीपात्रातून झुलता पूल बांधण्यात आला. तो सध्या दुरुस्तीसाठी बंद आहे. 'नो-डेव्हल्पमेंट झोन' बदलून आता बोपखेलसाठी पूल बांधण्यात येणार आहे. त्यामुळे या पुलाच्या आणि पर्यायी रस्त्यावर देखील हादरे जाणवण्याची शक्यता नाकारता येत नाही. सैन्याच्या व्यापलेला बराच परिसर पुणे, पिंपरीत आहे. प्रत्येक ठिकाणी सराव अथवा दारूगोळा आहेच असे नाही. त्यामुळे अशा प्रकारचे आवाज फार तर खडकी, देहूरोड आणि दिघी मॅगझिन या पट्ट्यातच अनुभविल्याचे सांगितले जाते. परंतु, मध्यवस्तीत हादरे जाणवतात आणि या आवाजाशी काहीच संबंध नाही असे लष्कराकडून सांगण्यात येत असल्याने भीतीचे वातावरण कायम आहे.
मोबाइल अॅप डाउनलोड करा आणि राहा अपडेट
