पिंपरी-चिंचवड महापालिकेच्या पाच शाळांमध्ये शिक्षण मंडळ आणि रोटरी क्लब ऑफ पिंपरी टाउन यांच्यावतीने प्रायोगिक तत्त्वावर राबविण्यात येणाऱ्या ई-लर्निंग उपक्रमाचा गुरुवारी (सात जानेवारी) प्रारंभ झाला. त्याअंतर्गत महापौर शकुंतला धराडे आणि शिक्षण मंडळाचे सभापती चेतन घुले यांच्या हस्ते सेटचे वाटप झाले. महापालिकेच्या सांगवी, वाल्हेकरवाडी, मोशी, पिंपळेगुरव आणि बोपखेल या शाळांमध्ये ई-लर्निंगचा उपक्रम राबविण्यास शिक्षण मंडळाने नुकतीच मंजुरी दिली होती. त्यानुसार 'रोटरी डिस्टन्स एज्युकेशन प्रोग्रॅम' (आरडीईपी) अंतर्गत उपक्रम राबविला जाणार आहे. त्यात सर्वच इयत्तांच्या अभ्यासक्रमांचा समावेश असणार आहे. प्रायोगिक तत्त्वावरील या उपक्रमाच्या यशस्वीतेनंतर तो सामाजिक संस्थांच्या मदतीने महापालिकेच्या शहरातील अन्य शाळांमध्येही राबविण्याचा विचार आहे. पिंपळेगुरव आणि सांगवी येथील शाळांमध्ये ई-लर्निंगसाठी आवश्यक सेट महापौर धराडे आणि सभापती घुले यांच्या हस्ते देण्यात आले. त्यामध्ये एक टीव्ही स्क्रिन, एक मोठा स्क्रिन, प्रोजेक्टर, की-बोर्ड, सीपीयू आणि इतर आवश्यक साहित्यांचा समावेश आहे. कार्यक्रमास स्थायी समितीचे अध्यक्ष अतुल शितोळे, नगरसेवक राजेंद्र जगताप, नगरसेविका सुषमा तनपुरे, शिक्षण मंडळाचे उपसभापती नाना शिवले, विष्णू नेवाळे, सुदाम ढोरे, मुख्याध्यापिका हिरा आभाने, कल्पना शितोळे, क्लबचे चंद्रुशेठ चंदनानी, भाऊसाहेब पांगारे, अनिल शर्मा उपस्थित होते. माहिती तंत्रज्ञानाच्या युगात महापालिका शाळांतील विद्यार्थ्यांना अत्याधुनिक पद्धतीने शिक्षण देण्यासाठी ई-लर्निंग उपक्रम सुरू करण्यात आल्याचे घुले यांनी सांगितले. तसेच, या उपक्रमासाठी रोटरी क्लब ऑफ पिंपरी टाउनने पुढाकार घेऊन मदत केल्याबद्दल आभार व्यक्त केले. या प्रकारचा उपक्रम महापालिकेच्या सर्वच शाळांमध्ये सुरू करण्यासाठी मदत करावी, अशी मागणीही या वेळी करण्यात आली. त्याचा विचार करण्याचे आश्वासन चंदनानी यांनी या वेळी दिले.
मोबाइल अॅप डाउनलोड करा आणि राहा अपडेट
