म. टा. प्रतिनिधी, पुणे
'उच्चशिक्षण व्यवस्थेत कौशल्यावर आधारित शिक्षणप्रणाली विकसित करण्याची आवश्यकता आहे. शिक्षणामुळे विकासाची दारे खुली होतात. त्यासाठी कौशल्य शिकवणारी आणि संशोधनावर भर देणारी शिक्षणप्रणाली कशा प्रकारे विकसित करता येईल, याचा गांभीर्याने विचार होणे आवश्यक आहे,' असे मत राज्यपाल सी. विद्यासागर राव यांनी शनिवारी व्यक्त केले. याबाबत मुख्यमंत्र्‍याशी चर्चा करणार असल्याचेही त्यांनी सांगितले.
डेक्कन एज्युकेशन सोसायटीतर्फे फर्ग्युसन कॉलेजच्या स्थापनादिनाचे औचित्य साधत सोसायटीचे पहिले अध्यक्ष राजर्षी छत्रपती शाहू महाराज यांच्या सन्मानार्थ पहिला श्रीमंत राजर्षी शाहू छत्रपती पुरस्कार एकल विद्यालय फाउंडेशनला राज्यपालांच्या हस्ते प्रदान करण्यात आला. सोसायटीचे अध्यक्ष शाहू छत्रपती, पुण्याचे पालकमंत्री गिरीश बापट, सोसायटीचे सचिव आनंद भिडे, सोसायटीच्या नियामक मंडळाचे अध्यक्ष डॉ. अजित पटवर्धन व्यासपीठावर उपस्थित होते. फाउंडेशनचे अध्यक्ष बजरंग बाग्रा यांनी हा पुरस्कार स्वीकारला.
'लोकसंख्येच्या लाभांशामुळे (डेमोग्राफिक डिव्हिडंड) भारत २०२० मध्ये जगातील सर्वाधिक तरुण लोकसंख्येचा देश बनणार आहे. लोकसंख्या आणि शिक्षण या दोन्ही गोष्टी भारतासाठी अतिशय महत्त्वाच्या गोष्टी आहेत. या दोन गोष्टींचा आपण कशा पद्धतीने उपयोग करून घेतो, यावर आपल्या देशाचे भविष्य अवलंबून आहे. आर्थिक महासत्तेच्या दिशेने वाटचाल करताना देशातील युवकांना उद्योजकतेकडे वळविणे आवश्यक आहे. त्यासाठी पंतप्रधानांनी स्टार्टअप इंडिया, स्टॅँडअप इंडिया हा नारा दिला आहे,' असे विद्यासागर राव यांनी सांगितले.
डॉ. अजित पटवर्धन यांनी प्रास्ताविक केले; अनंत भिडे यांनी आभार मानले.
.................
असे आहे एकल विद्यालय
प्रत्येक विद्यालयात एक शिक्षक याप्रमाणे ही एकशिक्षकी शाळा चालविण्यात येते. शिकणाऱ्या मुलांनी स्वयंरोजगारावर भर द्यावा, असा प्रयत्न असतो. शिक्षकांसाठी दहावी उत्तीर्ण ही अट असून, विद्यार्थी तीन तास शाळेत असतील, यासाठी प्रयत्न केले जातात. नक्षलग्रस्त जिल्हे, काश्मीर खोरे अशा भागांतही ही विद्यालये असून १३ जिल्ह्यांतील ५२ हजार गावांतून १५ लाख विद्यार्थी शिक्षण घेत आहेत. नक्षलग्रस्त भागात शाळा असूनही नक्षलग्रस्तांकडून कोणताही त्रास होत नाही. उलट त्यांचीच मुले या शाळांमध्ये शिकतात, असे बजरंग बाग्रा यांनी सांगितले.
मोबाइल अॅप डाउनलोड करा आणि राहा अपडेट
