पुणेकरांच्या हिताचे निर्णय नागरिकांर्यंत तातडीने पोहोचावे, यासाठी खासगी कंपनीमार्फत सोशल मीडियाचा सेतू वापरण्याचा निर्णय महापौरांच्या अंगलट आल्याची माहिती समोर आली आहे. संबंधित कंपनीने ट्विटरवर कोणतीही माहिती न दिल्याची कबुली दिली असून, महापौरांच्या दैनंदिन कार्यक्रमांपैकी मोजक्याच कार्यक्रमांची माहिती फेसबुकवर देण्यात आल्याचे स्पष्ट झाले आहे. पालिकेने संबंधित कंपनीचे बिल अद्याप अदा केले नसल्याने पूर्वीप्रमाणेच हे काम अंतर्गत विभागाकडूनच करून घेण्यात यावे, अशी मागणी केली जात आहे. नागरिकांकडून मोठ्या प्रमाणावर सोशल मीडियाचा वापर केला जात असल्याने धोरणात्मक निर्णयांची माहिती तातडीने उपलब्ध होण्यासाठी स्वतंत्र व्यवस्था कार्यान्वित करण्याचे आदेश महापौर दत्तात्रय धनकवडे यांनी दिले होते. त्यानुसार, खासगी कंपनीकडून हे काम करून घेण्याचा निर्णय घेण्यात आला. परंतु, मोजके अपवाद वगळता संबंधित कंपनीने महापौरांशी संबंधित 'अपडेट' देण्यात टाळाटाळ केल्याचे दिसून आले. महापौरांचे 'ट्विटर हँडल' जुलैपासून 'अपडेट' नसल्याचे स्पष्ट झाले आहे. 'महाराष्ट्र टाइम्स'ने त्याकडे लक्ष वेधल्यानंतर स्थायी समितीमध्ये महापौरांच्या सोशल मीडिया सांभाळणाऱ्या कंपनीच्या कामाचा सविस्तर अहवाल देण्याची मागणी केली होती. या अहवालातच, ट्विटरवर माहिती देण्यात आली नसल्याबद्दल संबंधित कंपनीने खंत व्यक्त केली आहे. धनकवडे यांच्या नावाने सुरू असलेले 'फेसबुक पेज' कालांतराने 'महापौर, पुणे' अशा नावाने चालविले जात असल्याचेही त्यांनी स्पष्ट केले आहे. १२ सप्टेंबर ते १९ डिसेंबरच्या सुमारे सव्वा दोन महिन्यांच्या कालावधीत संबंधित कंपनीने फेसबुक पेजवर ३३ 'अपडेट' टाकल्याची माहिती दिली आहे. परंतु, महापौरांच्या दैनंदिन कार्यक्रमांची आणि पालिकेतर्फे नागरी हितासाठी घेण्यात येत असलेल्या निर्णयांची-उपक्रमांची संख्या लक्षात घेता, हे अपडेट अत्यंत अपुरे असल्याची टीका केली जात आहे. या कंपनीने अद्यापपर्यंत करारनामाही केला नसल्याने पूर्वीप्रमाणेच पालिकेच्या खात्याकडूनच सोशल मीडियावर 'अपडेट' टाकण्यात यावे, अशी मागणी होत आहे.
मोबाइल अॅप डाउनलोड करा आणि राहा अपडेट