नववर्षातील पहिला हॅपी स्ट्रीट पिंपळे सौदागर येथे रविवारी मोठ्या उत्साहात साजरा झाला. हॅपी स्ट्रीटवर हॅपी न्यू इयरच्या शुभेच्छा देत सर्वांनी फुलऑन कल्ला केला. सेल्फी व ग्रुफ्फी काढतच अनेकांनी नेक्स्ट संडेचे प्लॅनिंग करत आठवड्याभराचा शिणवटा दूर केला. दरवेळेसप्रमाणे झुम्बा डान्सला अबालवृद्धांची गर्दी सुरुवातीपासूनच वाढत गेली. सात वाजल्यापासून दहा वाजेपर्यंत अनेक स्टेप्स करत नवा जोश अनुभवायास मिळाल्याचे समाधान अनेकांच्या चेहऱ्यावर दिसत होते.
पुणे पोलिस, पुणे वाहतूक पोलिस, पुणे व पिंपरी-चिंचवड महानगरपालिका, टाइम्स ऑफ इंडिया, महाराष्ट्र टाइम्स आणि व्हिजे डेव्हल्पर्स यांच्या प्रयत्नातून आयोजित करण्यात आलेला हॅपी स्ट्रीट या उपक्रमांच्या माध्यमातून नागरिकांना वाहतूक कोंडीऐवजी नागरिकांनी गजबलेल्या रस्त्याचा अनुभव घेतला. आठवड्यातील सहा दिवस सकाळपासून वाहनांच्या गर्दीने गजबजलेल्या नाशिक फाट्याजवळील पिंपळे सौदागर रस्त्यावर येथील शिवार गार्डन चौक ते कोकणे चौक येथे रविवारी (३ जानेवारी) गुलाबी थंडीमध्ये नागरिकांनी उत्स्फूर्त प्रतिसाद दिला. सकाळी सात वाजल्यापासून चिमुरड्यांपासून ज्येष्ठ नागरिकांपर्यंत सहकुटुंबाने हॅपी स्ट्रीटवर हजेरी लावली.
हॅपी स्ट्रीटसाठी राखीव रस्त्यावर सकाळपासूनच गर्दी होऊ लागली होती. हॅपी स्ट्रीटअंतर्गत आयोजित करण्यात आलेल्या झुम्बा, एरोबिक्स आणि फिटनेस अरेना, योगसाधना, फुटबॉल, बॅडमिंटन, सायकलिंग, स्केटिंग, जेंबेवरील ताल, फन झोन, बचपन गल्ली आणि किड्स कॉर्नर, मेडिटेशन झोन, आर्ट झोन सारखे विविध उपक्रम एकाच वेळी आणि एकाच ठिकाणी पिंपळे सौदागरवासीयांना अनुभवायला मिळाले. ताल, पॉट पेटिंग सारख्या विविध कला प्रकारांचा आनंद देखील या वेळी घेतला.
झुम्बापासून विविध फन झोनला झालेली गर्दी प्रत्येकजण आपल्या स्मार्टफोनमध्ये कैद करत होता. फोटो आणि व्हिडिओचे शेअरिंग तसेच सोशल मीडियावर अपलोडिंग करत अनेक जण एकमेकांना ते टॅग करत होते. दिवसेंदिवस वाढत जाणाऱ्या बिझी शेड्यूलमुळे कुटुंबाला एकत्रित वेळ हॅपी स्ट्रीटमुळे मिळत असल्याने पिंपळे सौदागर 'हॅपी'झाले होते.
मोबाइल अॅप डाउनलोड करा आणि राहा अपडेट